《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十四章

作者 巴克禮普世版小組 2014.06.01

Tī Í-ko-liām
1 Pó-lô kah Pa-ná-pa tī Í-ko-liām tsò-hué ji̍p-khì Iû-thài-lâng ê huē-tn̂g káng-tō. Kiat-kó ū tsin-tsē Iû-thài-lâng kah Hi-lia̍p-lâng lâi sìn. 2 M̄-koh hiah-ê m̄-sìn ê Iû-thài-lâng siàn-tōng Guā-pang-lâng, hō͘ in uàn-hūn sìn-tô͘. 3 Tsit nn̄g-uī sù-tô͘ tsiū tiàm hia tsin kú, uá-khò Tsú hó-táⁿ suan-káng hok-im. Tsú siúⁿ-sù in ū lîng-li̍k kiâⁿ sîn-jiah kî-sū, lâi kiàn-tsìng in só͘ thuân un-tián ê tō-lí. 4 Siâⁿ-lāi ê kûn-tsiòng tsū-án-ne hun-tsò nn̄g-pîng, ū-ê tuè Iû-thài-lâng, ū-ê tuè sù-tô͘. 5 Hit sî, Guā-pang-lâng, Iû-thài-lâng, kah in ê kuaⁿ-tiúⁿ kè-bô͘ lîng-jio̍k sù-tô͘, īng tsio̍h-thâu kā in tìm. 6 Sù-tô͘ tsai tsit-ê tāi-tsì, tsiū tô-tsáu khì Lū-ko-nî ê Lō͘-su-tik kah Ti̍k-pì nn̄g-ê siâⁿ, í-ki̍p tsiu-uî ê tē-hng, 7 tī hia kè-sio̍k thuân hok-im.

Tī Lō͘-su-tik kah Ti̍k-pì
8 Tī Lō͘-su-tik ū tsi̍t-ê pái-kha-.ê, put-sî tsē-teh, sī tuì tshut-sì tsiū nńg-kha, lóng bē kiâⁿ. 9 I lâi thiaⁿ Pó-lô kóng tō-lí, Pó-lô lia̍h i kim-kim khuàⁿ, khuàⁿ-tio̍h i ū sìn-sim thang tit-tio̍h hó, 10 tsiū tuā-siaⁿ kóng, "Khiā khí-lâi, siang-kha khiā hō͘ ti̍t-ti̍t. Hit-ê lâng tsiū thiàu khí-lâi kiâⁿ. 11 Tsìng-lâng khuàⁿ-tio̍h Pó-lô só͘ tsò, tsiū īng Lū-ko-nî ê khiuⁿ-kháu tuā-siaⁿ kóng, "Ū sîn-bîng huà-sin tsò lâng, lîm-kàu lán tiong-kan à." 12 In tshing-ho͘ Pa-ná-pa tsò "Tiū-su"(tsù:Hi-lia̍p sîn-uē tiong ê tsìng-sîn tsi ông, Zeus), tshing-ho͘ Pó-lô tsò "Hi-ní-bí"(tsù:Hi-lia̍p sîn-uē tiong kháu-tsâi tsi sîn, Hermes), in-uī i sī tsú-káng-tsiá. 13 Siâⁿ-guā ū tsi̍t-ê Tiū-su-biō ê tsè-si khan gû-á, the̍h hue-khuân, lâi-kàu siâⁿ-mn̂g-kháu, beh kah tsìng-lâng tsò-hué hiàn-tsè. 14 Sù-tô͘ Pa-ná-pa kah Pó-lô thiaⁿ-tio̍h, tsiū thiah-li̍h saⁿ, tsông ji̍p-khì kûn-tsiòng lāi-bīn, tuā-siaⁿ huah: 15 "Lín tāi-ke ná-ē án-ne tsò? Guán mā sī lâng, kah lín lóng kāng-khuán. Guán lâi tsia thuân hok-im, sī beh hō͘ lín lī-khui tsiah-ê hi-ké ê ngó͘-siōng, lâi kui ǹg Hit-uī íng-uán-ua̍h ê Siōng-Tsú, I sī thiⁿ, tē, hái, kah kî-tiong bān-bu̍t ê tshòng-tsō-tsiá.( tsù: SPh 146:6) 16 Siōng-Tsú tsá-tsîng, iông-ín bān-bîn kiâⁿ in ka-kī ê lō͘. 17 M̄-koh Siōng-Tsú it-ti̍t thong-kuè só͘ tsò ê hó-sū lâi hián-bîng pún-sin, tsiū-sī tuì thiⁿ lo̍h-hō͘, tsiàu-sî siu-sîng, hō͘ lín tsia̍h-mi̍h tshiong-tsiok koh sim-lāi tshiong-muá huaⁿ-hí. 18 Sù-tô͘ kóng tsiah-ê uē tsiah lím-lím-á tsó͘-tsí kûn-tsiòng tuì in tsè-hiàn. 19 M̄-koh ū-kuá tuì An-thê-o Í-ko-liām lâi ê Iû-thài-lâng siàn-tōng kûn-tsiòng īng tsio̍h-thâu tìm Pó-lô, siūⁿ-kóng i í-king sí, tsiū kā i thua tshut-khì siâⁿ-guā. 20 Bûn-tô͘ uî uá-lâi, i tsiū khí-lâi ji̍p-khì siâⁿ-lāi. Keh-tńg-ji̍t i kah Pa-ná-pa lī-khui hia khì Ti̍k-pì.

Tńg-khì Sū-lī-a-síng ê An-thê-o
21 Pó-lô kah Pa-ná-pa tī Ti̍k-pì thuân hok-im, hō͘ tsin-tsē lâng tsiâⁿ-tsò bûn-tô͘. Āu-lâi in tńg-khì Lō͘-su-tik, Í-ko-liām kah An-thê-o, 22 Iân-lō͘ kian-kò͘ sìn-tô͘ ê sìn-sim, kó͘-lē in kian-tshî sìn-sim, koh kóng, "Lán tio̍h tuì tsin-tsē kan-khó͘ lâi tsìn-ji̍p Siōng-Tsú ê Kok-tō͘." 23 In nn̄g-lâng tī ta̍k-ê kàu-huē kā in siat-li̍p tiúⁿ-ló, kìm-tsia̍h kî-tó, tsiong in kau-thok tī in só͘ sìn ê Tsú. 24 In king-kuè Pí-se-tí lâi-kàu Pông-hui-lī-a. 25 In tī Pia̍t-ka kóng tō-lí liáu-āu, tsiū lo̍h-khì A-tāi-lī. 26 In tuì hia tsē tsûn lâi-kàu An-thê-o, tsiū-sī in bat tī hia siū kau-thok tī Siōng-Tsú ê un-tián, lâi uân-sîng bí-hó ê kang. 27 In tsi̍t-ē kàu-uī tsiū tsū-tsi̍p kàu-huē ê sìn-tô͘, tsiong in kah Siōng-Tsú tâng-kang só͘ tsò it-tshè í-ki̍p Siōng-Tsú kā Guā-pang-lâng khui sìn-gióng ê mn̂g ê tāi-tsì lóng kā in pò-kò. 28 Āu-lâi in kah bûn-tô͘ tsò-hué tuà tsám-jiân-á kú.