《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十四章

作者 巴克禮普世版小組 2014.08.10

Iû-thài-lâng Khòng-kò Pó-lô
1 Gō͘-ji̍t āu, tsè-si-tiúⁿ A-ná-nî-a kah kuí-nā-ê tiúⁿ-ló í-ki̍p tsi̍t-ê lu̍t-su Thiap-thó͘-lô, lâi-kàu Kai-sat-lī-a. In tuì Hui-li̍k-su tsóng-tok khòng-kò Pó-lô. 2 Pó-lô siū tiàu tshut-tîng, Thiap-thó͘-lô tsiū khai-sí khòng-kò, kóng, "Hui-li̍k-su tāi-jîn, guán tuì lí ê hiân-bîng tī-lí tit-tio̍h thài-pîng. Lí koh ū sian-kiàn tsi-bîng, hō͘ kok-ka tit-tio̍h kái-kik kah tsìn-pō͘. 3 Lí ê tik-tsìng hō͘ guán ta̍k-sî ta̍k-uī kám-siā put-tsīn. 4 Taⁿ guá m̄-káⁿ tam-gō͘ lí siuⁿ kú, kiû lí khuan-iông lâi thiaⁿ guán kuí kù uē. 5 Guán ū tshâ-tshut tsit-ê lâng ná tshin-tshiūⁿ un-i̍k, tī tsuân-sè-kài ê Iû-thài-lâng tiong-kan ín-khí jiáu-luān, i sī Ná-sat-li̍k-tóng ê thâu-ba̍k. 6 Liân sìng-tiān i to beh kā i ù-uè. Guán tsiū kā i lia̍h khí-lâi, siūⁿ-beh tsiàu guán ka-kī ê lu̍t-huat kā i sím-phuàⁿ. 7 Bô-phah-sǹg, iâⁿ-tiúⁿ Lū-se-a lâi kan-sia̍p, tsiong i tuì guán ê tshiú-tiong kiông tshiúⁿ-khì, bīng-līng kò i ê lâng tio̍h lâi lí tsia. 8 Tshiáⁿ lí tshin-sin kā i sím-mn̄g, tsiū ē bîng-pi̍k guán kò i ê ta̍k-hāng tāi-tsì. 9 Tsāi-tiûⁿ ê Iû-thài-lâng lóng tsham lo̍h-khì khòng-kò i kóng, "Tāi-tsì khak-si̍t sī án-ne."

Pó-lô Uī Ka-kī Piān-hō͘
10 Tsóng-tok tìm thâu kiò Pó-lô tap-piān. I tsiū kóng, "Guá tsai lí tsip-tsìng sím-phuàⁿ àn-kiāⁿ tsin-tsē nî, só͘-í guá huaⁿ-hí tī lí ê bīn-tsîng uī ka-kī piān-hō͘. 11 Lí tiâu-tsa tsiū ē tsai, guá tsiūⁿ Iâ-lō͘-sat-líng kìng-pài kàu taⁿ tsí-put-kò tsa̍p-jī ji̍t. 12 Iû-thài-lâng pīng-bô khuàⁿ-tio̍h guá tī tiān-lāi kah lâng piān-lūn, mā bô khuàⁿ-tio̍h guá tī huē-tn̂g á-sī siâⁿ-lāi siàn-tōng bîn-tsiòng. 13 In mā bē-tàng tuì lí the̍h-tshut tsit-má teh kā guá khòng-kò ê tsìng-kì. 14 M̄-koh guá tio̍h tuì lí sîng-jīn tsi̍t-hāng tāi-tsì, tsiū-sī guá tsiàu in khuàⁿ-tsò īⁿ-tuan ê Tō-lō͘ lâi ho̍k-sāi guán tsó͘-sian ê Siōng-Tsú. Guá mā ū siong-sìn Mô͘-se ê lu̍t-huat kah tī sian-ti ê tsheh só͘ kì-tsài-.ê. 15 Guá tuì Siōng-Tsú ū khǹg kah in kāng-khuán ê ǹg-bāng, tsiū-sī bô-lūn gī-lâng kah put-gī ê lâng lóng ē tuì sí koh-ua̍h. Tse mā sī in ka-kī só͘ teh him-bō͘ ê tāi-tsì. 16 In-uī án-ne, guá tuì Siōng-Tsú kah tuì lâng, lóng pó-tshî tshing-pi̍k ê liông-sim. 17 Guá lī-khui Iâ-lō͘-sat-líng kuí-nā nî, taⁿ koh tńg-lâi sī beh tsín-tsè tông-pau, koh hiàn lé-mi̍h. 18 In tī sìng-tiān khuàⁿ-tio̍h guá ê sî, guá í-king uân-sîng kiat-tsīng-lé. Hit sî, pīng-bô kûn-tsiòng, mā bô jiáu-luān. 19 Kan-ta ū kuí-nā-ê tuì A-se-a-síng lâi ê Iû-thài-lâng tī hia. In nā beh kò guá, ing-kai ka-kī lâi lí ê bīn-tsîng kò guá tsiah tio̍h ah. 20 Nā bô guá khiā tī gī-huē teh sin-sò͘ ê sî, in tio̍h tsí-tshut guá ū sím-mi̍h m̄-tio̍h ê só͘-tsāi. 21 Tsí-ū tsi̍t-hāng tāi-tsì ē-tàng kā guá khòng-kò, tsiū-sī guá bat khiā tī in tiong-kan tuā-siaⁿ huah: 'Guá kin-á-ji̍t siū lín sím-phuàⁿ sī uī-tio̍h sí-lâng koh-ua̍h ê tāi-tsì.'" 22 Hui-li̍k-su tuì tsit-ê Tō-lō͘ ê tāi-tsì siong-tong tshing-tshó, tsiū suan-pò͘ thè-tîng, kóng, "Tán iâⁿ-tiúⁿ Lū-se-a lo̍h-lâi ê sî, guá tsiah lâi phuàⁿ-kuat lín ê àn-kiāⁿ." 23 JIân-āu Hui-li̍k-su bīng-līng liân-tiúⁿ kò͘-siú Pó-lô, mā hō͘ i tām-po̍h-á tsū-iû hîng-tōng, mā tsún i ê pîng-iú sàng i su-iàu ê mi̍h-kiāⁿ lâi hō͘ i.

Pó-lô Tī Hui-li̍k-su kah Thó͘-se-lah Bīn-tsîng
24 Kuè kuí-nā ji̍t liáu-āu, Hui-li̍k-su kah i ê bó͘ Thó͘-se-lah tsò-hué lâi, i sī Iû-thài-lâng, tsiū kiò Pó-lô tshut-lâi, in ài-beh thiaⁿ Pó-lô káng-lūn sìn Ki-tok Iâ-so͘ ê tō-lí. 25 Pó-lô kóng-kàu kong-gī, tsiat-tsè kah tsiong-lâi ê sím-phuàⁿ ê sî, Hui-li̍k-su put-tsí kiaⁿ, ìn kóng, "Taⁿ lí hó tshut-khì à. Ū ki-huē tsiah koh tshiáⁿ lí lâi." 26 Līng-guā i mā ǹg-bāng Pó-lô ē siap gîn hō͘ i, só͘-í siông-siông tiàu i lâi, kah i tâm-lūn. 27 Kuè nn̄g nî, Pho-kiû Hui-su-to͘ suà-tsiap Hui-li̍k-su tsò tsóng-tok. Hui-li̍k-su uī-tio̍h beh hō͘ Iû-thài-lâng huaⁿ-hí, kè-sio̍k kā Pó-lô kuaiⁿ tī kaⁿ-ni̍h.