《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十一章

作者 巴克禮普世版小組 2014.07.20

Pó-lô Khì Iâ-lō͘-sat-líng
1 Guán kah in lī-pia̍t liáu-āu tsiū khui tsûn, it-ti̍t kàu Ko-sū, keh-tńg-ji̍t lâi-kàu Lô-tí, tuì hia koh khì-kàu Phàⁿ-tāi-lah; 2 Tī hia tú-tio̍h tsi̍t-tsiah tsûn beh khì Hui-nî-ki, guán tsiū tsiūⁿ-tsûn tshut-huat. 3 Guán lâi-kàu khuàⁿ ē-tio̍h Ku-pí-lō͘ ê sî tsiū tuì tsiàⁿ pîng sái-kuè khì-kàu Sū-lī-a, tī Tshui-lô lo̍h-tsûn, in-uī tsûn tī hia sià-huè. 4 Guán tshuē-tio̍h tsi̍t-kuá sìn-tô͘, kah in tuà tshit ji̍t. In tit-tio̍h Sìng-Sîn ê tsí-sī, khǹg Pó-lô m̄-thang tsiūⁿ Iâ-lō͘-sat-líng. 5 Tshit ji̍t liáu-āu, guán tshut-huat kè-sio̍k guán ê lō͘-tîng. Tsìng-lâng tshuā bó͘-kiáⁿ sàng guán kàu siâⁿ-guā, tāi-ke lóng kuī lo̍h-khì hái-piⁿ kî-tó, 6 Hō͘-siōng sio-sî guán tsiūⁿ-tsûn, in tńg-khì in tau. 7 Guán kè-sio̍k tsē-tsûn tuì Tshui-lô lâi-kàu To-lī-mái, kā hia ê sìn-tô͘ tshíng-an, kah in tuà tsi̍t ji̍t. 8 Keh-tńg-ji̍t tshut-huat lâi-kàu Kai-sat-lī-a. Tī hia tuà thuân-hok-im ê Hui-li̍k ê tshù, i sī Iâ-lō͘-sat-líng hit tshit-ê tsip-sū tsi-it. 9 I ū sì-ê tsa-bó͘-kiáⁿ, lóng sī tsāi-sik-lí, mā lóng tsò sian-ti. 10 Guán tuà hia kuí-nā ji̍t ê tiong-kan, ū tsi̍t-ê tuì Iû-thài lo̍h-lâi ê sian-ti miâ-kiò A-ka-pò͘. 11 I lâi tshuē guán, the̍h Pó-lô ê io-tuà lâi pa̍k ka-kī ê kha-tshiú, kóng, "Sìng-Sîn án-ne kóng, 'Iû-thài-lâng tī Iâ-lō͘-sat-líng ē án-ne pa̍k tsit-tiâu io-tuà ê tsú-lâng, jiân-āu kau hō͘ Guā-pang-lâng ê tshiú.'" 12 Guán tsi̍t-ē thiaⁿ-tio̍h tsiū kah hit só͘-tsāi ê lâng khǹg Pó-lô m̄-thang tsiūⁿ Iâ-lō͘-sat-líng. 13 Pó-lô tsiū ìn kóng, "Lín ná-ē thî-khàu lâi hō͘ guá ê sim huân? Guá uī-tio̍h Tsú Iâ-so͘ ê miâ, m̄-nā siū pa̍k, sīm-tsí sí tī Iâ-lō͘-sat-líng mā kam-guān." 14 I m̄ siū khó͘-khǹg, guán tsiū suah-khì, kan-taⁿ kóng, "Guān Tsú ê tsí-ì si̍t-hiān!" 15 Kuí-nā ji̍t liáu-āu, guán kā hîng-lí tsún-pī hó-sè tsiū tsiūⁿ Iâ-lō͘-sat-líng. 16 Tsi̍t-kuá tuì Kai-sat-lī-a lâi ê sìn-tô͘ kah guán tsò-hué khì, in tshuā guán khì tuà tsi̍t-ê Ku-pí-lō͘-lâng Ná-sun in tau, i sī tsá-kî ê sìn-tô͘.

Pó-lô Hóng-būn Ngá-kok
17 Guán lâi-kàu Iâ-lō͘-sat-líng, sìn-tô͘ jia̍t-lia̍t kā guán huan-gîng. 18 Keh-tńg-ji̍t, Pó-lô kah guán khì hóng-būn Ngá-kok, tsìng tiúⁿ-ló mā lóng tsò-hué tī hia. 19 Pó-lô kā in tshíng-an liáu-āu, tsiū tsiong Siōng-Tsú thong-kuè i tī Guā-pang-lâng tiong-kan só͘ tsò ê kang-tsok, tsi̍t-hāng tsi̍t-hāng tuì in pò-kò. 20 In thiaⁿ-tio̍h tsiū o-ló Siōng-Tsú, mā tuì Pó-lô kóng, "Hiaⁿ-tī tsí-muē ah, lí tsai ū kuí-nā-bān Iû-thài-lâng tsiâⁿ-tsò sìn-tô͘, in lóng tsin jia̍t-sim teh tsun-siú lu̍t-huat. 21 In bat thiaⁿ lâng kóng, lí kà-sī tuà tī guā-kok ê Iû-thài-lâng hòng-khì Mô͘-se ê lu̍t-huat, m̄-bián kā in ê gín-á kiâⁿ kat-lé, mā m̄-bián tsun-siú Iû-thài-lâng ê kui-lē. 22 In it-tīng ē thiaⁿ-tio̍h lí lâi tsia ê siau-sit. Taⁿ beh án-tsuáⁿ tsiah hó? 23 Taⁿ tio̍h tsiàu guán kā lí kóng ê khì tsò. Guán tsia ū sì-ê lâng hē guān. 24 Lí tshuā in tsò-hué khì tsham-ka kiat-tsīng-lé, tshut só͘-huì hō͘ in thang thì thâu-mn̂g, án-ne tsìng-lâng ē tsai in só͘ thiaⁿ-tio̍h kuan-hē lí ê tāi-tsì m̄-sī sū-si̍t, thang hō͘ in tsai, lí pún-sin mā sī ū teh siú Mô͘-se ê lu̍t-huat. 25 M̄-koh tuì sìn-Tsú ê Guā-pang-lâng, guán í-king ū kià phue kā in kóng guán tshâi-kuat m̄-thang tsia̍h tsè ngó͘-siōng ê mi̍h, hueh kah ni̍h-sí ê tsing-seⁿ, mā m̄-thang îm-luān." 26 Keh-tńg-ji̍t, Pó-lô tsiū tshuā hit sì-ê lâng khì tsham-ka kiat-tsīng-lé, jiân-āu ji̍p-khì sìng-tiān pò-kò kiat-tsīng-lé muá ê ji̍t-kî, thang uī in ta̍k-lâng hiàn tsè-mi̍h.

Pó-lô Tī Sìng-tiān Hông Lia̍h-Khì
27 Tshit-ji̍t ê kî teh-beh muá ê sî, tuì A-se-a-síng lâi ê Iû-thài-lâng khuàⁿ-tio̍h Pó-lô tī sìng-tiān, tsiū siàn-tōng kûn-tsiòng lâi kā i lia̍h, 28 tuā-siaⁿ huah: "Í-sik-lia̍t-lâng ah, lâi tàu-kha-tshiú, tsit-ê lâng tī ta̍k só͘-tsāi kà-sī kûn-tsiòng kong-kik Í-sik-lia̍t-lâng kah Mô͘-se ê lu̍t-huat, mā huán-tuì tsit-ê sìng-tiān. Tsit-má koh káⁿ tshuā Hi-lia̍p-lâng ji̍p-lâi sìng-tiān, ù-uè tsit-ê sîn-sìng ê só͘-tsāi." 29 In-uī in bat khuàⁿ-tio̍h Í-hut-só͘-lâng Ti̍k-lô-hui-mô͘ kah i tī siâⁿ-lāi, siūⁿ-kóng Pó-lô ū tshuā i ji̍p-khì sìng-tiān. 30 Tsuân siâⁿ khí jiáu-luān, bîn-tsiòng lóng tsáu uá-lâi lia̍h Pó-lô, kā i thua tshut-khì sìng-tiān guā-kháu, tiān ê mn̂g suî-sî kuaiⁿ khí-lâi. 31 In tú siūⁿ-beh thâi Pó-lô ê sî, ū siau-sit thuân kàu Lô-má kun-tuī ê iâⁿ-tiúⁿ, kóng tsuân Iâ-lō͘-sat-líng teh khí jiáu-luān. 32 Iâⁿ-tiúⁿ suî-sî tuà ping kah kun-kuaⁿ lâi-kàu bîn-tsiòng hia. In khuàⁿ-tio̍h kun-kuaⁿ kah ping tsiū thîng tshiú, bô koh phah Pó-lô. 33 Kun-kuaⁿ uá-khì lia̍h Pó-lô, bīng-līng īng nn̄g-tiâu thih-liān-á kā i liān khí-lâi, koh mn̄g i sī siáⁿ-lâng, ū tsò sím-mi̍h tāi-tsì? 34 Bîn-tsiòng tsi̍t-ê huah tsi̍t khuán, in-uī hán-huā, kun-kuaⁿ bô huat-tō͘ tsai-iáⁿ si̍t-tsè tsîng-hîng, tsiū bīng-līng kā Pó-lô ah ji̍p-khì iâⁿ-pâng. 35 Lâi-kàu kiā-á ê sî, in-uī kûn-tsiòng e-kheh tsin hiông, ping suah tio̍h tsiong Pó-lô kng khí-lih. 36 Kûn-tsiòng tuè tī āu-bīn, tuā-siaⁿ huah: "Hō͘ i sí!"

Pó-lô Uī Ka-kī Piān-hō͘
37 Pó-lô hō͘ in ah-khì beh ji̍p iâⁿ-pâng ê sî, tuì kun-kuaⁿ kóng, "Guá tsi̍t-kù uē kā lí kóng, thang-bô?" Kun-kuaⁿ kóng, "Lí bat Hi-lia̍p-uē oh? 38 Án-ne lí to̍h sī hit-ê tsîng ji̍t khí jiáu-luān ê sî tshuā sì-tshing-ê sat-tshiú tshut-khì khòng-iá ê Ai-ki̍p-lâng lò͘?" 39 Pó-lô ìn kóng, "Guá sī Iû-thài-lâng, tshut-sì tī Ki-lī-ka ê Tāi-sò͘, sī tsi̍t-ê put-tsí tshut-miâ ê siâⁿ-tshī. Kiû lí tsún guá tuì bîn-tsiòng kóng-uē." 40 Kun-kuaⁿ tsún i, Pó-lô tsiū khiā tī kiā-á-tíng, tuì bîn-tsiòng pí tshiú-sè. Kûn-tsiòng suî-sî tiām lo̍h-lâi, Pó-lô tsiū īng Hi-pik-lâi-uē tuì in kóng,