《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十三章

作者 巴克禮普世版小組 2014.08.03

Pó-lô tsù-ba̍k khuàⁿ gī-huē, kóng, "Hiaⁿ-tī tsí-muē ah, guá pîng-sî tī Siōng-Tsú ê bīn-tsîng uân-tsuân tsiàu tshing-pi̍k ê liông-sim, ti̍t-kàu kin-á-ji̍t. 2 Tsè-si-tiúⁿ A-ná-nî-a bīng-līng sin-piⁿ teh khiā ê lâng siàn i ê tshuì-phué. 3 Pó-lô tsiū tuì i kóng, "Lí tsit-ê tshat kah pe̍h-siak-siak ê tshiûⁿ ah, Siōng-Tsú ē kā lí phah. Lí khui-tîng tio̍h tsiàu lu̍t-huat lâi kā guá sím-phuàⁿ, kìng-jiân uî-puē lu̍t-huat bīng-līng lâng kā guá phah?" 4 Khiā tī Pó-lô sin-piⁿ ê lâng kóng, "Lí káⁿ mē Siōng-Tsú ê tsè-si-tiúⁿ?" 5 Pó-lô kóng, "Hiaⁿ-tī tsí-muē ah, guá m̄-bat i sī tsè-si-tiúⁿ, in-uī Sìng-king ū kì-tsài: M̄-thang mē tī-lí jîn-bîn ê tiúⁿ-kuaⁿ."( tsù: CAK 22:28) 6 M̄-koh Pó-lô tsai-iáⁿ in tsi̍t pîng sī Sat-to͘-kai-phài ê lâng, tsi̍t pîng sī Huat-lī-sài-phài ê lâng, tsiū tī gī-huē tiong tuā-siaⁿ huah: "Hiaⁿ-tī tsí-muē ah, guá sī Huat-lī-sài-phài ê lâng, mā sī Huat-lī-sài-phài ê lâng ê kiáⁿ. Guá tī tsia siū sím-phuàⁿ tsiū-sī ǹg-bāng sí-lâng ê koh-ua̍h!" 7 Pó-lô án-ne kóng suah, Huat-lī-sài-phài ê lâng kah Sat-to͘-kai-phài ê lâng tsiū khí tsing-lūn, gī-huē mā hun-lia̍t. 8 In-uī Sat-to͘-kai-phài ê lâng kóng bô koh-ua̍h, mā bô thiⁿ-sài, mā bô lîng-hûn, m̄-koh Huat-lī-sài-phài ê lâng tsú-tiuⁿ tsit saⁿ hāng lóng ū. 9 Suan-jióng ê siaⁿ ná lâi ná tuā. Huat-lī-sài-phài hit pîng ê king-ha̍k kàu-su kuí-nā-ê khí-lâi tsing-piān kóng, "Guán khuàⁿ tsit-ê lâng lóng bô tsò pháiⁿ. Kám kóng tsin-tsiàⁿ ū Sìng-Sîn á-sī thiⁿ-sài tuì i kóng-uē?" 10 Tsing-lūn ná lâi ná ki̍k-lia̍t. Iâⁿ-tiúⁿ kiaⁿ Pó-lô khì hō͘ in thiah-tshuì, bīng-līng ping-á lo̍h-khì tuì in tiong-kan kā Pó-lô tshiúⁿ tshut-lâi, kā i tshuā ji̍p-khì iâⁿ-pâng. 11 Hit mê Tsú khiā tī Pó-lô ê sin-piⁿ, kóng, "Tio̍h ióng-kám! lí bat tī Iâ-lō͘-sat-líng uī guá tsò kiàn-tsìng, mā it-tīng tio̍h tī Lô-má uī guá tsò kiàn-tsìng."

Sat-hāi Pó-lô ê Im-bô͘
12 Keh-tńg tsá-khí, Iû-thài-lâng kiat-tóng tsiù-tsuā, kóng, "Nā bô thâi-sí Pó-lô, m̄ tsia̍h m̄ lim." 13 Tsò-hué án-ne kè-bô͘ ê lâng ū sì-tsa̍p-ê í-siōng. 14 In khì kìⁿ tsè-si-tiúⁿ kah tiúⁿ-ló, kóng, "Guán í-king tsiù tāng tsuā, nā bô thâi-sí Pó-lô, puàⁿ-hāng mi̍h to m̄ tsia̍h. 15 Taⁿ lín kah gī-huē tio̍h kā iâⁿ-tiúⁿ iau-kiû, tshiáⁿ i tshuā Pó-lô lâi lín ê bīn-tsîng, ké-tsò lín beh koh siông-sè tsa-mn̄g i ê àn-tsîng. Guán tsún-pī hó à, tī i kàu tsia ê sî kā i thâi sí." 16 Pó-lô ê guē-sing thiaⁿ-tio̍h tsit-ê bâi-ho̍k ê im-bô͘, tsiū ji̍p-khì iâⁿ kā Pó-lô kóng. 17 Pó-lô kiò tsi̍t-ê liân-tiúⁿ lâi, kóng, "Tshiáⁿ tshuā tsit-ê siàu-liân-lâng khì kìⁿ iâⁿ-tiúⁿ, in-uī i ū tāi-tsì beh pò i tsai." 18 Liân-tiúⁿ tsiū tshuā siàu-liân-lâng khì kìⁿ iâⁿ-tiúⁿ, kóng, "Hit-ê siū kuaiⁿ ê Pó-lô kiò guá khì, kiû guá tshuā tsit-ê siàu-liân-lâng lâi kìⁿ lí. I ū tāi-tsì beh kā lí pò-kò." 19 Iâⁿ-tiúⁿ khan i ê tshiú khì piⁿ-á, mn̄g kóng, "Beh pò-kò guá tsai sím-mi̍h tāi-tsì?" 20 I kóng, "Iû-thài-lâng í-king kóng hó-sè, ké-tsò beh koh siông-sè tsa-mn̄g Pó-lô ê àn-tsîng, ē kiû lí bîn-á-tsài tshuā Pó-lô khì gī-huē. 21 Kiû lí m̄-thang thiaⁿ in ê uē, in-uī in ū sì-tsa̍p guā lâng bâi-ho̍k teh tán i. In bat tsiù-tsuā kóng, Nā bô thâi-sí Pó-lô, m̄ lim m̄ tsia̍h. Taⁿ in lóng tsún-pī hó-sè, teh thìng-hāu lí ê ín-tsún." 22 Iâⁿ-tiúⁿ kah siàu-liân-lâng khì, huan-hù i kóng, "M̄-thang tuì lâng kóng lí ū tsiong tsiah-ê tāi-tsì thong-ti guá."

Hō͘-sàng Pó-lô Khì Hō͘ Hui-li̍k-su Tsóng-tok
23 Iâⁿ-tiúⁿ huan-hù nn̄g-ê liân-tiúⁿ, kóng, "Ing-àm káu-tiám í-tsîng tio̍h tsún-pī pō͘-ping nn̄g pah, bé-ping tshit-tsa̍p, gia̍h tshiuⁿ ê ping nn̄g pah, tshut-huat khì Kai-sat-lī-a. 24 Koh tsún-pī bé hō͘ Pó-lô khiâ, hō͘-sàng i an-tsuân khì kàu tsóng-tok Hui-li̍k-su hia." 25 Iâⁿ-tiúⁿ tsiū siá tsi̍t-tiuⁿ phue án-ne: 26 Kik-ló-tiu Lū-se-a kā tsóng-tok Hui-li̍k-su tāi-jîn tshíng-an. 27 Tsit-ê lâng hō͘ Iû-thài-lâng lia̍h khì beh kā i thâi sí ê sî, guá tsi̍t-ē tsai i sī Lô-má kong-bîn, tsiū tuà ping khì kā i kiù. 28 Guá siūⁿ-beh bîng-pi̍k in kò i ê lí-iû, tsiū sàng i khì in ê gī-huē. 29 Guá tshâ-tshut i hō͘ lâng kò sī uī-tio̍h in ê lu̍t-huat piān-lūn, pīng-bô huān-tio̍h kai-sí á-sī kā i kuaiⁿ-kaⁿ ê tsuē. 30 Āu-lâi ū-lâng kā guá pò-kò kóng Iû-thài-lâng teh kè-bô͘ hām-hāi tsit-ê lâng. Guá suî-sî kā i sàng khì lí hia, mā bīng-līng kò i ê lâng mā tio̍h tī lí ê bīn-tsîng kā i khòng-kò." 31 Pō͘-ping tsip-hîng bīng-līng, tsiong Pó-lô thàu-mê tuà khì kau hō͘ An-thê-phàⁿ-tí. 32 Keh-tńg-ji̍t, pō͘-ping tńg-khì iâⁿ-pâng, hō͘ bé-ping kè-sio̍k hō͘-sàng Pó-lô. 33 In lâi-kàu Kai-sat-lī-a, tsiū tsiong hit-tiuⁿ phue kau hō͘ tsóng-tok, mā tsiong Pó-lô kau hō͘ i. 34 Tsóng-tok tha̍k hit-tiuⁿ phue liáu-āu, mn̄g Pó-lô sī tó-tsi̍t síng ê lâng, tsai-iáⁿ i sī Ki-lī-ka-síng ê lâng. 35 Tsiū kóng, "Tán kò lí ê lâng kàu-uī, guá ē siông-sè tshù-lí lí ê àn-kiāⁿ. Tsóng-tok tsiū huan-hù kā Pó-lô khu-liû tī Hi-lu̍t ê gê-mn̂g.