《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十七章

作者 巴克禮普世版小組 2014.06.22

Tī Thiap-sat-lō͘-nî-ka
1 Pó-lô kah Se-lah king-kuè Àm-hui-pho-lí, A-pho-lô-nî-a, lâi-kàu Thiap-sat-lō͘-nî-ka, tī hia ū Iû-thài-lâng ê huē-tn̂g. 2 Pó-lô tsiàu i pîng-siông ê si̍p-kuàn ji̍p-khì huē-tn̂g, liân-suà saⁿ-ê An-hioh-ji̍t, ín-iōng Sìng-king kah in piān-lūn. 3 I káng-kái koh tsìng-bîng Ki-tok it-tīng tio̍h siū-hāi, jiân-āu tuì sí-lâng tiong koh-ua̍h. I koh kóng, "Guá tuì lín suan-iông ê Iâ-so͘ tsiū-sī Ki-tok." 4 In tiong-kan ū-lâng siū kám-tōng lâi sìn, tsiū lâi tuè Pó-lô kah Se-lah. Kî-tiong ū tsin-tsē sī kìng-uì Siōng-Tsú ê Hi-lia̍p-lâng, tsun-kuì ê hū-jîn-lâng mā bē tsió. 5 M̄-koh Iû-thài-lâng khí uàn-tò͘, tsio-tsi̍p tsi̍t-kuá ke-lō͘ ê huí-luī, siàn-tōng bîn-tsiòng sîng-kûn kiat-tóng, jiáu-luān tsuân siâⁿ, kong ji̍p-khì Iâ-sun ê tshù, beh tshuē Pó-lô kah Se-lah, tsiong in lia̍h khì kau hō͘ kûn-tsiòng. 6 In tshuē bô, tsiū kā Iâ-sun kah kuí-nā-ê sìn-tô͘ thua khì tē-hng-kuaⁿ hia, tuā-siaⁿ huah: "Tsiah-ê jiáu-luān thian-hā ê lâng mā lâi-kàu tsia, 7 Iâ-sun kìng-jiân kā in siu-liû. Tsiah-ê lâng lóng uî-gi̍k Lô-má hông-tè ê huat-līng, kóng līng-guā ū tsi̍t-ê ông, kiò-tsò Iâ-so͘." 8 Bîn-tsiòng kah tē-hng-kuaⁿ thiaⁿ-tio̍h tsiah-ê uē, tsiū tio̍h-kip put-an. 9 Kuaⁿ-uân tuì Iâ-sun kah kî-tha ê lâng siu tsîⁿ kau-pó liáu-āu, tsiū pàng in khì.

Tī Pì-lí-a
10 Hit mê, sìn-tô͘ suî-sî sàng Pó-lô kah Se-lah thàu-mê khì Pì-lí-a. Nn̄g lâng kàu-uī liáu-āu, tsiū ji̍p-khì Iû-thài-lâng ê huē-tn̂g. 11 Hiah-ê lâng pí Thiap-sat-lô-nî-ka-lâng khah bûn-bîng, jia̍t-sim thiaⁿ tō-lí, ta̍k-ji̍t tsa-khó Sìng-king, khuàⁿ Pó-lô só͘ kóng ê ū khak-si̍t á-bô. 12 Só͘-í ū tsin-tsē lâng sìn, kî-tiong ū bē-tsió Hi-lia̍p tsun-kuì ê hū-jîn-lâng kah tsa-po͘-lâng. 13 M̄-koh Thiap-sat-lô-nî-ka ê Iû-thài-lâng tsi̍t-ē tsai Pó-lô tī Pì-lí-a teh thuân Siōng-Tsú ê tō-lí, tsiū khì hia siàn-tōng bîn-tsiòng, ín-khí jiáu-luān. 14 Sìn-tô͘ suî-sî sàng Pó-lô khì hái-piⁿ, Se-lah kah Thê-mô͘-thài iû-guân lâu tuà hia. 15 In tsi̍t-lō͘ hō͘-sàng Pó-lô kàu Ngá-tián. Pó-lô huan-hù in kiò Se-lah kah Thê-mô͘-thài kuáⁿ-kín lâi kah i huē-ha̍p. Jiân-āu hiah-ê lâng tsiū tńg-khì.

Tī Ngá-tián
16 Pó-lô tī Ngá-tián teh thìng-hāu Se-lah kah Thê-mô͘-thài ê kî-kan, khuàⁿ-tio̍h muá-siâⁿ lóng sī Ngó͘-siōng, tsiū siong-sim tio̍h-kip. 17 I tī huē-tn̂g kah Iû-thài-lâng í-ki̍p kìng-uì Siōng-Tsú ê lâng piān-lūn, mā ta̍k-ji̍t tī ke-lō͘-ni̍h kah só͘ tú-tio̍h ê lâng tâm-lūn. 18 Ū Í-pí-kó͘-lô(Epicurus) kah Su-to-a(Stua) nn̄g-ê ha̍k-phài ê tiat-ha̍k-ka lâi kah i piān-lūn. Ū-lâng kóng, "Tsit-ê kāu-uē ê lâng teh kóng sím-mi̍h?" Koh ū-lâng kóng, "I tshin-tshiūⁿ teh thuân pa̍t-kok ê kuí-sîn." In án-ne kóng sī in-uī i teh thuân Iâ-so͘ kah I koh-ua̍h ê tō-lí. 19 In tsiū kā Pó-lô thua-kàu A-lio̍k-suaⁿ ê huē-tiûⁿ, kā i kóng, "Lí teh káng-lūn ê sin ha̍k-suat kám ē-tàng pò guán tsai? 20 In-uī ū tsi̍t-kuá tāi-tsì guán kám-kak kuài-kuài, só͘-í guán ài beh tsai sī sím-mi̍h ì-sù." 21 (Guân-lâi Ngá-tián-lâng kah tuà tī hia ê guā-kok-lâng lóng ài kóng mā ài thiaⁿ sin-kî ê tāi-tsì lâi siau-mô͘ sî-kan.) 22 Pó-lô khiā tī A-lio̍k-suaⁿ ê huē-tiûⁿ, kóng, "Kok-uī Ngá-tián-lâng, guá khuàⁿ lín huān-sū kìng-uì sîn-bîng, tsám-jiân-á jia̍t-sim. 23 Guá tī siâⁿ-lāi teh kiâⁿ ê sî ū khuàⁿ-tio̍h lín só͘ kìng-pài ê só͘-tsāi, tú-tio̍h tsi̍t-tsō tuâⁿ tíng-bīn siá, kóng, 'Hiàn hō͘ m̄-bat ê sîn.' Lín teh kìng-pài Tsit-uī m̄-bat ê sîn, guá lâi pò lín tsai. 24 Tsit-ê tshòng-tsō ú-tiū kah kî-tiong bān-bu̍t ê Siōng-Tsú sī thiⁿ-tē ê Tsú, bô tuà tī lâng ê tshiú só͘ tsō ê biō-sī, 25 mā bô khiàm-īng lâng ê tshiú só͘ hiàn ê mi̍h-kiāⁿ. Tian-tò tsiong ua̍h-miā, tshuán-khuì, kah bān-bu̍t siúⁿ-sù hō͘ jîn-luī. 26 I koh tuì tsi̍t-ê lâng tshòng-tsō kok tsióng-tso̍k ê lâng, hō͘ in tuà tī tsuân sè-kài, koh kā in tiāⁿ nî-hān kah in só͘ tuà ê tē-kài. 27 Siōng-Tsú án-ne tsò sī beh hō͘ in tshuē-kiû I. Lâng nā ū sim beh tshuē-kiû, it-tīng tshuē ē-tio̍h, kî-si̍t Siōng-Tsú lī lán ta̍k-lâng bô hn̄g. 28 In-uī lâng teh kóng, 'Lán uá-khò I lâi sing-ua̍h, hîng-tōng kah tsûn-tsāi', tú tshin-tshiūⁿ lín tiong-kan ê si-jîn ū án-ne kóng, 'In-uī lán mā sī I ê kiáⁿ-sun.' 29 Lán kì-jiân sī Siōng-Tsú ê kiáⁿ-sun, tsiū bô ing-kai kā Siōng-Tsú ê pún-tsit khuàⁿ-tsò kah lâng īng kim, gîn, tsio̍h í-ki̍p lâng ê kang-hu, sim-su só͘ tiau-khik ê ngó͘-siōng kāng-khuán. 30 Jîn-luī iáu bû-ti ê sî-tāi, Siōng-Tsú bô beh it-it tui-kiù, taⁿ I bīng-līng ta̍k só͘-tsāi ê lâng lóng tio̍h hué-kái. 31 In-uī I í-king tiāⁿ-tio̍h ji̍t-tsí, beh īng I só͘ siat-li̍p ê lâng, tsiàu kong-gī lâi sím-phuàⁿ sè-kan-lâng. I hō͘ tsi̍t-ê lâng tuì sí-lâng tiong koh-ua̍h, īng tsit-ê tsò pîn-kì, thang hō͘ sè-kan-lâng lâi sìn." 32 In tsi̍t-ē thiaⁿ-tio̍h sí-lâng koh-ua̍h ê uē, ū-lâng kā i thí-tshiò, mā ū-lâng kóng, "Guán beh koh thiaⁿ lí kóng tsit-ê tāi-tsì." 33 Jiân-āu Pó-lô tsiū lī-khui in tshut-khì. 34 M̄-koh ū tsi̍t-kuá lâng tuè Pó-lô khì, tsiâⁿ-tsò sìn-tô͘. Kî-tiong ū A-lio̍k-suaⁿ huē-tiûⁿ ê gī-uân Tiu-nî-siu, koh ū tsi̍t-ê miâ-kiò Tāi-má-lí ê hū-jîn-lâng, iáu-koh ū kî-tha kuí-nā-lâng.