《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第七章

作者 巴克禮普世版小組 2011.05.08

1) M̄-thang phue-phîng lâng, tsiah bián tú-tio̍h phue-phîng.
2) In-uī lín īng sím-mi̍h phue-phîng lâi phue-phîng, iā bueh án-ne siū phue-phîng; lín īng sím-mi̍h niû lâi niû, iā bueh án-ne niû hō͘ lín.
3) Koh lí tsáiⁿ-iūⁿ khuàⁿ-tio̍h hiaⁿ-tī ba̍k-tsiu-lāi ê tsháu-á-iù, iā bô siūⁿ lí ba̍k-tsiu-lāi ê îⁿ-á-tshâ ah?
4) Beh tsáiⁿ-iūⁿ kā lí ê hiaⁿ-tī kóng, Lí ba̍k-tsiu-lāi ê tsháu-á-iù hō͘ guá kā lí the̍h-khí-lâi, iā lí ba̍k-tsiu-lāi kìng-jiân ū îⁿ-á-tshâ ah?
5) Ké-hó ê lâng ah, tāi-sing the̍h-khì lí ba̍k-tsiu-lāi ê îⁿ-á-tshâ, tsiah uē bîng-bîng khuàⁿ-tio̍h thang the̍h-khì hiaⁿ-tī ba̍k-tsiu-lāi ê tsháu-á-iù.
6) M̄-thang īng sìng ê mi̍h hō͘ káu, iā m̄-thang īng lín ê tsin-tsu hiat tī ti ê thâu-tsîng; kiaⁿ-liáu in īng kha ta̍h i, ua̍t-lìn-tńg lâi kā lín.
7) Kiû tsiū hō͘ lín, tshuē tsiū tú-tio̍h, phah mn̂g tsiū kā lín khui.
8) In-uī kìⁿ-nā kiû ê tit-tio̍h; tshuē ê tú-tio̍h; phah mn̂g ê, tsiū kā i khui.
9) Lín tiong-kan ū sím-mi̍h lâng, i ê kiáⁿ kā i thó piáⁿ, kiám bueh īng tsio̍h-thâu hō͘ i?
10) á-sī bueh ti̍h hî, kiám bueh īng tsuâ hō͘ i?
11) Lín tsiah-ê sui-jiân pháiⁿ, iáu-kú uē hiáu-tit īng hó mi̍h hō͘ lín ê kiáⁿ-jî, hô-hòng lín tī thiⁿ-tíng ê Pē, kiám bô bueh īng hó mi̍h hō͘ kiû I ê lâng mah?
12) Só͘-í lín kìⁿ-nā ài lâng khuán-thāi lín ê, lín iā tio̍h án-ne khuán-thāi lâng; in-uī tse sī lu̍t-huat kap sian-ti.
13) Lín tio̍h tuì hit ê ue̍h mn̂g ji̍p; in-uī thàu kàu bia̍t-bô ê, hit ê mn̂g khuah, hit ê lō͘ tuā tiâu, tuì hia ji̍p ê lâng tsuē.
14) Thàu kàu ua̍h ê, hit ê mn̂g ue̍h, hit ê lō͘ suè tiâu, tshuē-tio̍h ê lâng tsió.
15) Kín-sīn tî-hông ké ê sian-ti, in tsiū-kūn lín, guā-bīn sī iûⁿ-ko, lāi-bīn sī hiông-ok ê tshâi-lông.
16) Lín bueh tuì in ê kué-tsí lâi bat i; kiám tuì tshì-phè bán phû-tô, tuì tsi̍t-lê bán bû-hua-kó mah?
17) Án-ne kìⁿ-nā hó tshiū kiat hó kué-tsí; pháiⁿ tshiū kiat pháiⁿ kué-tsí.
18) Hó tshiū buē kiat pháiⁿ kué-tsí, pháiⁿ tshiū buē kiat hó kué-tsí.
19) Kìⁿ-nā tshiū bô kiat hó kué-tsí ê, tsiū tshò i, hiat-lo̍h hué.
20) Só͘-í lín bueh tuì in ê kué-tsí lâi bat i.
21) Kìⁿ-nā tshing-ho͘ guá kóng, Tsú ah, Tsú ah ê, bô tsuân-pō͘ ji̍p Thian-kok; tsí-ū kiâⁿ guá tī thiⁿ-tíng ê Pē ê tsí-ì ê, tsiah uē.
22) Tng hit ji̍t tsē-tsē lâng bueh kā guá kóng, Tsú ah, Tsú ah, guán kiám m̄-sī īng lí ê miâ thuân kàu, īng lí ê miâ kuáⁿ kuí, īng lí ê miâ kiâⁿ tsuē-tsuē kuân-lîng mah?
23) Tsiū hit sî guá bueh bîng-bîng kā in kóng, Guá lóng m̄ bat lín; tsò put-huat ê, tio̍h lī-khui guá khì.
24) Só͘-í kìⁿ-nā thiaⁿ guá tsiah-ê uē lâi kiâⁿ ê, bueh pí-phīng tì-sik ê lâng, khí i ê tshù tī tsio̍h-puâⁿ tíng;
25) hō͘ lo̍h, tuā tsuí kàu, hong tshe, tshiong-tio̍h hit king tshù, iā bô tó; in-uī tē-ki tī tsio̍h-puâⁿ tíng.
26) Kìⁿ-nā thiaⁿ guá tsiah-ê uē, bô kiâⁿ ê, bueh pí-phīng gōng lâng, khí i ê tshù tī sua tíng;
27) hō͘ lo̍h, tuā tsuí kàu, hong tshe, tshiong-tio̍h hit king tshù, tsiū tó; koh i ê tó sī siong-tiōng.
28) Iâ-so͘ kóng tsiah-ê uē suah, tsìng lâng kî-kuài I ê kà-sī.
29) In-uī I kà-sī lâng, tshin-tshiūⁿ ū kuân-lîng ê, bô tshin-tshiūⁿ in ê king-ha̍k-kàu-su.