《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十章

作者 巴克禮普世版小組 2014.07.13

Pó-lô Khì Má-kî-tùn kah Hi-la̍h
1 Jiáu-luān pîng-tsīng liáu-āu, Pó-lô tiàu-tsi̍p bûn-tô͘, kā in kó͘-lē. Kah in sio-sî tsiū tshut-huat khì Má-kî-tùn. 2 I king-kuè hiah-ê tē-khu, kóng tsin-tsē uē kā in kó͘-lē, tsiū khì Hi-lia̍p, 3 tī hia tuà saⁿ-gue̍h ji̍t liáu-āu, i beh tsē tsûn khì Sū-lī-a ê sî. Iû-thài-lâng kè-bô͘ beh hāi i, i tsiū kái-piàn hîng-tîng tuì Má-kî-tùn tńg-khì. 4 Tuè i khì A-se-a-síng ê lâng, ū Pì-lí-a-lâng Pit-lō͘ ê kiáⁿ Só͘-pá-tik, Thiap-sat-lô-nî-ka-lâng A-lí-ta̍t-kó͘ kah Se-kong-to͘, Ti̍k-pì-lâng Kai-iû kah Thê-mô͘-thài; koh ū A-se-a-lâng Tshui-ki-kó͘ kah Ti̍k-lô-hui-mô͘. 5 Tsiah-ê lâng sing tshut-huat, tī Ti̍k-lô-a thìng-hāu guán. 6 Kuè-liáu Tû-kàⁿ-tseh, guán tuì Hui-li̍p-pí khui tsûn, gō͘ ji̍t āu lâi-kàu Ti̍k-lô-a, kah in huē-ha̍p, tī hia tuà tshit ji̍t.

Pó-lô Tsuè-āu Tsi̍t Pái Khì Ti̍k-lô-a
7 Tshit ji̍t ê thâu-tsi̍t ji̍t, guán tāi-ke tsū-huē peh piáⁿ ê sî, in-uī Pó-lô keh-tńg-ji̍t tsiū beh lī-khui, tsiū kah in káng-lūn tō-lí kóng kàu puàⁿ-mê. 8 Guán teh tsū-huē ê lâu-tíng ū tiám tsin-tsē ting-hué. 9 Ū tsi̍t-ê siàu-liân-lâng, miâ-kiò Iû-tshui-kó͘, tsē tī thang-á-mn̂g. Pó-lô kè-sio̍k káng-lūn tsin kú, siàu-liân-lâng suah khùn lo̍h-bîn, tuì saⁿ-tsàn-lâu pua̍h lo̍h-lâi. Tāi-ke kā i hû khí-lâi ê sî, í-king sí à. 10 Pó-lô lo̍h-khì lâu-kha phak tī i ê sing-khu kā i lám-teh, kóng, "M̄-bián huân-ló, i iáu ua̍h-teh." 11 Pó-lô tsiū koh khí-lih lâu-tíng peh piáⁿ lâi tsia̍h, kè-sio̍k kah in tâm-lūn tsin kú; kàu thiⁿ-kng tsiah lī-khui. 12 In kā hit-ê ua̍h khí-lâi ê siàu-liân-lâng tshuā tńg-khì, tāi-ke tit-tio̍h tsin-tuā ê an-uì.

Tuì Ti̍k-lô-a Khì Bí-lī-to͘
13 Guán sing tsē tsûn khì A-sok, thang tī hia tsiap Pó-lô, in-uī i beh tuì lio̍k-lō͘ khì hia, ū án-ne kā guán huan-hù. 14 Pó-lô tī A-sok kah guán huē-ha̍p, guán tsiū tsiap i tsiūⁿ tsûn khì Bí-tshui-lī-nî. 15 Guán tuì hia khui tsûn, tē-jī ji̍t lâi-kàu Ki-o ê tuì-bīn. Keh-tńg-ji̍t tsûn tī Sat-mô͘ khò-huāⁿ, koh kuè tsi̍t ji̍t lâi-kàu Bí-lī-to͘. 16 Pó-lô kuat-tīng bô beh khì Í-hut-só͘, tsiah bián tī A-se-a-síng lōng-huì sî-kan. I beh kuáⁿ-kín khì Iâ-lō͘-sat-líng, khuàⁿ ē-tàng tī Gō͘-sûn-tseh í-tsîng kàu á-bē.

Pó-lô Khuàn-bián Í-hut-só͘ ê Tiúⁿ-ló
17 Pó-lô tuì Bí-lī-to͘ tshe lâng khì Í-hut-só͘, tshiáⁿ kàu-huē ê tiúⁿ-ló lâi. 18 In lâi kàu-uī, Pó-lô tsiū tuì in kóng, "Lín ka-kī tsai, guá tuì lâi-kàu A-se-a-síng hit ji̍t khí it-ti̍t kàu tsit-má, guá án-tsuáⁿ kah lín tsò-hué sing-ua̍h. 19 Guá siū-tio̍h Iû-thài-lâng ê bô͘-hāi tshì-liān, iáu-koh khiam-pi lâu ba̍k-sái teh ho̍k-sāi Tsú. 20 Tuì lín ū lī-ik ê, bô-lūn tī kûn-tsiòng ê bīn-tsîng á-sī tī kò-pia̍t ê ka-tîng, guá m̄-bat bô kā lín thuân, bô kā lín kà. 21 Tuì Iû-thài kah Hi-lia̍p-lâng, guá lóng giâm-siok khuàn-bián in tio̍h ǹg Siōng-Tsú lâi hué-kái, koh sìn lán ê Tsú Iâ-so͘ Ki-tok. 22 Taⁿ guá sūn-ho̍k Sìng-Sîn ê tsí-sī beh khì Iâ-lō͘-sat-líng, m̄-tsai tī hia ē tú-tio̍h sím-mi̍h tāi-tsì. 23 M̄-koh guá tsai, Sìng-Sîn tī ta̍k-ê siâⁿ tuì guá kíng-kò, kóng ū kaⁿ-ga̍k kah huān-lān teh thìng-hāu guá. 24 Uī-tio̍h beh kiâⁿ uân guá ê lō͘-tsām, uân-sîng Tsú Iâ-so͘ kau-tài guá ê jīm-bū, thang tsìng-bîng Siōng-Tsú un-tián ê hok-im, guá uân-tsuân bô sioh ka-kī ê sèⁿ-miā." 25 "Guá pîng-siông tī lín tiong-kan sì-kè kiâⁿ lâi thuân Siōng-Tsú ê Kok-tō͘, taⁿ guá tsai í-āu lín bē-tàng koh kìⁿ guá ê bīn. 26 Só͘-í guá kin-á-ji̍t tuì lín kóng tshing-tshó, nā ū-lâng tîm-lûn, m̄-sī guá ê tsik-jīm, 27 in-uī guá í-king tsiong Siōng-Tsú ê tsí-ì tsuân-pō͘ thuân hō͘ lín. 28 Lín tio̍h ka-kī kín-sīn, mā tio̍h tsiàu-kò͘ Sìng-Sîn kau-tài lín tsò kàm-tok ê iûⁿ-kûn, lâi bo̍k-ióng Siōng-Tsú ê kàu-huē, tsiū-sī I īng ka-kī ê hueh só͘ sio̍k-huê-.ê. 29 Guá tsai guá lī-khui liáu-āu, ē ū hiong-ok ê tshâi-lông ji̍p-khì lín tiong-kan siong-hāi iûⁿ-kûn. 30 Sīm-tsí tī lín ka-kī ê tiong-kan, ē ū-lâng tshut-lâi khiok-kái tsin-lí, ín-iú sìn-tô͘ lâi tuè in. 31 Só͘-í lín tio̍h kíng-síng, ē-kì-tit guá saⁿ-nî kú mê-ji̍t lâu ba̍k-sái lâi khuàn-kái lín ta̍k-lâng." 32 "Taⁿ guá kā lín kau-thok hō͘ Siōng-Tsú, thang tuì I un-tián ê sìn-sit hō͘ lín tit-tio̍h tsō-tsiū, mā hō͘ lín kah hiah-ê sìng-huà kui-Tsú ê sìn-tô͘ tsò-hué sîng-tsiap I siúⁿ-sù ê hok-hūn. 33 Guá m̄-bat tham lâng ê tsîⁿ-gîn á-sī saⁿ-khò͘. 34 Lín ka-kī tsai, guá īng siang-tshiú tsò-kang lâi kiong-kip ka-kī kah tâng-phuāⁿ ê su-iàu. 35 Guá tsò lín ê bô͘-iūⁿ, tio̍h phah-piàⁿ tsò-kang lâi pang-tsō͘ luán-jio̍k ê lâng, mā tio̍h ē-kì-tit Tsú Iâ-so͘ kóng ê uē, kóng, 'Hō͘ lâng ê, pí niá-siū ê khah ū hok-khì.'" 36 Pó-lô kóng suah, kuī lo̍h-khì kah kûn-tsiòng tsò-hué kî-tó. 37 Tāi-ke tuā-siaⁿ khàu, kā Pó-lô lám-teh, kā i tsim. 38 Pó-lô kóng, "Í-āu bē-tàng koh kìⁿ-tio̍h i ê bīn" tsit-kù uē hō͘ in hui-siông siong-sim. Liáu-āu in tsiū sàng i tsiūⁿ tsûn.