《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第八章

作者 巴克禮普世版小組 2014.04.20

Sò-lô Pik-hāi Kàu-huē
1 Hit ji̍t,Iâ-lō͘-sat-líng ê kàu-huē tú-tio̍h tuā pik-hāi, sù-tô͘ í-guā só͘-ū ê sìn-tô͘ lóng sì-suàⁿ khì Iû-thài kah Sat-má-lī-a ê ta̍k só͘-tsāi. 2 M̄-koh ū-kuá kìng-khiân ê lâng kā Su-thê-huán bâi-tsòng, uī-tio̍h i pi-siong tuā-siaⁿ thî-khàu. 3 Hit sî, Sò-lô hē-tshiú pik-hāi kàu-huē, ji̍p-khì ta̍k-ê sìn-tô͘ ê tshù, bô-lūn lâm-lí lóng thua tshut-lâi, kā in sàng-khì kuaiⁿ lo̍h-kaⁿ.

Hok-im Thuân Kàu Sat-má-lī-a
4 In-uī án-ne, hiah-ê sì-suàⁿ ê lâng khì ta̍k só͘-tsāi thuân hok-im ê tō-lí. 5 Hui-li̍k khì Sat-má-lī-a ê siâⁿ, tuì hia ê lâng suan-iông Ki-tok. 6 Tsìng-lâng thiaⁿ-tio̍h Hui-li̍k só͘ kóng ê uē, koh khuàⁿ-tio̍h i só͘ kiâⁿ ê sîn-jiah, tsiū tâng-sim thiaⁿ Hui-li̍k ê uē. 7 In-uī tsin-tsē hō͘ siâ-sîn hū-sin ê lâng tuā-siaⁿ huah tsiū tuì só͘ hū-sin ê lâng tshut-khì. Tsin-tsē piàn-suī ê, pái-kha-.ê, mā lóng tit-tio̍h i-hó. 8 Hit-ê siâⁿ ê lâng tuā huaⁿ-hí. 9 M̄-koh ū tsi̍t-ê lâng, miâ-kiò Se-bûn, í-tsîng bat tī siâⁿ-lāi kiâⁿ siâ-su̍t, tsū-khua tsò tuā, hō͘ Sat-má-lī-a ê lâng tio̍h-kiaⁿ koh kî-kuài; 10 Siâⁿ-lāi ê lâng tuā-tuā sè-sè tsuan-sim thiaⁿ i, kóng, "Tsit-ê lâng sī Siōng-Tsú ê kuân-lîng, sī lâng teh kóng ê 'Tuā-lîng-tsiá'." 11 In lóng tsuan-sim thiaⁿ i, sī in-uī in kàu-taⁿ tsin kú īng siâ-su̍t hō͘ in tio̍h-kiaⁿ koh kî-kuài. 12 M̄-koh in sìn Hui-li̍k só͘ thuân ê hok-im, lūn Siōng-Tsú ê Kok-tō͘ kah Iâ-so͘ Ki-tok ê miâ liáu-āu, tsiū ū lâm-lí tsiap-siū sé-lé. 13 Liân Se-bûn ka-kī mā sìn, i siū sé-lé liáu-āu tsiū kā Hui-li̍k tuè tiâu-tiâu. I khuàⁿ-tio̍h Hui-li̍k só͘ kiâⁿ ê sîn-jiah kah só͘ tsò ê tuā kuân-lîng kî-sū tsiū tio̍h-kiaⁿ koh kî-kuài. 14 Iâ-lō͘-sat-líng ê sù-tô͘ thiaⁿ-tio̍h Sat-má-lī-a í-king tsiap-la̍p Siōng-Tsú ê tō-lí, tsiū tshe Pí-tik kah Iok-hān khì in hia. 15 In khì kàu-uī tsiū thè hiah-ê sìn-tô͘ kî-tó, hō͘ in thang tit-tio̍h Sìng-Sîn tshiong-muá. 16 In-uī in tú siū sé-lé, kui tī Tsú Iâ-so͘ ê miâ niā-niā, Sìng-Sîn iáu-buē lîm-kàu in tiong-kan jīm-hô lâng. 17 Pí-tik kah Iok-hān kā in huāⁿ-tshiú, in tsiū tit-tio̍h Sìng-Sîn tshiong-muá. 18 Se-bûn khuàⁿ-tio̍h hō͘ sù-tô͘ huāⁿ-tshiú lóng tit-tio̍h Sìng-Sîn, tsiū hiàn tsîⁿ hō͘ in, 19 kóng, "Tshiáⁿ lín mā tsiong tsit-ê kuân-lîng hō͘ guá, thang hō͘ guá huāⁿ-tshiú ê lâng ē-tàng tit-tio̍h Sìng-Sîn." 20 M̄-koh Pí-tik tuì i kóng, "Lí ê tsîⁿ kah lí tsò-hué khì sí, in-uī lí siūⁿ-kóng Siōng-Tsú ê un-sù ē-tàng īng tsîⁿ lâi bé! 21 Tsit-ê tāi-tsì bô lí ê hūn, kah lí bô kuan-hē, in-uī tī Siōng-Tsú ê bīn-tsîng lí ê tsûn-sim put-liông. 22 Só͘-í lí tio̍h hué-kái tû-khì tsit-ê pháiⁿ liām-thâu, kiû Tsú khuàⁿ ē-tàng hō͘ lí tit-tio̍h sià-bián á-bē. 23 Guá khuàⁿ-tshut lí sim-lāi tshiong-muá tham-sim kah tsi̍t-tò͘, hō͘ siâ-ok khún-pa̍k." 24 Se-bûn ìn kóng, "Tshiáⁿ lí thè guá kiû Tsú, hō͘ lín só͘ kóng ê tāi-tsì lóng bē lîm-kàu guá." 25 Pí-tik kah Iok-hān tsò kiàn-tsìng lâi thuân Tsú ê tō-lí, jiân-āu tńg-khì Iâ-lō͘-sat-líng, iân-lō͘ tī Sat-má-lī-a-lâng ê tsin-tsē tsng-siā thuân hok-im.

Hui-li̍k Kah Ai-thê-o-pik ê Thài-kàm
26 Tsú ê thiⁿ-sài tuì Hui-li̍k kóng, "Khí-lâi, ǹg lâm-pîng khì, kiâⁿ tuì Iâ-lō͘-sat-líng lo̍h-khì Ka-sat ê hit-tiâu lō͘." Tsit tiâu sī thong-kuè khòng-iá ê lō͘. 27 Hui-li̍k khí-lâi tsiū tshut-huat. Lō͘-tiong tú-tio̍h tsi̍t-ê Ai-thê-o-pik(hiān-kim ê I-soh-phit-a) ê thài-kàm, tsiū-sī Ai-thê-o-pik lí-ông Kan-tāi-ki ê tsâi-bū tāi-sîn. 28 Tsit-ê lí-ông khì Iâ-lō͘-sat-líng kìng-pài suah beh tńg-khì, tsē tī tshia-ni̍h teh tha̍k sian-ti Í-sài-a ê tsheh. 29 Sìng-Sîn kā Hui-li̍k kóng, "Tsìn-tsîng khì tuè-uá hit-tâi bé-tshia." 30 Hui-li̍k tsáu uá-khì, thiaⁿ-tio̍h i teh tha̍k sian-ti Í-sài-a ê tsheh, tsiū mn̄g i kóng, "Lí teh tha̍k ê, lí ū liáu-kái bô?" 31 Thài-kàm ìn kóng, "Bô-lâng kā guá kái-sueh, guá ná-ē liáu-kái?" I tsiū tshiáⁿ Hui-li̍k tsiūⁿ tshia lâi tsò-hué tsē. 32 I teh tha̍k ê Sìng-king hit tuāⁿ sī: I tshin-tshiūⁿ iûⁿ hō͘ lâng khan khì thâi, Tshin-tshiūⁿ iûⁿ-á tī tsián-mn̂g ê lâng bīn-tsîng bô tshut siaⁿ, lóng bô khui-tshuì. 33 I pi-bî siū bô kong-gī ê sím-phuàⁿ, bô-lâng thè I tsú-tshî kong-tō. Siáⁿ-lâng ē-tàng thuân-su̍t I ê sè-tāi? In-uī I tī tē-tsiūⁿ ê ua̍h-miā í-king kiat-sok à."( tsù: ISA 53:7-8) 34 Thài-kàm ìn Hui-li̍k kóng, "Tshiáⁿ mn̄g, sian-ti kóng tsit-ê uē sī teh tsí siáⁿ-lâng? sī tsí ka-kī á-sī tsí pa̍t-lâng?" 35 Hui-li̍k tsiū tuì hit-tuāⁿ Sìng-king khai-sí tuì i thuân Iâ-so͘ ê hok-im. 36 In tuì hit-tiâu lō͘ lo̍h-khì, lâi-kàu ū tsuí ê só͘-tsāi, thài-kàm kóng, "Lí khuàⁿ, tsia ū tsuí, guá kám ē-tàng tī tsia niá-siū sé-lé?" 37 Hui-li̍k kā i kóng, “Lí nā tsuân-sim sìn tsiū thang niá-siū sé-lé.” I ìn kóng, “Guá sìn Iâ-so͘ Ki-tok sī Siōng-Tsú ê Kiáⁿ.”( tsù: Pa-khik-lé Sìng-king ê tshau-pún bô 37 tsat.) 38 Thài-kàm tsiū huan-hù thîng tshia. Hui-li̍k kah thài-kàm nn̄g lâng lo̍h tsuí, Hui-li̍k tsiū kā i sé-lé. 39 Tuì tsuí-ni̍h khí-lâi ê sî, Siōng-Tsú ê Sìng-Sîn tsiong Hui-li̍k tsiap khì. Thài-kàm tsiū án-ne bô koh khuàⁿ-tio̍h i, m̄-koh iáu-sī huaⁿ-huaⁿ-hí-hí kè-sio̍k i ê lō͘-thîng. 40 Āu-lâi ū-lâng tī A-só-to͘ khuàⁿ-tio̍h Hui-li̍k, i iân-lō͘ ta̍k-ê siâⁿ-tshī thuân hok-im, ti̍t-kàu Kai-sat-lī-a.