《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十章

作者 巴克禮普世版小組 2014.05.04

10 Pí-tik kah Ko-nî-liû Tī Kai-sat-lī-a ū tsi̍t-ê lâng, miâ-kiò Ko-nî-liû, tsò Ì-tāi-lī-iâⁿ ê liân-tiúⁿ. 2 I sī kìng-khiân ê lâng, kah tsuân-ke kìng-uì Siōng-Tsú, tsín-tsè tsin-tsē sàn-tshiah ê Iû-thài-lâng, koh siông-siông tuì Siōng-Tsú kî-tó. 3 Ū tsi̍t-ji̍t tsha-put-to ē-po͘ saⁿ-tiám, i tī īⁿ-siōng tiong bîng-bîng khuàⁿ-tio̍h Siōng-Tsú ê thiⁿ-sài ji̍p-lâi, tuì i kóng, "Ko-nî-liû." 4 I lia̍h thiⁿ-sài kim-kim khuàⁿ, hui-siông kiaⁿ-hiâⁿ, kóng, "Tsú ah, sím-mi̍h tāi-tsì?" Thiⁿ-sài kā i kóng, "Lí ê kî-tó, lí ê tsín-tsè í-king lóng tit-tio̍h Siōng-Tsú huaⁿ-hí tsiap-la̍p. 5 Taⁿ lí tio̍h tshe lâng khì Iok-phàⁿ, tshiáⁿ hit-ê kiò-tsò Pí-tik ê Se-bûn lâi. 6 I tuà tī tsè-phuê sai-hū Se-bûn in tau, i ê tshù tī hái-piⁿ." 7 Kah i kóng-uē ê thiⁿ-sài lī-khui liáu-āu, Ko-nî-liû tsiū kiò nn̄g-ê lô͘-po̍k, kah tsi̍t-ê pîng-siông sū-hāu i koh sī kìng-khiân ê ping lâi, 8 tsiong tsiah-ê tāi-tsì lóng kā in huan-hù, tsiū tshe in khì Iok-phàⁿ. 9 Keh-tńg-ji̍t, tsha-put-to ji̍t tiong-tàu, tsit saⁿ-ê lâng kiâⁿ lō͘ beh kàu Iok-phàⁿ ê sî, Pí-tik peh khí-lih tshù-tíng kî-tó. 10 I pak-tó͘ tsin iau, siūⁿ-beh tsia̍h mi̍h-kiāⁿ, lâng tú-tú teh tsún-pī tiong-tàu-tǹg ê sî, Pí-tik suah ji̍p-sîn khì, 11 i khuàⁿ-tio̍h thiⁿ khui, ū tsi̍t-ê tshin-tshiūⁿ sì-kak-thâu pa̍k teh ê tuā-pak pò͘ kàng lo̍h-lâi, tuī tī thô͘-kha, 12 hit lāi-bīn ū tē-bīn ta̍k-tsióng ê tsáu-siù, thâng-thuā kah thiⁿ tiong ê pue-tsiáu. 13 Koh ū siaⁿ tuì i kóng, "Pí-tik, khí-lâi, thâi hiah-ê mi̍h lâi tsia̍h." 14 M̄-koh Pí-tik kóng, "Tsú ah, tshian-bān m̄-thang, in-uī guá m̄-bat tsia̍h tsho͘-sio̍k bô tshing-khì ê mi̍h." 15 Hit-ê siâⁿ tē-jī pái tuì i kóng, "Siōng-Tsú só͘ hō͘ i tshing-khì ê, lí m̄-thang lia̍h tsò tsho͘-sio̍k." 16 Án-ne ê tuì-uē liân-suà saⁿ pái, hit-ê sì-kak-thâu tiàu-teh ê tuā-tè pò͘ suî-sî koh siu tńg-khì thiⁿ-tíng. 17 Pí-tik kám-kak kî-kuài, sim-lāi tú-teh siūⁿ tsit-ê īⁿ-siōng sī sím-mi̍h ì-sù ê sî, hit sî Ko-nî-liû só͘ tshe-lâi ê lâng í-king tshuē-tio̍h Se-bûn ê tshù, lâi khiā tī mn̂g-kháu, 18 tuā-siaⁿ mn̄g kóng, "Ū tsi̍t-ê kiò-tsò Pí-tik ê Se-bûn tuà tī tsia á-bô?" 19 Pí-tik iáu teh siūⁿ tsit-ê īⁿ-siōng ê sî, Sìng-Sîn kā i kóng, "Ū saⁿ-ê lâng lâi beh tshuē lí. 20 Taⁿ tio̍h kuáⁿ-kín lo̍h-khì kah in tsò-hué khì, m̄-thang tiû-tû, sī Guá tshe-phài in lâi-.ê." 21 Pí-tik tsiū lo̍h-khì kìⁿ hiah-ê lâng, kóng, "Guá tsiū-sī lín teh tshuē ê lâng, lín lâi ū sím-mi̍h kuì-sū?" 22 In ìn kóng, "Liân-tiúⁿ Ko-nî-liû tshe-phài guán lâi, i sī gī-lâng koh kìng-uì Siōng-Tsú, siū tsuân-pō͘ ê Iû-thài-lâng tsun-kìng. I tit-tio̍h sìng thiⁿ-sài tsí-sī, lâi tshiáⁿ lí kàu in tau, thang thiaⁿ lí ê káng-tō." 23 Pí-tik tsiū tshiáⁿ in ji̍p-khì tshù-lāi, lâu in tuà hia kuè-mê. Keh-tńg-ji̍t Pí-tik kah in khì, koh ū kuí-nā-ê Iok-phàⁿ ê sìn-tô͘ tuê i khì. 24 Koh keh-tńg-ji̍t, in lâi-kàu Kai-sat-lī-a. Ko-nî-liû í-king tsū-tsi̍p i ê tshin-lâng kah hó pîng-iú, teh thìng-hāu in. 25 Pí-tik ji̍p-khì ê sî, Ko-nî-liû kā i gîng-tsiap, phak tī i ê kha-tsîng kā i pài. 26 M̄-koh Pí-tik khan i khí-lâi, kóng, "Khí-lâi, guá ka-kī mā sī lâng." 27 Pí-tik kah i ná kiâⁿ ná kóng-uē ji̍p-khì tshù-lāi, khuàⁿ-tio̍h tsin-tsē lâng í-king tsū-tsi̍p tī hia. 28 Pí-tik tuì in kóng, "Lín tsai Iû-thài-lâng ê lu̍t-huat kìm-tsí kah pa̍t-tso̍k ê lâng kau-puê lâi-óng, m̄-koh Siōng-Tsú í-king tsí-sī guá, bô-lūn siáⁿ-lâng lóng m̄-thang kóng lâng tsò tsho͘-sio̍k bô tshing-khì. 29 Só͘-í lín tshiáⁿ guá lâi, guá bô the-sî tsiū lâi. Taⁿ tshiáⁿ mn̄g lín tsit-pái tshiáⁿ guá lâi ū sím-mi̍h kuì-sū?" 30 Ko-nî-liû kóng, "Sì ji̍t tsîng tsha-put-to tsit-ê sî, ē-po͘ saⁿ-tiám, guá tī tshù-lāi teh kî-tó, hut-jiân ū tsi̍t-ê lâng, saⁿ-khò͘ kng-iàⁿ-iàⁿ, khiā tī guá ê bīn-tsîng, 31 kóng, 'Ko-nî-liû, Siōng-Tsú í-king thiaⁿ-tio̍h lí ê kî-tó, mā ē-kì-tit lí ê tsín-tsè. 32 Taⁿ lí tio̍h tshe lâng khì Iok-phàⁿ, tshiáⁿ hit-ê kiò-tsò Pí-tik ê Se-bûn lâi.I tuà tī tsè-phuê sai-hū Se-bûn in tau, i ê tshù tī hái-piⁿ.' 33 Guá suî-sî tshe lâng kàu lí hia, taⁿ lí lâi si̍t-tsāi tsin hó. Tsit-má guán lóng tī Siōng-Tsú ê bīn-tsîng, ài beh thiaⁿ Tsú bīng-līng lí beh kā guán kóng ê uē." 34 Pí-tik ê Thuân-tō Pí-tik khui-tshuì, kóng, "Taⁿ guá khak-si̍t tsai, Siōng-Tsú bô īng guā-māu tshú lâng. 35 Bô-lūn tó tsi̍t-ê bîn-tso̍k kìng-uì Siōng-Tsú lâi kiâⁿ gī ê lâng, I lóng huaⁿ-hí tsiap-la̍p. 36 Lín tsai: Siōng-Tsú ū thong-kuè bān-bîn ê Tsú Iâ-so͘ Ki-tok tuì Í-sik-lia̍t-lâng lâi thuân hô-pîng ê hok-im. 37 Lín mā tsai: Iok-hān thuân sé-lé ê tō-lí í-āu, tsit-ê hok-im ū tuì Ka-lī-lī-síng khai-sí thuân kàu Iû-thài tsuân-tē. 38 Tsit-ê hok-im tsiū-sī Ná-sat-li̍k-lâng Iâ-so͘, Siōng-Tsú ū īng Sìng-Sîn kah tsâi-lîng siúⁿ-sù hō͘ I. I tsiū khì ta̍k só͘-tsāi tsò hó-sū, i-hó só͘-ū hō͘ Mô͘-kuí ap-tsè ê lâng, in-uī Siōng-Tsú kah I tông-tsāi. 39 Guán sī I tī Iû-thài-lâng ê tē-hng kah Iâ-lō͘-sat-líng só͘ tsò ê tāi-tsì ê kiàn-tsìng-jîn, in kā I tìng-sí tī si̍p-jī-kè. 40 Kàu tē-saⁿ ji̍t, Siōng-Tsú hō͘ I koh-ua̍h, koh hō͘ I hián-hiān, 41 m̄-sī tuì só͘-ū ê lâng hián-hiān, kan-taⁿ tuì guán tsiah-ê hō͘ Siōng-Tsú kíng-suán lâi tsò kiàn-tsìng ê lâng hián-hiān. Guán tsiah-ê lâng tī I tuì sí-lâng tiong koh-ua̍h liáu-āu kah I tsò-hué lim-tsia̍h. 42 Iâ-so͘ bīng-līng guán thuân hok-im hō͘ só͘-ū ê lâng, tsìng-si̍t I sī Siōng-Tsú só͘ jīm-bīng tsò ua̍h-lâng kah sí-lâng ê sím-phuàⁿ. 43 Tsìng sian-ti mā uī I tsò kiàn-tsìng, tsiū-sī só͘-ū sìn I ê lâng ē-tàng uá-khò I ê miâ tit-tio̍h sià-tsuē." 44 Guā-pang-lâng Niá-siū Sìng-Sîn Pí-tik iáu-teh kóng-uē ê sî, Sìng-Sîn kàng-lîm tī só͘-ū thiaⁿ tō-lí ê lâng. 45 Kah Pí-tik tsò-hué lâi hiah-ê siū kat-lé ê sìn-tô͘ tuā tio̍h-kiaⁿ, in-uī Sìng-Sîn ê siúⁿ-sù mā ū kàng-lîm tī Guā-pang-lâng. 46 In-uī in ū thiaⁿ-tio̍h hiah-ê lâng īng kî-biāu ê khiuⁿ-kháu teh o-ló Siōng-Tsú ê uí-tāi. 47 Pí-tik tsiū ìn kóng, "Hiah-ê lâng í-king kah lán kāng-khuán ū niá-siū Sìng-Sîn, siáⁿ-lâng ē-tàng kìm-tsí in niá-siū tsuí ê sé-lé?" 48 Pí-tik tsiū bīng-līng in hōng Iâ-so͘ Ki-tok ê miâ niá-siū sé-lé. Āu-lâi in tshiáⁿ Pí-tik kah in koh tuà kuí-nā ji̍t.