《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第八章

作者 巴克禮普世版小組 2011.05.15

1, Iâ-so͘ í-king lo̍h suaⁿ, kui tuā tīn ê lâng tè I.
2, Tú-tn̄g ū tsi̍t ê thái-ko ê tsiū-kūn lâi pài I kóng, Tsú ah, lí nā khíng, tsiū ē hō͘ guá tshing-khì.
3, I tsiū tshun tshiú bong i kóng, Guá khíng, lí thang tshing-khì; i ê thái-ko liâm-piⁿ tshing-khì.
4, Iâ-so͘ koh kā i kóng, Kín-sīn bo̍h-tit kā lâng kóng; tsí-ū khì, tsiong pún-sin hō͘ tsè-si giām, iā tio̍h hiàn Mô͘-se só͘ huan-hù ê lé-mi̍h, lâi tsò tsìng-kù tī lâng.
5, Í-king ji̍p Ka-pik-lông, ū pé-tsóng tsiū-kūn I, lâi kiû I kóng,
6, Tsú ah, guá ê lô͘-po̍k piàn-suī, tó tī tshù-lāi, kan-khó͘ kàu ki̍k.
7, I tsiū kā i kóng, Guá lâi khì kā i i.
8 Pé-tsóng ìn kóng, Tsú ah, lí kàu guá tau, guá tng bē khí; lí kan-ta kóng tsi̍t kù uē, guá ê lô͘-po̍k tsiū ē hó.
9, In-uī guá iā sī hō͘ lâng kuán ê lâng, iā ū ping hō͘ guá kuán; kā tsit-ê kóng, Khì, i tsiū khì; kā hit-ê kóng, Lâi, i tsiū lâi; kā guá ê lô͘-po̍k kóng, Kiâⁿ án-ne, i tsiū kiâⁿ án-ne.
10, Iâ-so͘ thiaⁿ-tio̍h tsiū kî-kuài, kā tè I ê lâng kóng, Guá si̍t-tsāi kā lín kóng, tshin-tshiūⁿ tsit tsióng ê tshim sìn, liân Í-sik-lia̍t tiong, guá bē bat tú-tio̍h.
11, Guá koh kā lín kóng, tuì tang tuì sai, ū tsē-tsē lâng bueh kàu, kap A-pik-la̍h-hán, Í-sat, Ngá-kok, tsē toh tī Thian-kok;
12, tān-sī kok ê tsú-bîn bueh tú-tio̍h kuáⁿ-tshut tī guā-bīn ê o͘-àm; tī hia bueh ū thî-khàu kā-gê tshiat-khí.
13, Iâ-so͘ tsiū kā pé-tsóng kóng, Khì ah, tsiàu lí ê sìn kā lí tsiâⁿ; tú-tú hit sî, i ê lô͘-po̍k tsiū hó.
14, Iâ-so͘ ji̍p Pí-tik ê ke, khuàⁿ-tio̍h i ê tiūⁿ-ḿ, huān-tio̍h jia̍t-pēⁿ tó-teh.
15, Tsiū bong i ê tshiú, jia̍t tsiū thè; hū-jîn-lâng tsiū khí-lâi su-hāu I.
16, Kàu hông-hun-àm, ū lâng tshuā tsē-tsē huān-tio̍h kuí ê tsiū-kūn I; I īng tsi̍t kù ē kuáⁿ-tshut hiah-ê sîn; koh i-hó it-tshè ū pēⁿ ê lâng;
17, tsiū-sī bueh ìng-giām sian-ti Í-sài-a só͘ kóng ê, kóng, I pún-sin thuè-siū lán ê luán-jio̍k, tam-tng lán ê pēⁿ-tsìng.
18, Iâ-so͘ khuàⁿ-tio̍h kui tuā tīn ê lâng uî I, tsiū huan-hù kè-khì hit pîng huāⁿ.
19, Ū tsi̍t ê king-ha̍k-kàu-su lâi, kā I kóng, Sian-siⁿ ah, lí bô lūn tó-uī khì, guá bueh tè lí.
20, Iâ-so͘ tsiū kā i kóng, Hô͘-lî ū khang, thiⁿ-tiong ê pe-tsiáu ū siū; tsí-ū Jîn-tsú bô khuà thâu-khak ê só͘-tsāi.
21, Koh tsi̍t ê bûn-tô͘ kā I kóng, Tsú ah, hō͘ guá sing tńg-khì bâi-tsòng guá ê lāu-pē.
22, Tsí-ū Iâ-so͘ kā i kóng,, Lí tè guá, tshut-tsāi sí lâng khì bâi-tsòng in ê sí lâng.
23, Í-king lo̍h tsûn, I ê bûn-tô͘ tè I.
24, Hut-jiân hái-ni̍h khí tuā hong-íng, tì-kàu tsûn hō͘ íng khàm; tān-sī Iâ-so͘ teh khùn.
25, Bûn-tô͘ tsiū-kūn lâi kiò I khí-lâi, kóng, Tsú ah, kiù o͘h, bueh bô miā lah!
26, I tsiū kā in kóng, Sió-sìn ê lâng ah, tsáiⁿ-iūⁿ hiah bô táⁿ? Tsiū khí-lâi, tsik-pī hong kap hái, tsiū tuā pîⁿ-tiāⁿ.
27, Hiah-ê lâng kî-kuài kóng, tsit-ê sī sím-mi̍h hō lâng, hong kap hái iā sūn I?
28, Í-king kè-khì hit pîng huāⁿ, kàu Ka-tāi-lia̍p lâng ê tē; ū huān-tio̍h kuí ê, nn̄g lâng, tuì thióng-bōng tshut-lâi, tú-tio̍h I, sè-bīn hiông kài-kài; tì-kàu bô lâng káⁿ tuì hit tiâu lō͘ kè.
29, In hut-jiân âu-kiò kóng, Siōng-tsú ê Kiáⁿ ah, guán kap lí ū sím-mi̍h kan-sia̍p? sî bē kàu, lí lâi tsia sī bueh khó͘-tshó͘ guán mah?
30, Lī in hn̄g-hn̄g ū tuā kûn ê ti teh thó-tsia̍h;
31, hiah-ê kuí kiû I kóng, Lí nā kuáⁿ guán, tsiū tshe guán ji̍p ti kûn.
32, I tsiū kā in kóng, Khì ah. Kuí tsiū tshut-lâi, khì ji̍p ti; hut-jiân tsuân-kûn tsông lo̍h suaⁿ-khàm, ji̍p hái, sí tī tsuí-ni̍h.
33, Kò͘ ti ê tsáu khì ji̍p siâⁿ; tsiong tsiah-ê sū, í-ki̍p huān-tio̍h kuí ê lâng só͘ tú-tio̍h ê, lóng kā lâng kóng.
34, Thong siâⁿ ê lâng tshut-khì, tshuē-tio̍h Iâ-so͘; í-king kìⁿ-tio̍h, tsiū kiû I lī-khui in ê tē-kài.