《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十五章

作者 巴克禮普世版小組 2014.06.08

Iâ-lō͘-sat-líng Huē-gī
1 Ū kuí-nā-ê lâng tuì Iû-thài lo̍h-lâi An-thê-o teh kà-sī sìn-tô͘, kóng, "Nā bô tsun-siú Mô͘-se ê lu̍t-lē lâi siū kat-lé tsiū bē tit-tio̍h kiù." 2 Pó-lô kah Pa-ná-pa hām in ū tuā tsing-lūn, tāi-ke tsiū phài Pó-lô kah Pa-ná-pa í-ki̍p in tiong-kan līng-guā kuí-nā-ê lâng tsiūⁿ Iâ-lō͘-sat-líng khì kìⁿ sù-tô͘ kah tiúⁿ-ló, tsiong só͘ piān-lūn ê tāi-tsì kah in thó-lūn. 3 Kàu-huē ê lâng sàng in tshut-huat. In tsiū king-kuè Hui-nî-ki kah Sat-má-lī-a, kóng-khí Guā-pang-lâng ê kui-Tsú ê tāi-tsì, hō͘ tsìng huē-iú thiaⁿ-liáu tsin huaⁿ-hí. 4 In lâi-kàu Iâ-lō͘-sat-líng, siū-tio̍h kàu-huē kah sù-tô͘ í-ki̍p tiúⁿ-ló ê huan-gîng, in tsiū kóng-khí Siōng-Tsú kah in tông-tsāi só͘-tsò it-tshè ê tāi-tsì. 5 M̄-koh ū kuí-nā-ê sìn-tô͘ sio̍k Huat-lī-sài-phài-tóng ê khí-lâi kóng, "Tik-khak tio̍h kā hiah-ê Guā-pang-lâng ê sìn-tô͘ kiâⁿ kat-lé, bīng-līng in tio̍h tsun-siú Mô͘-se ê lu̍t-huat." 6 Sù-tô͘ kah tiúⁿ-ló tsū-tsi̍p tsham-siông tsit-hāng tāi-tsì. 7 Tsham-siông tsin kú liáu-āu, Pí-tik tsiū khí-lâi tuì in kóng, "Kok-uī hiaⁿ-tī ah, lín lóng tsai, Siōng-Tsú tsá to̍h tī lín tiong-kan kíng-suán guá, hō͘ Guā-pang-lâng tuì guá ê tshuì thiaⁿ-tio̍h hok-im ê tō-lí lâi sìn. 8 Tsai lâng lāi-sim ê Siōng-Tsú kah tuì-thāi lán kāng-khuán, ū siúⁿ-sù Sìng-Sîn hō͘ Guā-pang-lâng, lâi tsìng-bîng Siōng-Tsú ū tsiap-la̍p in. 9 Tuì sìn, Siōng-Tsú īng Sìng-Sîn kā in ê sim sé tshing-khì, tuì-thāi lán kah in lóng bô tsha-pia̍t. 10 Kì-jiân sī án-ne, lín ná-ē iáu-teh tshì-thàm Siōng-Tsú, īng lán ê tsó͘-sian kah lán só͘ taⁿ bē khí ê tàⁿ kuà tī hiah-ê bûn-tô͘ ê king-thâu-tíng? 11 Lán siong-sìn tuì Tsú Iâ-so͘ ê un-tián lâi tit-kiù, in mā sī án-ne teh sìn." 12 Tāi-ke lóng tsīng-tsīng thiaⁿ Pa-ná-pa kah Pó-lô kóng-khí Siōng-Tsú īng in tī Guā-pang-lâng tiong-kan só͘ kiâⁿ it-tshè ê sîn-jiah kî-sū. 13 In kóng suah, Ngá-kok tsiū ìn kóng, "Kok-uī hiaⁿ-tī ah, tshiáⁿ thiaⁿ guá kóng: 14 Tú-tsiah Se-biān kóng-khí Siōng-Tsú khí-thâu án-tsuáⁿ kuàn-kò͘ Guā-pang-lâng, tuì in tiong-kan kíng-suán lâng lâi kui I ka-kī. 15 Sian-ti mā ū kóng-khí kah tsit-ê tāi-tsì kāng-khuán ì-sù ê uē. 16 Tsiàu Sìng-king kì-tsài, Siōng-Tsú kóng, 'Tsiah-ê tāi-tsì liáu-āu, Guá beh tò tńg-lâi, Tiōng-kiàn Tāi-pi̍t tó-lo̍h ê pò͘-pêⁿ, Guá beh koh kā hiah-ê tó-huāi ê khí-tsō, tīng-sin kiàn-li̍p khí-lâi, 17 thang hō͘ tshun lo̍h-lâi ê lâng, kah só͘-ū hōng Guá ê miâ ê Guā-pang-lâng, lóng lâi tshuē-kiû Siōng-Tsú.( tsù: AMS 9:11-12) 18 Hit-uī tuì sè-kan ê khí-thâu to̍h hián-bîng tsiah-ê tāi-tsì ê Siōng-Tsú án-ne kóng-.ê." 19 "Só͘-í guá siūⁿ-kóng Guā-pang-lâng kui Tsú ê lâng, lán m̄-thang kā in uî-lân. 20 M̄-koh tio̍h siá phue huan-hù in m̄-thang tsia̍h pài ngó͘-siōng bô-tshing-khì ê mi̍h, m̄-thang îm-luān, m̄-thang tsia̍h ni̍h-sí ê mi̍h kah hueh. 21 In-uī tuì tsá í-lâi tī ta̍k-ê siâⁿ-tshī ū thuân-káng Mô͘-se ê lu̍t-huat, tsiū-sī ta̍k-ê An-hioh-ji̍t tī huē-tn̂g só͘ tha̍k-.ê."

Siá Hō͘ Guā-pang Sìn-tô͘ ê Phue
22 Hit sî, sù-tô͘, tiúⁿ-ló kah tsuân kàu-huē kuat-tīng tuì in tiong-kan kíng-suán lâng, tsiū-sī kiò-tsò Pa-sat-pa ê Iû-tāi kah Se-lah. Tsit nn̄g lâng sī hiaⁿ-tī tiong ê kia̍t-tshut jîn-bu̍t. 23 In tsiū tshe-phài tsit nn̄g lâng kah Pó-lô í-ki̍p Pa-ná-pa tsò-hué khì An-thê-o. Kau-tài in tuà khì ê phue án-ne kóng, "Guán tsiah-ê tsò sù-tô͘ kah tiúⁿ-ló ê hiaⁿ-tī, kā tuà tī An-thê-o, Sū-lī-a, Ki-lī-ka ê hiaⁿ-tī tshíng-an! 24 Thiaⁿ-kóng kuí-nā-ê lâng tuì guán tsia tshut-khì, īng m̄-sī guán kau-tài ê uē kā lín kiáu-jiáu, jiáu-luān lín ê sim. 25 Uī-tio̍h án-ne, guán tâng-sim ha̍p-ì kuat-tīng kíng-suán lâng, tshe-phài in kah guán só͘ thiàⁿ ê Pa-ná-pa í-ki̍p Pó-lô khì lín hia. 26 Tsit nn̄g lâng uī-tio̍h lán ê Tsú Iâ-so͘ Ki-tok ê miâ, kam-guān hi-sing sèⁿ-miā. 27 Só͘-í guán tshe-phài Iû-tāi kah Se-lah, in ē tuì lín kóng-khí kah phue-lāi só͘ siá kāng-khuán ê tāi-tsì. 28 In-uī Sìng-Sîn kah guán kuat-tīng, tû-liáu tsit kuí hāng iàu-kín ê tāi-tsì í-guā, bô ài ke-thiⁿ tāng-tàⁿ tī lín ê sìn-gióng sing-ua̍h. 29 Tsiū-sī m̄-thang tsia̍h tsè ngó͘-siōng ê mi̍h, m̄-thang tsia̍h ni̍h-sí ê tsing-seⁿ kah hueh, m̄-thang îm-luān. Lín nā bô huān-tio̍h tsiah-ê kài-bīng tsiū hó. Guān lín pîng-an." 30 In hōng tshe-phài tsiū lo̍h-khì An-thê-o. Tī hia tsū-tsi̍p tsuân-thé sìn-tô͘, tsiong phue kau hō͘ in. 31 Tsìng-lâng tha̍k-liáu hit tiuⁿ phue, siū-tio̍h kó͘-lē tsiū tuā huaⁿ-hí. 32 Iû-tāi kah Se-lah pún-sin mā sī sian-ti, in īng tsin-tsē uē an-uì sìn-tô͘ lâi kian-kò͘ in ê sìn-sim. 33 In tuà hia ū tsi̍t-tuāⁿ sî-kan liáu-āu, siū-tio̍h sìn-tô͘ ê huan-sàng, pîng-an tńg-khì tshe-phài in lâi ê lâng hia. 34 M̄-koh Se-lah kuat-tīng lâu tuà hia.(tsù: Pa-khik-lé Sìng-king ê tshau-pún bô tsit tsat.) 35 Pó-lô kah Pa-ná-pa kè-sio̍k tī An-thê-o, kah tsin-tsē kî-tha ê lâng tsò-hué kà-sī lâng, thuân Siōng-Tsú hok-im ê tō-lí.

Pó-lô kah Pa-ná-pa Hun-khui
36 Kuè kuí-nā ji̍t āu, Pó-lô tuì Pa-ná-pa kóng, "Lán tio̍h koh khì tsîng thuân Siōng-Tsú ê tō-lí ê siâⁿ-tshī, thàm-hóng sìn-tô͘, khuàⁿ in ê tsîng-hîng." 37 Pa-ná-pa ài beh tuà kiò-tsò Má-khó ê Iok-hān tsò-hué khì. 38 M̄-koh Pó-lô siūⁿ-kóng án-ne bô sik-ha̍p, in-uī tsit-ê Iok-hān tī Pông-hui-lī-a bat lī-khui in, bô kè-sio̍k kah in tsò-kang. 39 Nn̄g lâng ì-kiàn ki̍k-li̍k tshiong-tu̍t, tì-kàu tio̍h pun-khui. Pa-ná-pa tuà Má-khó tsē tsûn khì Ku-pí-lō͘; 40 Pó-lô kíng Se-lah tsò-hué khì, sìn-tô͘ tsiong in kau-thok tī Tsú ê un-tián. 41 In kā Sū-lī-a kah Ki-lī-ka kiâⁿ thàu-thàu, kian-kò͘ ta̍k kàu-huē ê sìn-sim.