《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第二章

作者 巴克禮普世版小組 2014.09.21

Siōng-Tsú Kong-gī ê Sím-phuàⁿ
1 Só͘-í lí tsit-ê ài phue-phuàⁿ pa̍t-lâng ê lâng, bô-lūn lí sī sím-mi̍h lâng lóng bē-tàng piān-kái, in-uī lí phue-phuàⁿ pa̍t-lâng tsò ê tāi-tsì, ka-kī mā ta̍k-hāng lóng teh tsò, án-ne lí phue-phuàⁿ pa̍t-lâng, tsiū-sī teh tīng ka-kī ê tsuē. 2 Lán tsai, tsò tsit-khuán tāi-tsì ê lâng, Siōng-Tsú ē kong-tsìng kā i sím-phuàⁿ. 3 Lín tsiah-ê phue-phuàⁿ pa̍t-lâng ka-kī mā khì tsò-kāng-khuán tāi-tsì ê lâng ah, lín siūⁿ-kóng lín ē-tàng siám-phiah Siōng-Tsú ê sím-phuàⁿ sī-bô? 4 Á-sī lí khuàⁿ-khin Siōng-Tsú ki̍k-tuā ê jîn-tsû, khuan-iông kah jím-nāi. Lí kám m̄-tsai Siōng-Tsú tuì lí jîn-tsû, sī teh ín-tshuā lí hué-kái? 5 Lí ê sim kò͘-tsip m̄ hué-kái, sī teh ke-thiⁿ Siōng-Tsú ê siū-khì. Tsit-ê siū-khì ē tī I kong-gī sím-phuàⁿ hit ji̍t hián-bîng. 6 Siōng-Tsú beh tsiàu ta̍k-lâng ê hîng-uî kā in pò-ìng.( tsù: SPh 66:12; TsG 24:12) 7 Hiah-ê kian-tshî tsò hó-sū, tui-kiû îng-kng, tsun-kuì kah bē pāi-huāi ê sèⁿ-miā ê lâng, Siōng-Tsú ē sù in íng-uán ê ua̍h-miā. 8 Hiah-ê tsū-su, puē-gi̍k tsin-lí, tian-tò khì sūn-tsiông put-gī ê lâng, Siōng-Tsú ē īng siū-khì kah hîng-hua̍t lâi kā in pò-ìng. 9 Só͘-ū tsò pháiⁿ ê lâng ē tú-tio̍h huān-lān kah khùn-khó͘, Iû-thài-lâng sing tú-tio̍h, āu-lâi tsiah suà kàu Hi-lia̍p-lâng. 10 M̄-koh só͘-ū tsò hó-sū ê lâng ē tit-tio̍h îng-kng, tsun-kuì kah pîng-an, Iû-thài-lâng sing tit-tio̍h, āu-lâi tsiah suà kàu Hi-lia̍p-lâng. 11 In-uī Siōng-Tsú tuì lâng bô phian-sim. 12 Guā-pang-lâng bô siū Mô͘-se ê lu̍t-huat kuán-hat, in nā huān-tsuē mā ē siū lu̍t-huat í-guā ê sím-phuàⁿ lâi bia̍t-bông. Nā-sī siū Mô͘-se ê lu̍t-huat kuán-hat ê lâng, in nā huān-tsuē ē tsiàu lu̍t-huat siū sím-phuàⁿ. 13 In-uī kan-taⁿ thiaⁿ lu̍t-huat ê lâng, tī Siōng-Tsú ê bīn-tsîng m̄-sī gī-lâng. Tsí ū si̍t-hîng Lu̍t-huat ê lâng tsiah ē hō͘ Siōng-Tsú jīn-tīng tsò gī-lâng. 14 Bô Lu̍t-huat ê Guā-pang-lâng nā tsiàu pún-sìng si̍t-hîng Lu̍t-huat ê kui-tīng, in sui-jiân bô Mô͘-se ê lu̍t-huat, in pún-sin tsiū-sī ka-kī ê lu̍t-huat. 15 In ê hîng-uî sī teh piáu-sī Lu̍t-huat ê iau-kiû ū khik tī in sim-lāi. In ê liông-sim mā ē tsìng-si̍t, in-uī in ê lāi-sim sî-sî teh ka-kī tsik-pī, ū-sî ka-kī piān-hō͘. 16 Só͘-í tī sím-phuàⁿ hit ji̍t, tsiàu guá só͘ thuân ê hok-im, Siōng-Tsú ē thong-kuè Ki-tok Iâ-so͘ lâi sím-phuàⁿ lâng sim-lāi ún-ba̍t ê tāi-tsì.

Iû-thài-lâng kah Lu̍t-huat
17 Án-ne lí leh, lí ka-kī tsū-tshing Iû-thài-lâng, uá-khò lu̍t-huat, koh khua-kháu lín ê Siōng-Tsú. 18 Lí ū ha̍k-si̍p lu̍t-huat, tsai-iáⁿ Siōng-Tsú ê tsí-ì, ē-hiáu hun-pia̍t sī-hui. 19 Lí tshim-sìn ka-kī sī sit-bîng ê lâng ê tshuā-lō͘, o͘-àm tiong ê lâng ê kng, 20 gōng-lâng ê tsí-tō-tsiá, siàu-liân-lâng ê lāu-su. Lí siūⁿ-kóng kì-jiân ū lu̍t-huat, tuì tì-sik kah tsin-lí tsiū ū pá-ak. 21 Lí kà-sī pa̍t-lâng, sī án-tsuáⁿ bô kà-sī ka-kī? Lí kà lâng m̄-thang thau-the̍h, ka-kī ū thau-the̍h bô? 22 Lí kóng m̄-thang huān kan-îm, ka-kī ū huān-tio̍h bô? Lí iàm-ò͘ ngó͘-siōng, ka-kī ū khì thau-the̍h biō-sī ê mi̍h bô? 23 Lí khua-kháu kóng ū lu̍t-huat, ka-kī ū uî-puē lu̍t-huat lâi bú-jio̍k Siōng-Tsú á bô? 24 Sìng-king ū kì-tsāi: "In-uī lín ê iân-kò͘, Siōng-Tsú ê miâ tī Guā-pang-lâng ê tiong-kan siū siat-to̍k."( tsù: ISA 52:5 LXX) 25 Lí nā tsun-siú lu̍t-huat, kat-lé tsiū ū kè-ta̍t. Lí nā huān-huat, kat-lé tsiū kah bô kat-lé kāng-khuán. 26 Bô siū kat-lé ê lâng nā tsun-siú lu̍t-huat ê kui-tīng, kám bē-tàng sǹg-tsò ū siū kat-lé? 27 Jio̍k-thé bô siū kat-lé m̄-koh ū tsun-siú lu̍t-huat ê lâng ē kā lí tīng-tsuē, in-uī lí ū lu̍t-huat ê tiâu-bûn koh ū siū kat-lé tian-tó bô tsun-siú lu̍t-huat. 28 Kî-si̍t guā-piáu sī Iû-thài-lâng, pīng m̄-sī tsin-tsiàⁿ ê Iû-thài-lâng. Jio̍k-thé siū kat-lé ê lâng mā m̄-sī tsin-tsiàⁿ ê kat-lé. 29 Lāi-tsāi ê Iû-thài-lâng tsiah sī tsin-tsiàⁿ ê, lāi-sim tsiap-siū kat-lé ê lâng tsiah sī tsin-tsiàⁿ ê kat-lé, m̄-sī khò lu̍t-huat ê tiâu-bûn ê kat-lé. Tsit-khuán lâng siū o-ló m̄-sī tuì lâng, sī tuì Siōng-Tsú.