《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第四章

作者 巴克禮普世版小組 2014.03.23

Pí-tik Kah Iok-hān Tī Gī-huē Hông Sím-mn̄g
1 Pí-tik Kah Iok-hān tuì kûn-tsiòng teh kóng-uē ê sî, tsiah-ê tsè-si kah sìng-tiān ê siú-uē-tiúⁿ, í-ki̍p Sat-to͘-kai-phài ê lâng hut-jiân lâi-kàu-uī. 2 In hui-siông siū-khì, in-uī tsit nn̄g-ê sù-tô͘ teh kà-sī kûn-tsiòng, koh kin-kì Iâ-so͘ ê koh-ua̍h lâi thuân tuì sí-lâng tiong koh-ua̍h ê tō-lí. 3 Só͘-í in tsiū hē-tshiú lia̍h tsit nn̄g-ê sù-tô͘. Kā in khu-liû kàu keh-tńg-ji̍t, in-uī thiⁿ í-king àm à. 4 M̄-koh thiaⁿ tō-lí lâi sìn ê lâng tsin-tsē . Tsa-po͘-lâng lóng-tsóng tsha-put-to ū gō͘-tshing. 5 Keh-tńg-ji̍t, Iû-thài-lâng ê thâu-lâng, tiúⁿ-ló, kah king-ha̍k kàu-su tsū-tsi̍p tī Iâ-lō͘-sat-líng. 6 Tsè-si-tiúⁿ A-ná kah Kai-a-huat, Iok-hān, A-li̍k-san-tāi, í-ki̍p tsè-si-tiúⁿ ê ka-tso̍k mā lóng tī hia. 7 In kiò hit nn̄g-ê sù-tô͘ khiā tī in tiong-ng, mn̄g kóng, "Lín khò sím-mi̍h kuân-lîng, hōng sím-mi̍h miâ, lâi tsò tsit-hāng tāi-tsì?" 8 Hit sî, Pí-tik siū Sìng-Sîn tshiong-muá, tuì in kóng, "Kok-uī bîn-kan ê thâu-lâng kah tiúⁿ-ló ah, 9 guán kin-á-ji̍t nā-sī uī-tio̍h tsit-ê pái-kha-.ê tit-tio̍h i-hó ê hó tāi-tsì lâi siū sím-mn̄g, 10 lín tāi-ke kah só͘-ū Í-sik-lia̍t jîn-bîn lóng tio̍h tsai, tsit-ê lâng hó-hó khiā tī lín ê bīn-tsîng, sī hōng Ná-sat-li̍k-lâng Iâ-so͘ Ki-tok ê miâ. Lín kā tsit-uī Iâ-so͘ tìng tī si̍p-jī-kè, m̄-koh Siōng-Tsú hō͘ I tuì sí-lâng tiong koh-ua̍h. 11 I tsiū-sī Sìng-king só͘ kóng: Lín tsiah-ê khí-tsù sai-hū só͘ khì-sak ê tsio̍h, í-king tsiâⁿ-tsò tshù-kak-thâu ê ki-tsio̍h. 12 Tû-liáu Iâ-so͘ í-guā lóng bô tsín-kiù, in-uī tī thiⁿ-ē jîn-kan, Siōng-Tsú bô siúⁿ-sù pa̍t-ê miâ tī lâng ê tiong-kan, hō͘ lán thang khò hit-ê miâ lâi tit-kiù." 13 Tsham-huē ê lâng khuàⁿ-tio̍h Pí-tik kah Iok-hān ê hó-táⁿ, koh tsai in sī bô ha̍k-būn ê phó͘-thong lâng, lóng tsin tio̍h-kiaⁿ. In koh ē-jīn-tit Pí-tik kah Iok-hān bat kin-tuè Iâ-so͘, 14 mā ū khuàⁿ-tio̍h hit-ê tit-tio̍h i-hó ê lâng khiā tī in ê sin-piⁿ, tsiū bô uē thang piān-pok. 15 Tsham-huē ê lâng tsiū kiò in lī-khui gī-huē, jiân-āu tsò-hué gī-lūn, 16 kóng, "Lán tio̍h án-tsuáⁿ tshú-lí tsiah-ê lâng? In hián-jiân sī kiâⁿ sîn-jiah, Iâ-lō͘-sat-líng só͘-ū ê lâng lóng tsai, lán bô-huat-tō͘ hó͘ⁿ-jīn. 17 M̄-koh uī-tio̍h mài hō͘ tsit-ê tāi-tsì tī jîn-bîn tiong-kan ná thuân ná khuah, lán tio̍h kā in kíng-kò, it-tīng m̄-thang koh hōng Iâ-so͘ ê miâ lâi thuân-káng tō-lí." 18 In tsiū kiò hit nn̄g-ê sù-tô͘ lâi, kìm-tsí in m̄-thang koh hōng Iâ-so͘ ê miâ lâi kóng tō-lí á-sī kà-sī lâng. 19 M̄-koh Pí-tik kah Iok-hān ìn kóng, "Tī Siōng-Tsú ê gán-tiong, thiaⁿ lín ê uē á-sī thiaⁿ Siōng-Tsú ê uē tsiah tio̍h? lín ka-kī phuàⁿ-tuàn. 20 In-uī guán só͘ khuàⁿ-tio̍h kah só͘ thiaⁿ-tio̍h ê, bô kóng bē-īng-tit." 21 Hiah-ê tsham-huē ê lâng siūⁿ bô pō͘ thang kā in hîng-hua̍t, koh in-uī kûn-tsiòng tsiong in só͘ kiâⁿ ê sîn-jiah lâi kui îng-kng hō͘ Siōng-Tsú, tsiū koh giâm-keh kā in kíng-kò liáu-āu pàng in tshut-khì. 22 Tsìng-lâng án-ne teh o-ló Siōng-Tsú sī in-uī tuì tsit-ê sîn-jiah tit-tio̍h i-hó ê lâng í-king sì-tsa̍p guā huè.

Sìn-tô͘ ê Kî-tó
23 Pí-tik kah Iok-hān tit-tio̍h tháu-pàng liáu-āu, tsiū khì tshuē in ê pîng-iú, tsiong tsiah-ê tsè-si-tiúⁿ kah tiúⁿ-ló só͘ kóng ê uē lóng tuì in pò-kò. 24 In thiaⁿ liáu tsiū tâng-sim tshut-siaⁿ tuì Siōng-Tsú kî-tó kóng, "Tshòng-tsō thiⁿ, tē, hái, kah kî-tiong bān-bu̍t ê Tsú-tsáiⁿ ah, 25 Lí thong-kuè Sìng-Sîn īng Lí ê lô͘-po̍k, guán ê tsó͘-sian, Tāi-pi̍t ê tshuì kóng: Lia̍t-kok án-tsuáⁿ tuā siū-khì, Tsiah-ê jîn-bîn án-tsuáⁿ kè-bô͘ bô-hāu-kó ê tāi-tsì? 26 Tē-tsiūⁿ ê lia̍t-ông pâi-tīn pī-tsiàn, Tsiah-ê kuaⁿ-uân mā tsò-hué tsū-tsi̍p, Lâi kong-kik Siōng-Tsú kah I ê Ki-tok.( tsù: SPh 2:1-2) 27 Hi-lu̍t, Pún-tiu Pí-lia̍p-to, kah Guā-pang-lâng, í-ki̍p Í-sik-lia̍t-lâng, kó-jiân tsū-tsi̍p tī tsit-ê siâⁿ, lâi kong-kik Lí só͘ suán-li̍p ê sîn-sìng Lô͘-po̍k Iâ-so͘, 28 In tsū-tsi̍p lâi tsò Lí ê kuân-lîng kah Lí ê tsí-ì só͘ tiāⁿ-tio̍h ē huat-sing ê it-tshè tāi-tsì. 29 Taⁿ Tsú ah, in teh kā guán khióng-hat, kiû Lí kàm-tshat, hō͘ Lí tsiah-ê lô͘-po̍k koh-khah hó-táⁿ lâi thuân-káng Lí ê tō-lí, 30 kiû Lí tshun-tshiú lâi i-pēⁿ, koh thong-kuè Lí sîn-sìng ê Lô͘-po̍k Iâ-so͘ ê miâ lâi kiâⁿ sîn-jiah kî-sū." 31 Kî-tó suah, tsū-tsi̍p ê só͘-tsāi tuā iô-tāng, kûn-tsiòng lóng siū Sìng-Sîn tshiong-muá, hó-táⁿ thuân-káng Siōng-Tsú ê tō-lí.

Sìn-tô͘ ê Kiōng-tông Sing-ua̍h
32 Tsuân-thé sìn-tô͘ lóng tâng-sim ha̍p-ì, bô-lâng kóng i ê tsâi-bu̍t sī ka-kī ê, ta̍k-hāng mi̍h-kiāⁿ lóng kong-ke īng. 33 Sù-tô͘ īng tuā kuân-lîng kiàn-tsìng Tsú Iâ-so͘ ê koh-ua̍h, kûn-tsiòng mā lóng tit-tio̍h tuā un-tián. 34 In tiong-kan bô-lâng ū khiàm-khueh, in-uī ū tshân-hn̂g tshù-the̍h ê lâng lóng bē-tiāu, 35 tsiong só͘ tit-tio̍h ê tsîⁿ the̍h lâi kau hō͘ sù-tô͘,tsiàu ta̍k-lâng só͘ su-iàu pun hō͘ in. 36 Ū tsi̍t-ê tshut-sì tī Ku-pí-lō͘( hiān-kim ê Sài-phó͘-lō͘-su) Lī-bī-tso̍k ê lâng, miâ-kiò Iok-sik, sù-tô͘ kā i kiò-tsò Pa-ná-pa(ì-sù sī "an-uì-tsiá"). 37 I kā tshân-hn̂g bē-tiāu, tsiong só͘ bē ê tsîⁿ tuà-lâi kau hō͘ sù-tô͘.