《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第三章

作者 巴克禮普世版小組 2014.03.16

I-hó Pái-kha ê Lâng
1 Ū tsi̍t-ji̍t ē-po͘ saⁿ-tiám tsiū-sī kî-tó ê sî, Pí-tik kah Iok-hān tsiūⁿ sìng-tiān. 2 Ū tsi̍t-ê lâng, tuì tshut-sì tsiū nńg-kha, ta̍k-ji̍t hō͘ lâng kng lâi hē tī sìng-tiān ê mn̂g, tsiū-sī hit-ê kiò-tsò "Suí-mn̂g", tī hia beh hiòng ji̍p-tiān ê lâng kiû-khit. 3 I tsi̍t-ē khuàⁿ-tio̍h Pí-tik kah Iok-hān teh-beh ji̍p sìng-tiān, tsiū hiòng in kiû-khit. 4 Pí-tik kah Iok-hān kā i tsù-ba̍k khuàⁿ, kóng, "Khuàⁿ guán." 5 I tsiū ba̍k-tsiu kim-kim kā in khuàⁿ, ǹg-bāng tuì in ē-tàng tit-tio̍h sím-mi̍h. 6 M̄-koh Pí-tik kóng, "Kim kah gîn guá lóng bô, kan-taⁿ ē-tàng tsiong guá só͘ ū ê hō͘ lí. Hōng Ná-sat-li̍k Iâ-so͘ Ki-tok ê miâ, bīng-līng lí khí-lâi kiâⁿ." 7 Pí-tik tsiū khan i ê tsiàⁿ-tshiú hō͘ i khí-lâi, i ê kha kah kha-ba̍k suî-sî ióng-kiāⁿ khí-lâi. 8 I tsiū thiàu khiā khí-lâi-teh, koh kiâⁿ, kah in tsò-hué ji̍p-khì sìng-tiān, ná kiâⁿ ná thiàu, ná o-ló Siōng-Tsú. 9 Tsìng-lâng khuàⁿ-tio̍h i iân-lō͘ kiâⁿ iân-lō͘ o-ló Siōng-Tsú, 10 koh jīn-tshut i sī pîng-sî tsē tī sìng-tiān ê Suí-mn̂g teh kiû-khit hit-ê lâng, tsiū tuì i sin-tsiūⁿ só͘ tú-tio̍h ê tāi-tsì kám-kak tio̍h-kiaⁿ koh kî-kuài.

Pí-tik tī sìng-tiān Thuân-káng Sìn-sit
11 Tī Só͘-lô-bûn ê tsáu-lông, hit-ê tit-tio̍h i-hó ê lâng kā Pí-tik kah Iok-hān ê tshiú khiú tiâu-tiâu, tsìng-lâng tuā kî-kuài, lóng tsáu uá-lâi khuàⁿ. 12 Pí-tik khuàⁿ-kìⁿ án-ne tsiū tuì hiah-ê lâng kóng, "Í-sik-lia̍t-lâng ah, lín sī án-tsuáⁿ tuì tsit-ê tāi-tsì kám-kak kî-kuài? ná-ē ba̍k-tsiu kim-kim lia̍h guán khuàⁿ? Lín siūⁿ-kóng guán sī khò ka-kī ê tsâi-lîng á-sī kìng-khiân, hō͘ tsit-ê lâng khí-lâi kiâⁿ? 13 A-pik-la̍h-hán, Í-sat, Ngá-kok ê Siōng-Tsú, tsiū-sī lán tsó͘-sian ê Siōng-Tsú, í-king hō͘ I ê Lô͘-po̍k Iâ-so͘ tit-tio̍h îng-iāu. Lín kā tsit-ê Iâ-so͘ kau hō͘ kuaⁿ-hú, sui-jiân Pí-lia̍p-to kuat-tīng beh pàng I, lín koh tong-tiûⁿ kī-tsua̍t. 14 Lín kī-tsua̍t hit-ê Sîn-sìng koh Kong-gī ê Iâ-so͘, tian-tò kiû Pí-lia̍p-to pàng tsi̍t-ê sat-jîn-huān hō͘ lín. 15 Lín hāi-sí ua̍h-miā ê kin-guân, tsiū-sī Siōng-Tsú tuì sí-lâng tiong hō͘ I koh-ua̍h Hit-uī. Guán sī tsit-hāng tāi-tsì ê kiàn-tsìng-jîn. 16 Lín só͘ khuàⁿ-kìⁿ, lín só͘ bat tsit-ê pái-kha-.ê, tuì sìn-khò Iâ-so͘ ê miâ lâi tit-tio̍h khuì-la̍t, i in-uī sìn-khò Iâ-so͘ ê miâ tsiū uân-tsuân hó khí-lâi, lín tāi-ke lóng ū khuàⁿ-tio̍h tsit-hāng tāi-tsì." 17 Hiaⁿ-tī tsí-muē ah, taⁿ guá tsai lín kah kuaⁿ-hú án-ne tsò sī in-uī m̄-tsai puàⁿ-hāng. 18 Siōng-Tsú ū thong-kuè tsìng sian-ti ê tshuì ī-giân: I ê Ki-tok tio̍h siū-lān ê tāi-tsì kó-jiân ìng-giām ā. 19 Só͘-í lín tio̍h hué-kái lâi kui-hiòng Siōng-Tsú, thang hō͘ lín ê tsuē tit-tio̍h tshat-siau. 20 Án-ne Siōng-Tsú ē sù lín sin ê ji̍t-tsí, koh tshe-khián tsá to̍h suán-tīng ê Ki-tok Iâ-so͘ lâi-kàu lín tiong-kan. 21 Tsiàu Siōng-Tsú thong-kuè kó͘-tsá sìng sian-ti ê tshuì só͘ suan-pò͘ ê, I it-tīng tio̍h tiàm tī thiⁿ-tíng, ti̍t-kàu bān-bu̍t king-sin ê sî-kî. 22 Mô͘-se bat kóng: Tsú, lín ê Siōng-Tsú ē tī lín tông-pau ê tiong-kan kā lín siat-li̍p tsi̍t-ê tshiūⁿ guá tsit-khuán ê sian-ti, I kā lín kóng ê uē, lín lóng tio̍h thiaⁿ. 23 M̄ thiaⁿ tsit-uī sian-ti ê lâng, lóng ē tuì tsú-bîn ê tiong-kan kā in siau-bia̍t.'( tsù: SBK 18: 15, 19) 24 Tuì Sat-bó-ní í-āu só͘-ū thuân-káng sìn-sit ê sian-ti, lóng ū kóng-khí tsiah-ê ji̍t-tsí. 25 Lín sī sian-ti ê kiáⁿ-sun, mā ū sîng-tsiap Siōng-Tsú kah lín tsó͘-sian só͘ li̍p ê iok, tsiū-sī Siōng-Tsú bat kā A-pik-la̍h-hán kóng, 'Thiⁿ-ē bān-tso̍k lóng ē tuì lí ê kiáⁿ-sun tit-tio̍h hok-khì.'( tsù: CSK 22:18; 26:4) 26 Siōng-Tsú í-king siat-li̍p I ê Lô͘-po̍k, sing tshe I lâi kā lín sù-hok hō͘ lín, hō͘ lín ta̍k-lâng ua̍t-tńg-sin lī-khui siâ-ok."