《趁iau2日時》

 | | | 轉寄

愛hō͘咱聚集作一伙

作者 林俊育 2008.07.20

上帝ê愛常hō͘不可能ê代誌變成可能，mā只有上帝ê愛ē-tàng hō͘咱聚集作伙，彼此分享而成長。

今年4月25日，雙連教會盲朋友聯誼會主辦一場「愛hō͘咱聚集作一伙」音樂見證會，由一位傑出ê台裔德籍盲人音樂家────韓義明﹝DANIELHEINRICH)演奏鋼琴、小提琴kap管風琴ê名曲kap宗教音樂，西羅亞合唱團mā參與演出，因團員tī惠明盲校時期kap韓義明三歲前有一段難忘ê童年回憶。

Hit暗四百guā位聽眾m̄-nā聆賞一場優美動人ê音樂會，mā領受了一場由韓義明本人、伊ê養母(BRUNHILDE HEINRICH，大家叫伊韓太太)kap惠明盲校陳淑靜校長娓娓道出「愛hō͘咱聚集作一伙」ê美好而感動人ê見證，那mā是韓義明ê故事。

韓義明1968年tī台北出生，生母見伊生落來就無眼球，心生驚惶he是上天ê責罰，tuì án-ne將伊放sak tī台北義光育幼院門口，義光育幼院無收養盲人孤兒ê經驗，當時德國惠明盲人福利會(HILDESHEIMER BLINDENMISSION﹞派來台灣從事盲人福利事業ê韓牧師(REV.CHRISTIAN HEINRICH)kap韓太太知影tsit件事，上帝ê愛hō͘ in夫婦一屑á to無遲疑地將韓義明接tńg去厝裡照顧。三年後完成領養手續取名DANIELHEINRICH，tī 1972年tuè父母回德國定居。

1973年開始學習小提琴，1978年學習鋼琴，1984年學習管風，1988年進入HERFORD音樂學院主修教會音樂。舊年畢業，今年四月一日韓牧師kap韓太太帶韓義明tńg來到伊ê出生地。

西羅亞合唱團tāi先演唱「上帝是愛」kap「創世紀選曲」phah開音樂晚會ê序幕，當西羅亞團員手牽手慢慢行落台階，韓義明mā tī到維也納主修鋼琴現任西羅亞合唱團伴奏ê盧惠慈老師引領下，慢條斯理地行到鋼琴位子坐落來，觀眾凝神注目身穿燕尾服ê盲音樂家。Tsit時全場鴉雀無聲，大家以懷疑ê眼神等待伊ê第一個琴音。因為tsit位二十五歲ê盲人青年音樂家對大家來講，實在新鮮得hō͘人有點á m̄敢相信，tú親像彭德貴牧師tī開場致詞時講ê「咱明眼人bueh學一種樂器lóng無簡單，生落來就雙眼失明ê韓義明卻ē-tàng以二十五歲ê年紀，演奏高難度ê鋼琴、小提琴kap管風琴ê世界名曲，tse就是約翰福音第九章第三節耶穌回答門徒講：「伊眼盲kap伊家己或伊父母ê罪lóng無關係，而是beh tī伊身上彰顯神ê大能力。」

一陣鴉雀無聲了後，韓義明ê雙手tī琴鍵上悠然地動起來，ARAM CHATSCHATURIAN 作曲ê TOCCATA 鋼琴曲帶hō͘聽眾無限ê感動kap由衷ê讚賞。當伊離開鋼琴座位，the̍h起小提琴行到面向觀眾ê台頂，一位觀眾問我：「伊目睭hiah-ni̍h明亮，為何講無眼球?」我回答講：「he是 ARTIFICIAL (人造ê)。」伊終其尾心服地靜落來。

韓義明tsit時正手舉起琴弓，面ǹg倒pîng微偏對tio̍h鋼琴伴奏ê盧惠慈老師，真有默契地點一下頭，A. DVORAK 作曲ê SONATINA 第1、2樂章小提琴協奏曲叫每一位聽眾ê心弦tuè那優美ê旋律跳動，雖然聆賞ê聽眾意猶未盡，但koh再美好ê樂曲mā有終了ê時tsūn。

台中惠明盲校服務三十七年ê陳淑靜校長siōng暸解韓義明ê成長過程，特別tuì台中趕來向聽眾述講伊ê感言：「四月四日tī國家音樂廳聽韓義明ê音樂會，我當場感動kah禁bē-tiâu目屎流落來，mā勾起二十五年前有關韓義明動人ê回憶。韓義明今á日ê成就證明了上帝超越koh無條件ê愛，我mā感觸到世間父母ê愛是有條件ê，韓義明ê生母見伊無眼球á準備餓死伊，據阮估計大約有一個禮拜無飼伊食物件。伊耐命竟然ē-tàng無死，mā是beh來證明上帝無限ê愛。當時德國惠明派來台灣kap我同工ê韓牧師kap師太太眼見tse棄嬰只tshun皮包骨，如瘦猴般pháiⁿ看，韓牧師kap韓太太來台ê使命就是beh推展盲人福利事工，in使命tī身，毅然決定抱tńg去養。
三年後,韓義明成長成(tsiâⁿ)做乖巧而活潑ê gín-á，會講台語、華語、德語kap英語。韓牧師tī台任務完成beh tńg去德國ê時tsūn，in夫婦決定bueh正式認養kā韓義明帶tńg來德國。二十二年來，韓牧師kap韓太太一定經歷真tsē苦心，當然德國ê大環境造就了tsit位少年ê盲音樂家hō͘咱讚嘆無停。當時如果韓義明留tī台灣，咱ê大環境siōng tsē mā hō͘伊成做kap西羅亞團員仝款而已。今á日在場ê十八位西羅亞團員ê中間有十六位是惠明盲校ê畢業生。
雙連教會對西羅亞ê栽培，我真放心，mā希望koh-khah tsē教會來關心殘障同胞。今á日韓義明ê故事啟示咱共同努力tī台灣創造kap德國仝款ê大環境。」

續落來由許梅芳小姐用古箏彈奏「恆春戀曲」，伊來自金門，tuì惠明盲校畢業，tī西羅亞合唱團唱女低音。Tsit時韓義明tī台下當聽眾，沉醉地欣賞那新奇而美妙ê台灣民謠。

大家期待已久ê韓義明ê見證分享由留德ê張思聰牧師擔任翻譯，伊笑笑ê先用台語講：「平安！我bē曉講台灣話，失禮。」續落來伊講：「真歡喜今晚kap大家分享中國音樂，回台將近一個月，真tsē朋友對我真好，感謝上帝。我父母注意tio̍h我自小就愛聲音，所以kā我送到音樂學校，五歲學小提琴，十歲學鋼琴，講真正我無愛鋼琴，因為那siuⁿ大聲，我十六歲就開始學koh-khah大聲ê管風琴。我學琴siōng大ê困難是buē-sái看明眼人ê樂譜，起先靠錄音帶。感謝上帝ê恩典kap愛，我克服一切困難來學我所ē-tàng學ê音樂。後來我學會曉點字譜，hō͘我koh-khah容易學鋼琴kap管風琴，但挨(e)小提琴tio̍h用雙手就無空手來摸點字譜。一生中tú-tio̍h真tsē困難，但上帝ê愛hō͘我lóng ē-tàng克服一切困難。我肉眼雖看bē-tio̍h，但我絕對無懷疑過上帝ê愛。音樂是世界ê共同語言，通過音樂我ē-tàng傳揚上帝ê愛，kap大家分享，今後我希望ē-tàng tī教會工作，事奉上帝。

應韓義明要求聽中國kap台灣ê音樂，音樂會除了安排古箏外，韓義明見證後，由tuì文化大學音樂系畢業ê盲朋友劉于新先生用中國笛演奏「蔭中鳥」。

續落來，樸素而慈祥ê韓太太上台bueh kap觀眾分享「義母ê愛」，台下hō͘ in siōng熱烈ê掌聲。伊本來答應講台語，但離台二十二年來lóng無機會講台語，面對tsiah-ni̍h-tsē聽眾mā會緊張，所以用幾句台語請安後，就請伊tī台同工五年ê陳淑靜校長翻譯伊ê英文。伊輕聲細語地講：「韓義明ê故事大家lóng聽了bē少，我無koh重複，但我必須kā大家講一件真有意義ê事。當韓義明開始bat代誌就問韓牧師kap我講：『 STEPHAN kap FRIEDERICKE 是lín親生ê兒女，我m̄是lín親生ê，那我是tuì tài來ê neh?』韓牧師kap我lóng認為應該照實講，而且必須小心回答tsit-ê問題。阮祈禱後，上帝指示阮對韓義明講：『你是上帝hō͘阮ê禮物，阮tī台灣ê時tsūn，有位太太將你用布包tio̍h送來hō͘阮ê禮物，全世界無人像阮án-ne得tio̍h tsiah-ni̍h好ê禮物。後來韓義明常常驕傲ê對人講伊是父母ê大禮物。我得tio̍h好ê禮物，tio̍h講多謝，感謝上帝tsit份禮物帶hō͘阮真大ê喜樂。」

主持人陳文欽牧師講：「韓義明出生tī台灣，tī德國受栽培成做宗教音樂家，tse hō͘咱真大ê啟示，各位若有感動，請為伊ê koh再深造奉獻。」韓義明收下新台幣58,413.00，伊感激萬分地向觀眾深深作了個大鞠躬。

西羅亞合唱團ê吳月雲團長代表主辦單位致謝詞講：「上帝無應允天永遠是藍ê，二十五年前韓義明棄嬰被韓牧師夫婦收養，上帝ê愛開始充滿in之間。講tio̍h我們台灣無仝款，殘障福利法規定政府機關ài僱用百分之二、民間企業ài僱用百分之一ê殘障人士。但到目前為止，百分之九十以上ê企業寧可繳罰款mā無願意僱用殘障人士。上帝教咱ài關懷照顧那siōng微小ê，殘障人士需要大家扶伊一kā，伊就ē-tàng khiā起來，韓義明是siōng好ê例。感謝今晚ê演出單位，koh-khah感謝各位觀眾ê掌聲鼓勵kap支持。」

西羅亞合唱團koh再唱「你ê夢」(林聲翕曲)kap「媽媽請您mā保重」(蕭泰然曲)了後，壓軸ê韓義明管風琴演奏tī震耳ê掌聲下開始。「NIKULAUS BRUHNSE小調」kap「ZOLTGALDONYI(聖詠)二曲tī伊純熟ê雙手雙腳並用彈奏下，觀眾無不讚嘆伊m̄免看譜就ē-tàng彈出tsiah-ni̍h震撼人心ê大曲，ē-tàng講伊是tī「顯明上帝ê大權能」。最後ê掌聲繼續二分鐘以上，tse是我一生感觸siōng深ê音樂見證會，心中一再teh唱「愛hō͘咱聚集作一伙」。
1993.9.28.