《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十三章

作者 巴克禮普世版小組 2014.05.25

Sìng-Sîn Tsí-phài Pa-ná-pa kah Sò-lô
1 Tī An-thê-o ê kàu-huē ū kuí-nā-ê sian-ti kah kàu-su, tsiū-sī Pa-ná-pa, kah kiò-tsò Nî-kiat ê Se-biān, Kó͘-lī-nāi-lâng Lō͘-kiû, kah hun-hong ê kun-ông Hi-lu̍t tsò-hué tuā-hān ê Má-liām, í-ki̍p Sò-lô. 2 In teh kìng-pài Tsú kìm-tsia̍h ê sî, Sìng-Sîn kóng, "Tio̍h uī Guá tshe-phài Pa-ná-pa kah Sò-lô, khì tsò Guá ho͘-tiàu in khì tsò ê kang-tsok. 3 In kìm-tsia̍h kî-tó liáu-āu, kā Pa-ná-pa kah Sò-lô huāⁿ-tshiú, tshe-phài in tshut-khì.

Tī Ku-pí-lō͘
4 Pa-ná-pa kah Sò-lô siū Sìng-Sîn tshe-phài, tsiū lo̍h-khì Se-liû-ki, tuì hia tsē tsûn khì Ku-pí-lō͘. 5 In kàu Sat-lia̍p-bí, tsiū tī Iû-thài-lâng tsiah-ê huē-tn̂g thuân Siōng-Tsú ê tō-lí, kiò-tsò Má-khó ê Iok-hān mā khì kā in pang-bâng. 6 In kiâⁿ-phiàn tsuân tó lâi-kàu Phàⁿ-hut, tī hia tú-tio̍h tsi̍t-ê kiâⁿ siâ-su̍t ê lâng, sī Iû-thài-lâng ê ké-sian-ti, miâ-kiò Pa-Iâ-so͘. 7 I kah tsóng-tok Sū-kiû Pó-lô ū kau-puê, tsóng-tok sī tshong-bîng ê lâng, i tshiáⁿ Pa-ná-pa kah Sò-lô lâi, ài-beh tuì in thiaⁿ Siōng-Tsú ê tō-lí. 8 M̄-koh hit-ê kiâⁿ siâ-su̍t ê Í-lū-má(Hi-lia̍p-uē ê ì-sù tsiū-sī "kiâⁿ siâ-su̍t ê lâng"), huán-tuì in nn̄g lâng, ài-beh tsó͘-tòng tsóng-tok tsiap-siū tsit-ê sìn-gióng. 9 Tsit sî Sò-lô(mā kiò-tsò Pó-lô) hō͘ Sìng-Sîn tshiong-muá, gîn hit-ê Í-lū-má, kóng, 10 "Lí tsit-ê Mô͘-kuí-á-kiáⁿ, lí sī it-tshè kong-gī ê tuì-ti̍k, tshiong-muá ta̍k-tsióng ê khuí-khiat kah siâ-ok, ná-ē ài-beh niú-khiok Tsú ê tsin-lí? 11 Taⁿ lí khuàⁿ, Tsú beh kā lí hîng-hua̍t, lí ē tsheⁿ-mê, tsiām-sî bē khuàⁿ-kìⁿ ji̍t-kng." I ê ba̍k-tsiu suî-sî hō͘ o͘-bū tà-teh,lóng khuàⁿ bô, sì-kè kiû lâng kā i khan. 12 Tsóng-tok khuàⁿ-tio̍h só͘ huat-sing ê tāi-tsì tsiū sìn, tuì Tsú ê kà-sī kám-kak tsin kî-kuài.

Tī Pí-se-tí ê An-thê-o
13 Pó-lô kah tâng-phuāⁿ tuì Phàⁿ-hut khui tsûn, kàu Pông-hui-lī-a ê Pia̍t-ka. Kiò-tsò Má-khó ê Iok-hān lī-khui in, tńg-khì Iâ-lō͘-sat-líng. 14 In tuì Pia̍t-ka kè-sio̍k kiâⁿ, lâi-kàu Pí-se-tí ê An-thê-o. Tī An-hioh-ji̍t, in ji̍p-khì huē-tn̂g, tsē lo̍h-lâi. 15 Lu̍t-huat kah sian-ti ê tsheh tha̍k liáu-āu, huē-tn̂g ê tsú-kuán tshe lâng lâi kā in kóng, "Hiaⁿ-tī tsí-muē ah, lín nā ū khuàn-bián tāi-ke ê uē, tshiáⁿ kóng." 16 Pó-lô khiā khí-lâi, pí tshiú-sè, kóng, "Kok-uī Í-sik-lia̍t-lâng kah kìng-uì Siōng-Tsú ê tsìng-lâng, tshiáⁿ thiaⁿ. 17 Tsit-ê Í-sik-lia̍t jîn-bîn ê Siōng-Tsú kíng-suán lán ê tsó͘-sian, tī in kià-ki Ai-ki̍p ê sî, hō͘ in tsiâⁿ-tsò tuā ê bîn-tso̍k, koh īng tuā-kuân-lîng ê tshiú tshuā in tshut Ai-ki̍p. 18 Koh tī khòng-iá khuan-iông in sì-tsa̍p nî kú. 19 Siōng-Tsú huí-bia̍t Ka-lâm tē-khu tshit-ê bîn-tso̍k liáu-āu, tsiū tsiong hit-ê thó͘-tē pun hō͘ in tsò sán-gia̍p, tsha-put-to ū sì-pah gō͘-tsa̍p nî kú. 20 "Tsiah-ê tāi-tsì liáu-āu, Siōng-Tsú uī in siat-li̍p sū-su, it-ti̍t kàu Sat-bó-ní tsò sian-ti ê sî. 21 Āu-lâi Í-sik-lia̍t jîn-bîn iau-kiû ài ū tsi̍t-ê ông. Siōng-Tsú tsiū tuì Piān-ngá-bín tsi-tso̍k suán-tshut Ki-sū ê kiáⁿ Sò-lô, hō͘ i tsò ông sì-tsa̍p nî kú. 22 Āu-lâi Siōng-Tsú huè-tiāu Sò-lô ê ông-uī, tsiū siat-li̍p Tāi-pi̍t tsò in ê ông. Kuan-hē Tāi-pi̍t, Siōng-Tsú ū án-ne kóng, 'Guá tshuē-tio̍h Iâ-se ê kiáⁿ Tāi-pi̍t, i sī ha̍h Guá ê sim-ì, ta̍k-hāng tāi-tsì lóng tsun-tsiàu Guá ê tsí-ì.'( tsù: Tg SBS 13:14) 23 Siōng-Tsú tsiàu I só͘ ìng-ín, tuì Tāi-pi̍t ê kiáⁿ-sun, kā Í-sik-lia̍t-lâng siat-li̍p tsi̍t-ê Kiù-Tsú, tsiū-sī Iâ-so͘. 24 Iâ-so͘ lâi-lîm í-tsîng, Iok-hān tāi-sing tuì Í-sik-lia̍t-lâng thuân-tō, kiò in tio̍h hué-kái lâi niá-siū sé-lé. 25 Iok-hān teh-beh uân-sîng i ê kang-tsok ê sî, tuì tsìng-lâng kóng, 'Lín siūⁿ-kóng guá sī siáⁿ-lâng? guá m̄-sī Ki-tok, m̄-koh ū tsi̍t-uī tuè tī guá āu-bīn beh lâi-.ê, guá liân kā I tháu ê-tuà to bē-kham-tit.' 26 "Kok-uī hiaⁿ-tī ah, A-pik-la̍h-hán ê kiáⁿ-sun kah lín tiong-kan kìng-uì Siōng-Tsú ê lâng, tsit-ê tsín-kiù ê sìn-sit í-king ū thuân hooī lán à. 27 In-uī tuà tī Iâ-lō͘-sat-líng ê lâng kah in ê kuaⁿ-tiúⁿ m̄-bat I, mā m̄-bat ta̍k-ê An-hioh-ji̍t só͘ tha̍k sian-ti ê uē, tsiah kā I tīng-tsuē, tse tú ìng-giām sian-ti ê ī-giân. 28 Sui-jiân in tshâ bô kā I tīng sí-tsuē ê lí-iû, iáu-koh iau-kiû Pí-lia̍p-to kā I tshù sí-hîng. 29 Sìng-king só͘ kì-tsài kuan-hē Iâ-so͘ ê uē uân-tsuân ìng-giām, in tsiū tuì si̍p-jī-kè-tíng kā I siu lo̍h-lâi, hē tī bōng-lāi. 30 M̄-koh Siōng-Tsú hō͘ I tuì sí-lâng tiong koh-ua̍h. 31 Tī kuí-nā-ji̍t tiong-kan, koh-ua̍h ê Iâ-so͘ hián-hiān hō͘ hiah-ê tuì Ka-lī-lī-síng kah I tsiūⁿ Iâ-lō͘-sat-líng ê lâng khuàⁿ-kìⁿ. Taⁿ tsiah-ê lâng ū tuì bîn-tsióng tsò Iâ-so͘ ê kiàn-tsìng-jîn. 32 Guán tsiong Siōng-Tsú ìng-ín lán tsó͘-sian ê hok-im thuân hō͘ lin, 33 In-uī Siōng-Tsú ū hō͘ Iâ-so͘ koh-ua̍h, tsit-ê í-king ū tuì lán tsiah-ê tsò kiáⁿ-sun ê ìng-giām, tú tshin-tshiūⁿ Si-phian tē-jī phiⁿ só͘ kì-tsài: Lí tsiū-sī Guá ê Kiáⁿ, Guá kin-á-ji̍t seⁿ Lí.'( tsù: SPh 2:7) 34 Kuan-hē hō͘ Iâ-so͘ tuì sí-lâng tiong koh-ua̍h, bô koh hiú-nuā ê tāi-tsì, Siōng-Tsú ū án-ne kóng, 'Guá beh īng Tāi-pi̍t sìng koh si̍t-tsāi ê un-tián sù hō͘ lín.'( tsù: ISA 55:3) 35 Tī Si-phian pa̍t phiⁿ mā ū án-ne kóng, 'Lí bô beh hō͘ Lí ê Sìng-tsiá hiú-nuā.'( tsù: SPh 16:10) 36 Tāi-pi̍t tsāi-seⁿ ê sî ū tsun-hîng Siōng-Tsú ê tsí-ì. I sí liáu-āu, bâi-tsòng tī tsó͘-sian ê piⁿ-á, mā hiú-nuā khì. 37 M̄-koh Siōng-Tsú só͘ hō͘ I koh-ua̍h ê Hit-uī bô hiú-nuā. 38 Só͘-í kok-uī hiaⁿ-tī ah, án-ne lín ing-kai tsai, sià-tsuē ê tō-lí sī tuì tsit-uī Iâ-so͘ thuân hō͘ lín. 39 Lín khò Mô͘-se ê lu̍t-huat, bē-tàng hō͘ lín tit-tio̍h sià-tsuē, m̄-koh só͘-ū sìn-khò Iâ-so͘ ê lâng lóng ē tit-tio̍h sià-tsuē. 40 Só͘-í lín tio̍h kín-sīn, tsiah bián-tit sian-ti só͘ ī-giân ê lîm-kàu lín. 41 Sian-ti ê uē kóng, 'Biáu-sī Siōng-Tsú ê lâng ah, lín tio̍h khuàⁿ, tio̍h-kiaⁿ, lâi bia̍t-bông, in-uī tng lín ê sè-tāi, Guá só͘ tsò ê tāi-tsì, sui-jiân ū-lâng kā lín suat-bîng, lín mā m̄ sìn."( tsù: HPK 1:5) 42 Pó-lô kah Pa-ná-pa tuì huē-tn̂g tshut-khì ê sî, tsìng lâng tshiáⁿ in tī koh-lâi ê An-hioh-ji̍t lâi kóng tsiah-ê tō-lí hō͘ in thiaⁿ. 43 Suàⁿ-huē liáu-āu, Iû-thài-lâng kah kái-tsong ji̍p Iû-thài-kàu kìng-khiân ê lâng, tsin-tsē tuè Pó-lô kah Pa-ná-pa tshut-khì. Tsit nn̄g-ê sù-tô͘ kah in kóng-uē, khuàn-bián in tio̍h khò Siōng-Tsú ê un-tián lâi sing-ua̍h. 44 Koh lo̍h-khì ê An-hioh-ji̍t, tsuân-siâⁿ ê lâng lóng tsū-tsi̍p lâi thiaⁿ Siōng-Tsú ê tō-lí. 45 M̄-koh Iû-thài-lâng khuàⁿ-tio̍h lâng hiah-tsē, tsiū muá-sim uàn-tò͘, huán-pok Pó-lô só͘ kóng ê tō-lí, koh kā i huí-pòng. 46 Pó-lô kah Pa-ná-pa put-kuán, tian-tó koh-khah hó-táⁿ kóng, "Siōng-Tsú ê tō-lí sing thuân hō͘ lín, lín kìng-jiân kī-tsua̍t, siūⁿ-kóng lín ka-kī bē kham-tit tit-tio̍h íng-uán ê ua̍h-miā, só͘-í guán tsiah tsuán ǹg Guā-pang-lâng. 47 In-uī Tsú bat án-ne bīng-līng guán, kóng, 'Guá í-king siat-li̍p lí tsò guā-pang ê kng, Hō͘ lí tsiong Guá ê tsín-kiù tuà khì-kàu thiⁿ-piⁿ-hái-kak.'"( tsù: ISA 49:6) 48 Guā-pang lâng thiaⁿ-tio̍h tsiah-ê uē lóng tsin huaⁿ-hí, o-ló Siōng-Tsú ê tō-lí. Só͘-ū siū Siōng-Tsú kíng-suán thang tit-tio̍h íng-uán ua̍h-miā ê lâng lóng tsiâⁿ-tsò sìn-tô͘. 49 Tsiū án-ne, Tsú ê tō-lí thuân khì-kàu hit tē-hng ê ta̍k só͘-tsāi. 50 M̄-koh Iû-thài-lâng siàn-tōng kìng-khiân tsun-kuì ê hū-jîn-lâng kah siâⁿ-lāi ê thâu-lâng lâi pik-hāi Pó-lô kah Pa-ná-pa, tsiong in kuáⁿ-tshut hit só͘-tsāi. 51 In nn̄g lâng tī kûn-tsiòng ê bīn-tsîng puāⁿ kha-té ê thô͘-hún lâi piáu-sī hùn-khài, tsiū khì Í-ko-liām. 52 Bûn-tô͘ muá-sim huaⁿ-hí, koh hō͘ Sìng-Sîn tshiong-muá.