《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十二章

作者 巴克禮普世版小組 2014.05.18

Hi-lu̍t Pik-hāi Kàu-huē
1 Tsha-put-to hit sî, Hi-lu̍t ông hē-tshiú hām-hāi tsi̍t-kuá kàu-huē ê lâng. 2 Īng to thâi-sí Iok-hān ê hiaⁿ-ko Ngá-kok. 3 I khuàⁿ-tshut tsit-ê tāi-tsì hō͘ Iû-thài-lâng huaⁿ-hí, tsiū koh suà lo̍h-khì lia̍h Pí-tik. Tsit-ê tāi-tsì tī Tû-kàⁿ-tseh ê kî-kan huat-sing. 4 I lia̍h-tio̍h Pí-tik tsiū kā i kuaiⁿ lo̍h-kaⁿ, kau hō͘ sì pan ê ping kò͘-siú, muí pan sì lâng. Hi-lu̍t àn-sǹg beh tī Puâⁿ-kuè-tseh āu tuà i tshut-lâi, tī tsìng-lâng ê bīn-tsîng kā i sím-phuàⁿ. 5 Pí-tik tsiū án-ne hō͘ lâng kuaiⁿ tī kaⁿ-ni̍h, m̄-koh kàu-huē thè i pik-tshiat tuì Siōng-Tsú kî-tó.

Pí-tik Tshut Kaⁿ
6 Hi-lu̍t teh-beh tuà i tshut-lâi sím-phuàⁿ ê tsîng tsi̍t mê, Pí-tik hō͘ lâng īng nn̄g-tiâu thih-liān-á liān-teh, khùn tī nn̄g-ê ping ê tiong-kan, koh ū kíng-uē tī mn̂g-guā teh kò͘-siú. 7 Hut-jiân ū Tsú ê thiⁿ-sài khiā tī piⁿ-á, pâng-lāi ū kng teh tsiò. Thiⁿ-sài tah Pí-tik ê king-thâu kā i kiò-tshéⁿ, kóng, "Kín khí-lâi!" Thih-liān-á tsiū tuì i ê tshiú lak lo̍h-khì. 8 Thiⁿ-sài kā i kóng, "Tio̍h hâ tuà, tshīng uê." Pí-tik tsiàu án-ne tsò. Thiⁿ-sài koh kóng, "Mua lí ê guā-saⁿ, tuè guá lâi!" 9 Pí-tik tsiū tshut-lâi tuè thiⁿ-sài khì. m̄-tsai thiⁿ-sài teh tsò ê sī tsin-si̍t ê, lia̍h-tsò sī khuàⁿ-tio̍h īⁿ-siōng. 10 In king-kuè kò͘-siú uē-ping ê tē-it kuan kah tē-jī kuan, lâi-kàu ji̍p-siâⁿ ê thih-mn̂g hit-ê mn̂g tsū-tōng khui. In tsiū tshut-khì, kiâⁿ kuè tsi̍t-tiâu ke, thiⁿ-sài suî-sî lī-khui Pí-tik. 11 Pí-tik tshéⁿ khí-lâi, kóng, "Taⁿ guá tsin-tsiàⁿ tsai, Tsú tshe I ê thiⁿ-sài kiù guá thuat-lī Hi-lu̍t ê tshiú kah Iû-thài-lâng tsuân-pō͘ ê kè-bô͘." 12 Pí-tik siūⁿ tshing-tshó tsit-ê tāi-tsì liáu-āu, tsiū khì mā kiò-tsò Má-khó ê Iok-hān ê lāu-bú Má-lī-a ê tshù. Tī hia ū tsin-tsē lâng tsū-tsi̍p teh kî-tó. 13 Pí-tik phah guā-kháu-mn̂g ê sî, ū tsi̍t-ê miâ-kiò Lô-tāi ê tsa-bó͘-gín-á tshut-lâi thiaⁿ khuàⁿ sī sím-mi̍h lâng. 14 I jīn-tshut Pí-tik ê siaⁿ, huaⁿ-hí kah bē-kò͘-tit khui mn̂g, tsáu ji̍p-khì pò-kò kóng Pí-tik khiā tī mn̂g-kha-kháu. 15 M̄-koh in tuì i kóng, "Lí teh khí-siáu o͘-pe̍h-kóng!" Tsa-bó͘-gín-á kian-tshî kóng ū-iáⁿ. In tsiū kóng, "Án-ne it-tīng sī Pí-tik ê thiⁿ-sài." 16 Pí-tik koh it-ti̍t phah mn̂g. In khui mn̂g khuàⁿ-tio̍h Pí-tik, tsin tio̍h-kiaⁿ koh kî-kuài. 17 Pí-tik iô tshiú kiò in mài tshut siaⁿ, tsiū kā in suat-bîng Tsú án-tsuáⁿ tshuā i tshut kaⁿ. Koh kóng, "Tio̍h tsiong tsiah-ê tāi-tsì kā Ngá-kok kah tsìng sìn-tô͘ kóng." Kóng suah tsiū lī-khui khì pa̍t só͘-tsāi. 18 Kàu thiⁿ kng ê sî, khàn-siú ê ping-a m̄-tsai Pí-tik tó-uī khì, tsiū luān-tshau-tshau. 19 Hi-lu̍t phài lâng khì tshuē, m̄-koh lóng tshuē bô. I tsiū sím-mn̄g kò͘-siú ê ping-á, kiat-kó bīng-līng kā in thua tshut-khì thâi. Tsit-ê tāi-tsì liáu-āu, Hi-lu̍t tsiū lī-khui Iû-thài, lo̍h-khì Kai-sat-lī-a tuà.

Hi-lu̍t ê Sí-bông
20 Hi-lu̍t tuì Tshui-lô kah Se-tùn ê lâng hui-siông siū-khì. Hiah-ê lâng liân-ha̍p phài lâng khì kìⁿ Hi-lu̍t, tsiū pài-thok ông-kiong ê tsóng-kuán Pik-lah-sū-to͘ khì kiû hô, in-uī in ê niû-si̍t tio̍h tuì ông kuán-hat ê tē-khu lâi kiòng-ìng. 21 Tī iok-tīng ê ji̍t-tsí, Hi-lu̍t tshīng ông-ho̍k tsē tī ông-uī, tuì jîn-bîn ián-káng. 22 Jîn-bîn huah: "Tse sī Siōng-Tsú ê siaⁿ, m̄-sī lâng ê siaⁿ." 23 Hi-lu̍t bô kui îng-kng hō͘ Siōng-Tsú, Tsú ê thiⁿ-sài suî-sî kā i phah-tó. I tsiū hō͘ thâng kā sí-khì. 24 M̄-koh Siōng-Tsú ê tō-lí jú thuân jú khuah, jú hing-ōng. 25 Pa-ná-pa kah Sò-lô uân-sîng in ê jīm-bū liáu-āu, tsiū tuì Iâ-lō͘-sat-líng tńg-khì, tshuā kiò-tsò Má-khó ê Iok-hān tsò-hué khì.