《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十八章

作者 巴克禮普世版小組 2014.06.29

Tī Ko-lîm-to
1 Tsit-ê tāi-tsì liáu-āu, Pó-lô lī-khui Ngá-tián khì Ko-lîm-to. 2 Tī hia tú-tio̍h tsi̍t-ê miâ-kiò A-ku-lah ê Iû-thài-lâng. I tī Pún-to͘ tshut-sì, kah i ê bó͘ Pik-ki-lah tú-á tuì Ì-tāi-lī lâi, in-uī Kik-ló-tiu hông-tè bīng-līng Iû-thài-lâng lóng tio̍h lī-khui Lô-má. Pó-lô khì tshuē in. 3 In-uī in lóng sī kāng tsò pò͘-pêⁿ ê hâng-gia̍p, Pó-lô tsiū kah in tsò-hué tuà, ha̍p teh tsò-kang. 4 Ta̍k-ê An-hioh-ji̍t, Pó-lô lóng tī huē-tn̂g kah lâng piān-lūn, khó͘-khǹg Iû-thài-lâng kah Hi-lia̍p-lâng lâi sìn Tsú. 5 Se-lah kah Thê-mô͘-thài tuì Má-kî-tùn lo̍h-lâi liáu-āu, Pó-lô tsiū tsuân-sim thuân-tō, tuì Iû-thài-lâng kiàn-tsìng Iâ-so͘ sī Ki-tok. 6 In tuì-khòng Pó-lô koh kā i huí-pòng ê sî, i tsiū puāⁿ saⁿ ê thô͘-hún piáu-sī khòng-gī, tuì in kóng, "Lín ê sí-ua̍h tsāi tī lín, bô guá ê kuan-hē. Tuì taⁿ í-āu, guá beh khì Guā-pang-lâng hia." 7 Pó-lô tsiū lī-khui khì tsi̍t-ê miâ-kiò Thê-to Iû-sū-to͘ ê tshù. Hit lâng sī kìng-pài Siōng-Tsú ê Guā-pang-lâng, i ê tshù tī huē-tn̂g ê keh-piah. 8 Huē-tn̂g ê tsú-kuán Kik-lí-sū-pò͘ kah i ê tsuân-ke lóng sìn Tsú, koh ū tsin-tsē Ko-lîm-to-lâng thiaⁿ-tio̍h tō-lí liáu-āu lâi sìn Tsú, mā siū sé-lé. 9 Ū tsi̍t àm, Siōng-Tsú tī īⁿ-siōng tiong tuì Pó-lô kóng, "M̄-bián kiaⁿ, tio̍h kè-sio̍k kóng, m̄-thang tiām khì. 10 In-uī Guá kah lí tông-tsāi, bô-lâng ē kong-kik lâi siong-hāi lí. Guá ū tsin-tsē tsú-bîn tī tsit-ê siâⁿ. 11 Pó-lô tuà hia tsi̍t nî koh la̍k kò-gue̍h, tsiong Siōng-Tsú ê tō-lí kà-sī hiah-ê lâng. 12 Ka-liû tsò A-kai-a tsóng-tok ê sî, Iû-thài-lâng liân-ha̍p kong-kik Pó-lô, kā i thua khì huat-tîng, 13 kò i kóng, "Tsit-ê lâng siàn-tōng lâng īng uî-puē lu̍t-huat ê hong-sik lâi kìng-pài Siōng-Tsú!" 14 Pó-lô tú beh khui-tshuì, Ka-liû tuì Iû-thài-lâng kóng, "Iû-thài-lâng ah, tse nā sī sím-mi̍h huān-huat á-sī huān-tsuē ê tāi-tsì, guá tong-jiân tio̍h nāi-sim thiaⁿ lín ê khòng-sò͘. 15 Kì-jiân lín teh piān-lūn lín ê lu̍t-huat ê jī-gán kah miâ-tshing, lín ka-kī khì kái-kuat. Guá bô ài pān tsit-khuán ê tāi-tsì!" 16 Tsiū kā in kuáⁿ-tshut huat-tîng. 17 Tsìng-lâng tsiū lia̍h huē-tn̂g ê tsú-kuán Só͘-thê-nî, tī huat-tîng tsîng kā i phah, tsiah-ê tāi-tsì Ka-liû lóng bô tshap.

Pó-lô Tńg-khì An-thê-o
18 Pó-lô tī Ko-lîm-to koh kah huē-iú tuà kuí-nā ji̍t liáu-āu tsiū lī-khui hia. Kah Pik-ki-lah hām A-ku-lah tsò-hué tsē tsûn khì Sū-lī-a. Pó-lô ū hē-guān, tsiū tī Kian-kik-lí tsián thâu-mn̂g. 19 Lâi-kàu Í-hut-só͘, Pó-lô kā in lâu tuà huē-tn̂g guā-kháu, ka-kī ji̍p-khì kah Iû-thài-lâng piān-lūn. 20 Tāi-ke tshiáⁿ Pó-lô ke tuà kuí ji̍t, i bô tap-ìng. 21 Beh lī-pia̍t ê sî, Pó-lô kā in kóng, "Nā sī Siōng-Tsú ín-tsún, guá ē koh tńg-lâi lín tsia." Jiân-āu tsē tsûn lī-khui Í-hut-só͘. 22 I tī Kai-sat-lī-a lo̍h tsûn, tuì hia tsiūⁿ-khì Iâ-lō͘-sat-líng, kā kàu-huē tshíng-an liáu-āu tsiah lo̍h-khì An-thê-o. 23 Pó-lô tī hia tuà kuí ji̍t liáu-āu koh tshut-huat, king-kuè Ka-lia̍p-thài kah Hut-lū-ka ê tē-khu, kian-kò͘ tsìng bûn-tô͘ ê sìn-sim.

A-pho-lô Tī Í-hut-só͘ Káng-tō
24 Ū tsi̍t-ê miâ-kiò A-pho-lô ê Iû-thài-lâng lâi-kàu Í-hut-só͘. I tī A-li̍k-san-tāi tshut-sì, sī ū ha̍k-būn ê lâng, tuì Sìng-king mā put-tsí-á tsing-thong. 25 I bat ha̍k-si̍p Tsú ê lō͘, koh jia̍t-sim tsiong Iâ-so͘ ê tāi-tsì siông-sè kóng lâi kà-sī lâng, m̄-koh kan-taⁿ tsai Iok-hān ê sé-lé niā-niā. 26 I tī huē-tn̂g hó-táⁿ khai-sí káng-tō. Pik-ki-lah kah A-ku-lah thiaⁿ-tio̍h, tsiū tshuā i lâi, koh-khah tsìng-khak kā i kái-sueh Siōng-Tsú ê tō-lō͘. 27 Āu-lâi A-pho-lô kuat-tīng beh khì A-kai-a ê sî, Í-hut-só͘ ê sìn-tô͘ kā i kó͘-lē, koh siá phue tshiáⁿ A-kai-a ê bûn-tô͘ kā i tsiap-thāi. I khì kàu hia liáu-āu, hiah-ê tuì Siōng-Tsú ê un-tián lâi sìn-Tsú ê lâng, siū-tio̍h tsin-tuā ê pang-tsō͘. 28 In-uī tī kong-khai ê piān-lūn, i tshut-la̍t piān-tó Iû-thài-lâng, kin-kì Sìng-king lâi tsìng-bîng Iâ-so͘ sī Ki-tok.