《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第三章

作者 巴克禮普世版小組 2014.09.28

1 Án-ne kóng khí-lâi, tsò Iû-thài-lâng ū sím-mi̍h iu-tiám? Siū kat-lé ū sím-mi̍h lī-ik? 2 Tī ta̍k hong-bīn lóng ū tsin-tsē hó-tshù. Thâu-tsi̍t-hāng tsiū-sī Siōng-Tsú ū tsiong I ê uē kau-thok in. 3 In tiong-kan nā ū-lâng bô sìn-si̍t, In ê bô sìn-si̍t kám ē hō͘ Siōng-Tsú ê uē piàn-tsò bô sìn-si̍t? 4 Tsua̍t-tuì bē! Sīm-tsì só͘-ū ê lâng lóng pe̍h-tsha̍t, Siōng-Tsú mā it-tīng sī tsin-si̍t-.ê. Tsiàu Sìng-king só͘ kì-tsāi: "Lí kóng-uē ê sî, lâng ē jīm-tīng Lí só͘ kóng ê sī tio̍h, Lí siū sím-phuàⁿ ê sî, mā ē tit-tio̍h sìng-lī.”( tsù: SPh 51:4) 5 M̄-koh lán ê put-gī nā ē-tàng hián-bîng Siōng-Tsú ê kong-gī, lán ē-tàng kóng sím-mi̍h lè? Guá tsiàu sè-kan-lâng ê siūⁿ-huat kóng, Siōng-Tsú tuì lán siū-khì sī m̄-tio̍h, kám sī án-ne? 6 Tsua̍t-tuì m̄-sī! Siōng-Tsú nā m̄-sī kong-gī ê, I ná ē-tàng sím-phuàⁿ sè-kan? 7 Guá ê hi-ké nā bô láu-si̍t thang hō͘ Siōng-Tsú ê tsin-si̍t koh-khah bîng-hián, hō͘ I koh-khah ū îng-kng, guá ná-ē iáu-koh hō͘ I suan-phuàⁿ tsò tsuē-jîn? 8 Án-ne ná-ē m̄ kóng,“Lán lâi tsò pháiⁿ thang hō͘ hó tāi-tsì hián-bîng?”Khak-si̍t ū-lâng án-ne kóng lâi kā guán tiòng-siong, tsit-khuán lâng ing-kai siū tsik-hua̍t.

Sè-kan Bô Gī-lâng
9 Án-ne, lán Iû-thài-lâng kám-ū pí Guā-pang-lâng khah iu-siù? Bô, tsi̍t-tiám-tiám-á to bô! In-uī guá í-king ū tsí-tsik Iû-thài-lâng kah Guā-pang-lâng lóng siū tsuē ê kuán-hat. 10 Tsiàu Sìng-king só͘ kì-tsài:“Lóng-bô gī-lâng, liân tsi̍t-ê to bô! 11 Bô-lâng bîng-pi̍k sī-hui, mā bô-lâng tshuē-kiû Siōng-Tsú. 12 Lâng-lâng lī-khui tsiàⁿ-lō͘, lóng kiâⁿ bê-lō͘. Lóng bô-lâng tsò hó, liân tsi̍t-ê to bô.( tsù: SPh 14:1-3) 13 In ê nâ-âu tshin-tshiūⁿ khui-khui ê bōng. In ê tshuì-tsi̍h khi-tsà lâng. In ê tshuì-tûn ū tsuâ ê to̍k.( tsù: SPh 5:9) 14 In tshuì-lāi tshiong-muá ok-to̍k ê tsiù-tsó͘.( tsù:SPh 10:7) 15 In tsáu tsin-kín, kip-beh thâi-lâng. 16 In king-kuè ê lō͘ ū huí-bia̍t kah pi-tshám. 17 In m̄-tsai ū pîng-an ê lō͘.( tsù: ISA 59:7-8) 18 In gán-tiong bô kìng-uì Siōng-Tsú.”( tsù: SPh 36:1) 19 Taⁿ lán tsai lu̍t-huat it-tshè ê iau-kiû sī tuì hiah-ê siū lu̍t-huat kuán-hat ê lâng teh kóng ê, hō͘ lâng bē-tàng piān-kái, hō͘ tsuân sè-kài lóng siū Siōng-Tsú ê sím-phuàⁿ. 20 Só͘-í bô-lâng ē-tàng khò tsun-siú lu̍t-huat lâi hō͘ Siōng-Tsú khuàⁿ-tsò gī-lâng. Lu̍t-huat sī beh hō͘ lâng tsai-iáⁿ sím-mi̍h sī tsuē.

Thong-kuè Sìn-gióng Lâi Kah Siōng-Tsú Hô-hó
21 Taⁿ Siōng-Tsú í-king kā lán tsí-sī, lán m̄-bián khò lu̍t-huat tsiū ē-tàng kah I kiàn-li̍p hô-ha̍p ê kuan-hē. Lu̍t-huat kah sian-ti mā lóng ū uī-tio̍h tsit-hāng tāi-tsì tsò kiàn-tsìng. 22 Kah Siōng-Tsú hô-ha̍p ê kuan-hē sī thong-kuè sìn Iâ-so͘ Ki-tok. Siōng-Tsú hō͘ só͘-ū sìn ê lâng lóng kāng-khuán tit-tio̍h tsit-ê hô-ha̍p ê kuan-hē. 23 In-uī só͘-ū ê lâng lóng huān-tsuē, bē-tàng niá-siū Siōng-Tsú ê îng-kng. 24 M̄-koh Siōng-Tsú bô tiâu-kiāⁿ ê un-sù hō͘ lâng ē-tàng thong-kuè Ki-tok Iâ-so͘ lâi uân-sîng ê kiù-sio̍k, thang tit-tio̍h kah Siōng-Tsú ū hô-ha̍p ê kuan-hē. 25 Siōng-Tsú hi-sing Ki-tok tsò sio̍k-tsuē ê tsè-phín, īng I ê hueh hō͘ sìn I ê lâng ê tsuē tit-tio̍h sià-bián, Siōng-Tsú khuan-iông bô tui-kiù lâng kuè-khì só͘ huān ê tsuē. 26 Tsit-má, Siōng-Tsú hō͘ só͘-ū sìn Iâ-so͘ ê lâng, kah I ū hô-ha̍p ê kuan-hē. Siōng-Tsú īng án-ne lâi hián-bîng I ê kong-gī. 27 Nā án-ne, lán iáu ū sím-mi̍h thang khua-kháu? Lóng bô! Khò sím-mi̍h huat-tsik? Khò hîng-uî sī-bô? M̄-sī! Sī khò sìn ê huat-tsik. 28 Só͘-í lán ê kiat-lūn sī: lâng ē-tàng kah Siōng-Tsú kiàn-li̍p hô-ha̍p ê kuan-hē, m̄-sī khò tsun-siú lu̍t-huat, sī khò sìn lâi tit-tio̍h. 29 Siōng-Tsú kám kan-taⁿ sī Iû-thài-lâng ê Siōng-Tsú? I mā sī Guā-pang-lâng ê Siōng-Tsú, kám m̄-sī? Sī, I mā sī Guā-pang-lâng ê Siōng-Tsú. 30 Kì-jiân Siōng-Tsú tsí-ū tsi̍t uī, I hō͘ siū kat-lé ê kah bô siū kat-lé ê, lóng kāng-khuán tuì sìn lâi tit-tio̍h kah I ū hô-ha̍p ê kuan-hē. 31 Án-ne, lán in-uī tsit-ê sìn suah hō͘ lu̍t-huat sit-khì kong-hāu? Tong-jiân m̄-sī, tian-tò sī khak-li̍p lu̍t-huat.