《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第六章

作者 巴克禮普世版小組 2014.10.19

Khì-tsua̍t Tsuē, Uī Siōng-Tsú Lâi Ua̍h
1 Án-ne, lán beh án-tsuáⁿ kóng? Lán kám thang kè-sio̍k tī tsuē-ok tiong sing-ua̍h lâi hō͘ un-tián koh-khah ke-thiⁿ? 2 Tsua̍t-tuì m̄-thang! Lán í-king kah tsuē-ok tuān-tsua̍t kuan-hē, kám thang kè-sio̍k tī tsuē-ok tiong sing-ua̍h? 3 Lín kám m̄-tsai, lán lóng siū sé-lé lâi kah Ki-tok Iâ-so͘ kiat-ha̍p, tsiū-sī siū sé-lé lâi kah I tsò-hué sí. 4 Kì-jiân lán thong-kuè sé-lé kah Ki-tok tâng-tsê sí, tâng-tsê siū bâi-tsòng, ná tshin-tshiūⁿ Ki-tok thong-kuè Thiⁿ-pē îng-kng ê kuân-lîng tuì sí koh-ua̍h, lán mā thang kuè sin ê sing-ua̍h. 5 Lán kì-jiân kah Ki-tok tsiâⁿ-tsò tsi̍t-thé lâi thé-giām sí, lán it-tīng mā ē kah I kiat-ha̍p lâi koh-ua̍h. 6 Lán tsai, lán kū ê tsū-ngó͘ kah Ki-tok tsò-hué tìng si̍p-jī-kè, sī beh hō͘ lán tsāi-lâi siū tsuē sok-pa̍k hit-ê lâng huí-bia̍t, hō͘ lán bô koh tsò tsuē ê lô͘-lē. 7 In-uī lâng it-tàn sí-khì, tsiū tuì tsuē tit-tio̍h tháu-pàng. 8 Lán kì-jiân kah Ki-tok tsò-hué sí, lán siong-sìn lán mā ē kah I tsò-hué koh-ua̍h. 9 Lán tsai Ki-tok í-king tuì sí koh-ua̍h, I bē koh sí. Sí bô koh kā I kuán-hat. 10 In-uī Ki-tok sí tsi̍t-pái tsiū kah tsuē uân-tsuân tuān-tsua̍t kuan-hē. I tsit-má ua̍h-teh, sī uī-tio̍h Siōng-Tsú teh ua̍h. 11 Án-ne, lín mā tio̍h khuàⁿ ka-kī í-king kah tsuē tuān-tsua̍t kuan-hē, tsit-má kah Ki-tok Iâ-so͘ kiat-liân, uī-tio̍h Siōng-Tsú teh ua̍h. 12 Só͘-í, m̄-thang koh tsiong ē-sí ê sing-khu kau hō͘ tsuē tsi-phuè, khì sūn-ho̍k jio̍k-thé ê io̍k-bōng. 13 Mā m̄-thang tsiong sing-khu ê ki-thé kau hō͘ tsuē khì tsò put-gī ê kang-khū, tian-tó tio̍h tsò tsi̍t-ê tuì sí koh-ua̍h ê lâng, tsiong sing-khu hiàn hō͘ Siōng-Tsú, tsiong sing-khu ê kok ki-thé hiàn hō͘ Siōng-Tsú tsò gī ê kang-khū. 14 M̄-thang hō͘ tsuē kā lín tsi-phuè, in-uī lín m̄-sī ua̍h tī lu̍t-huat ē-bīn, sī ua̍h tī un-tián ē-bīn.

Kong-gī ê Lô͘-lē
15 Án-ne lán kì-jiân m̄-sī ua̍h tī lu̍t-huat ē-bīn, sī tī un-tián ē-bīn, tsiū thang huān-tsuē sī-bô? Tsua̍t-tuì m̄-thang! 16 Lín kám m̄-tsai, lín nā tsiong ka-kī kau hō͘ bó͘-tsi̍t-lâng tsò lô͘-lē lâi sūn-ho̍k i, lín tsiū-sī hit lâng ê lô͘-lē? Án-ne kóng khí-lâi, lín sī tsò tsuē ê lô͘-lē kiâⁿ-ji̍p sí-bông, á-sī tsò Siōng-Tsú ê lô͘-lē lâi sūn-ho̍k I, kiat-kó ū hô-ha̍p ê kuan-hē? 17 Kám-siā Siōng-Tsú, lín sui-jiân bat tsò tsuē ê lô͘-lē, tsit-má lín í-king tsuân-sim sūn-ho̍k hit-ê thuân-siū hō͘ lín tsò kui-huān ê kà-sī. 18 Lín í-king tuì tsuē tit-tio̍h tháu-pàng lâi tsiâⁿ-tsò gī ê lô͘-lē. 19 Khióng-kiaⁿ lín bē liáu-kái, guá īng it-puaⁿ-lâng ē-tàng liáu-kái ê uē kā lín suat-bîng. Taⁿ, tshin-tshiūⁿ lín í-tsîng tsiong sing-khu uân-tsuân kau hō͘ ù-uè kah put-huat tsò lô͘-lē, tì-sú put-huat ê tāi-tsì jú-lâi-jú ke-thiⁿ. Tsit-má lín tio̍h tsiong sing-khu uân-tsuân hiàn hō͘ gī tsò sìng-kiat ê lō͘-īng. 20 Lín tsò tsuē-ok ê lô͘-lē ê sî-tsūn, lín bô siū gī ê sok-pa̍k. 21 Hit sî, lín tsò tsit-má khuàⁿ-tsò kiàn-siàu ê tāi-tsì, kiat-kó án-tsuáⁿ? Kiat-kio̍k sī sí. 22 Taⁿ lín í-king tuì tsuē tit-tio̍h tháu-pàng, tsiâⁿ-tsò Siōng-Tsú ê lô͘-lē, kiat-kó sī tsiâⁿ-tsò sìng-kiat, kiat-kio̍k sī íng-uán ê ua̍h-miā. 23 In-uī tsuē ê tāi-kè sī sí, m̄-koh Siōng-Tsú thong-kuè Tsú Ki-tok Iâ-so͘ pe̍h-pe̍h sù hō͘ lán ê un-tián sī íng-uán ê ua̍h-miā.