《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第九章

作者 巴克禮普世版小組 2014.04.27

Sò-lô Kui Tsú (St 22:6-16;26:12-18)
1 Sò-lô iáu-koh kè-sio̍k khióng-hat beh thâi Tsú ê bûn-tô͘, i khì kìⁿ tsè-si-tiúⁿ, 2 iau-kiû i siá phue hō͘ Tāi-má-sik hia-ê huē-tn̂g, tsún i nā tú-tio̍h sìn tsit-ê tō-lí ê lâng, bô-lūn lâm-lí, thang kā in pa̍k khí-lâi, ah khì Iâ-lō͘-sat-líng. 3 Sò-lô kiâⁿ beh-kàu Tāi-má-sik ê sî, hut-jiân tuì thiⁿ ū kng tsiò-siā tī i sì-tsiu-uî. 4 I tsiū pua̍h-tó tī thô͘-kha, thiaⁿ-tio̍h ū siaⁿ tuì i kóng, "Sò-lô, Sò-lô, ná-ē beh pik-hāi Guá?" 5 I mn̄g kóng, "Tsú ah, Lí sī siáⁿ-lâng?" Hit-ê siaⁿ Kóng, "Guá to̍h-sī lí só͘ pik-hāi ê Iâ-so͘. 6 Khí-lâi ji̍p-khì siâⁿ-lāi, ū-lâng ē kā lí tsí-sī lí tio̍h án-tsuáⁿ tsò." 7 Tâng-phuāⁿ tsiū tòng-tiām, gāng-gāng khiā-teh bē kóng-uē; in ū thiaⁿ-tio̍h siaⁿ, m̄-koh bô khuàⁿ-tio̍h iáⁿ. 8 Sò-lô tuì thô͘-kha peh khí-lâi, ba̍k-tsiu thí-khui, m̄-koh khuàⁿ bô sím-mi̍h. In tsiū khan i ê tshiú, tshuā i ji̍p-khì Tāi-má-sik. 9 Sò-lô tī hia saⁿ-ji̍t kú, ba̍k-tsiu sit-bîng, bô tsia̍h mā bô lim. 10 Tī Tāi-má-sik ū tsi̍t-ê bûn-tô͘ miâ-kiò A-ná-nî-a. Siōng-Tsú tī īⁿ-siōng tiong kā i kóng, "A-ná-nî-a ah." I ìn kóng, "Tsú ah, guá tī tsia." 11 Tsú tuì i kóng, "Khí-lâi, khì hit-tiâu kiò-tsò "Ti̍t" ê ke-lō͘, tī Iû-tāi ê tshù tshuē tsi̍t-ê miâ-kiò Sò-lô ê Tāi-sò͘-lâng, lí ē khuàⁿ-tio̍h i tī hia teh kî-tó. 12 Sò-lô tī īⁿ-siōng tiong khuàⁿ-tio̍h tsi̍t-ê miâ-kiò A-ná-nî-a e5lang5, ji̍p-lâi kā i huāⁿ-tshiú, hō͘ i ē-tàng koh khuàⁿ-kìⁿ." 13 A-ná-nî-a ìn kóng, "Tsú ah, guá ū thiaⁿ-tio̍h tsin-tsē lâng kóng-khí, tsit-ê lâng tī Iâ-lō͘-sat-líng tuì Lí ê sìn-tô͘ tsò tsin-tsē ok-to̍k ê tāi-tsì. 14 I koh ū tsè-si-tiúⁿ ê siū-kuân, thang tī tsia lia̍h só͘-ū kiû-kiò Lí ê miâ ê lâng. 15 M̄-koh Tsú kā i kóng, "Tsò lí khì, i sī Guá kíng-suán ê khì-kū, beh tuì Guā-pang-lâng, kok-ông kah Í-sik-lia̍t-lâng suan-iông Guá ê miâ. 16 Guá mā beh hō͘ i tsai, uī-tio̍h Guá ê miâ, i it-tīng tio̍h siū tsin-tsē kan-khó͘." 17 A-ná-nî-a tsiū khì, ji̍p-khì hit-king tshù, kā Sò-lô huāⁿ-tshiú, kóng, "Sò-lô hiaⁿ-tī, Tsú, tsiū-sī lí lâi ê sî lō͘-tiong tshut-hiān hō͘ lí khuàⁿ ê Iâ-so͘, tshe guá lâi hō͘ lí ē koh khuàⁿ-kìⁿ, koh tit-tio̍h Sìng-Sîn tshiong-muá." 18 Suî-sî tuì i ê ba̍k-tsiu ū tshin-tshiūⁿ hî-lân ê mi̍h lak lo̍h-lâi, i tsiū koh ē khuàⁿ-kìⁿ, khí-lâi niá-siū sé-lé.

Sò-lô Tī Tāi-má-sik Thuân-tō
19 Sò-lô tsia̍h-pá liáu-āu tsiū ióng-kiāⁿ khí-lâi. I kah Tāi-má-sik ê bûn-tô͘ tsò-hué tuà kuí-nā ji̍t. 20 I suî-sî tī tsiah-ê huē-tn̂g suan-káng Iâ-so͘, kóng, "I sī Siōng-Tsú ê Kiáⁿ." 21 Thiaⁿ-tio̍h ê lâng lóng tio̍h-kiaⁿ koh kî-kuài, kóng, "Tsit-ê lâng kám m̄-sī hit-ê tī Iâ-lō͘-sat-líng pik-hāi só͘-ū kiû-kiò tsit-ê miâ ê lâng? koh lâi tsia beh lia̍h sìn-tô͘ thua in khì kau hō͘ tsè-si-tiúⁿ." 22 M̄-koh Sò-lô ná kóng ná ū la̍t, tsìng-bîng Iâ-so͘ sī Ki-tok, hō͘ tuà tī Tāi-má-sik ê Iû-thài-lâng lóng bô piān-pok ê î-tē. 23 Kuè tsin-tsē ji̍t liáu-āu, Iû-thài-lâng tsò-hué kè-bô͘ beh thâi Sò-lô. 24 Sò-lô ū thiaⁿ-tio̍h in ê kè-bô͘, hiah-ê lâng mê-ji̍t tī siâⁿ-mn̂g teh tng-tán beh kā i thâi. 25 M̄-koh Sò-lô ê bûn-tô͘ thàu-mê tsiong i īng tsi̍t-ê nâ-á tuì siâⁿ-tshiûⁿ kā i luī lo̍h-khì.

Sò-lô Tī Iâ-lō͘-sat-líng
26 Sò-lô lâi-kàu Iâ-lō͘-sat-líng, beh kah bûn-tô͘ kau-puê. Tsìng-lâng lóng kiaⁿ i, bô siong-sìn i sī bûn-tô͘. 27 Tsí-ū Pa-ná-pa tshuā Sò-lô lâi kìⁿ sù-tô͘, kā in suat-bîng i tī lō͘-tiong án-tsuáⁿ khuàⁿ-tio̍h Tsú, Tsú kā i kóng-uē, í-ki̍p i tuà Tāi-má-sik juā-ni̍h-á hó-táⁿ hōng Tsú ê miâ lâi thuân hok-im. 28 Sò-lô tī Iâ-lō͘-sat-líng kah sù-tô͘ ū tshut-ji̍p lâi-óng, Tsú ê miâ hó-táⁿ thuân hok-im. 29 I mā kah kóng Hi-lia̍p-uē ê Iû-thài-lâng kóng-uē piān-lūn, hiah-ê lâng iáu-koh put-sî kè-bô͘ beh kā i thâi. 30 Sìn-tô͘ tsai-iáⁿ tsit-ê tāi-tsì, tsiū tshuā i lo̍h-khì Kai-sat-lī-a, sàng i tńg-khì Tāi-sò͘. 31 Hit-sî tsuân Iû-thài, Ka-lī-lī-síng, Sat-má-lī-a ê kàu-huē lóng ū pîng-an, ná kian-kò͘ huat-tián, só͘ kiâⁿ só͘ tsò lóng kìng-uì Tsú, tit-tio̍h Sìng-Sîn ê kó͘-bú, sìn-tô͘ jîn-sò͘ ná ke-thiⁿ.

Pí-tik Tī Lū-tāi kah Iok-phàⁿ
32 Pí-tik khì ta̍k só͘-tsāi hóng-būn, mā ū hóng-būn tuà tī Lū-tāi ê sìn-tô͘. 33 I tī hia tú-tio̍h tsi̍t-ê lâng, miâ-kiò Í-nî-ngá, tsit-ê lâng huān-tio̍h piàn-suī, tó tī bîn-tshn̂g peh nî kú. 34 Pí-tik kā i kóng, "Í-nî-ngá, Iâ-so͘ Ki-tok kā lí i-hó à, khí-lâi, tsíng-tùn lí ka-kī ê tshn̂g-pho͘. Í-nî-ngá suî-sî khí-lâi kiâⁿ. 35 Só͘-ū tuà tī Lū-tāi kah Sat-lûn ê lâng lóng ū khuàⁿ-tio̍h án-ne, tsiū lâi kui Tsú. 36 Tī Iok-phàⁿ ū tsi̍t-ê lí-sìn-tō͘, miâ-kiò Tāi-pí-tāi, Hi-lia̍p-uē kiò-tsò "To-ka", tsiū-sī lo̍k-á ê ì-sù. I tsò tsin-tsē hó tāi-tsì, koh tsín-tsè sàn-tshiah-lâng. 37 I phuà-pēⁿ sí-khì, lâng sé i ê sin-si, kā i hē tī lâu-tíng ê pâng-king. 38 In-uī Lū-tāi lī Iok-phàⁿ bô hn̄g, bûn-tô͘ thiaⁿ-tio̍h Pí-tik tī hia, tsiū tshe nn̄g-ê lâng khì tshuē i, kiû kóng, "Tshiáⁿ lâi guán hia, m̄-thang iân-tshiân." 39 Pí-tik tsiū suî-sî kah in khì, khì kàu-uī tsiū ū-lâng tshuā i khì lâu-tíng ê pâng-king. Tsìng kuáⁿ-hū khiā tī Pí-tik ê sin-piⁿ teh háu, tsiong To-ka kah in tsò-hué ê sî só͘ tsò ê saⁿ-khò͘ hō͘ i khuàⁿ. 40 Pí-tik tsiū kah kûn-tsiòng tshut-khì, kuī lo̍h-khì, kî-tó, ua̍t-tńg-sin tuì sin-si kóng, "Tāi-pí-tāi, khí-lâi." To-ka ê ba̍k-tsiu thí-khui, khuàⁿ-tio̍h Pí-tik, tsiū khí-lâi tsē. 41 Pí-tik tshun tshiú kā i hû khí-lâi, kiò hiah-ê sìn-tô͘ kah kuáⁿ-hū ji̍p-lâi, tsiong koh-ua̍h ê To-ka kau hō͘ in. 42 Tsuân Iok-phàⁿ ê lâng lóng tsai tsit-hāng tāi-tsì, tsiū ū tsin-tsē lâng sìn Tsú. 43 Pí-tik tī Iok-phàⁿ kah tsi̍t-ê tsè-phuê sai-hū Se-bûn tsò-hué tuà tsin-tsē ji̍t.