《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第七章

作者 巴克禮普世版小組 2014.10.26

Īng Hun-in Tsò Lē
1 Hiaⁿ-tī tsí-muē ah, guá taⁿ sī tuì lín bat lu̍t-huat ê lâng teh kóng. Lín kám m̄-tsai, lâng ua̍h-teh tsiah siū lu̍t-huat kuán-hat? 2 Tuì tsi̍t-ê ū kiat-hun ê tsa-bó͘-lâng lâi kóng, tiōng-hu ua̍h-teh ê sî tsiah siū lu̍t-huat ê sok-pa̍k lâi kah i ê tiōng-hu kiat-liân. Tiōng-hu nā sí khì tsiū bô koh siū tsit-ê lu̍t-huat ê sok-pa̍k. 3 Só͘-í tiōng-hu iáu ua̍h-teh, nā kah pa̍t-ê tsa-po͘-lâng tuà tsò-huè, tsiū ē hō͘ lâng kiò tsò îm-hū. Tiōng-hu nā sí-khì, tsiū tit-tio̍h tsū-iû, thuat-lī tsit-ê lu̍t-huat ê sok-pa̍k, sui-jiân kah pa̍t-ê tsa-po͘-lâng tuà tsò-hué, mā m̄-sī îm-hū. 4 Tshin-ài ê hiaⁿ-tī tsí-muē, tshin-tshiūⁿ án-ne, lín í-king kah Ki-tok ê sing-khu kiat-liân, kah lu̍t-huat tuān-tsua̍t kuan-hē, bô koh siū i ê sok-pa̍k, só͘-í lín tsit-má sī kui-sio̍k tī Hit-uī tuì sí koh-ua̍h ê Ki-tok, I beh hō͘ lán thang uī-tio̍h Siōng-Tsú kiat hó kué-tsí. 5 Lán tsiàu jio̍k-thé ê pún-sìng teh ua̍h ê sî, lu̍t-huat kik-khí lán huān-tsuē ê io̍k-liām, tī lán sing-khu pah-thé teh ūn-tsok, kiat sí-bông ê kué-tsí. 6 M̄-koh, tsit-má lán í-king thuat-lī lu̍t-huat, bô koh siū i ê sok-pa̍k. Án-ne, lán ho̍k-sāi Siōng-Tsú, m̄-sī tsiàu lu̍t-huat ê kū hong-sik, sī tsiàu Sìng-Sîn ê sin hong-sik.

Lu̍t-huat Kah Tsuē
7 Án-ne lán beh án-tsuáⁿ kóng? Lu̍t-huat kám sī tsuē? Tsua̍t-tuì m̄-sī, m̄-koh nā bô tuì lu̍t-huat, guá tsiū m̄-tsai tsuē sī sím-mi̍h, in-uī lu̍t-huat nā bô kóng, "M̄ thang tham-sim, guá tsiū m̄-tsai tham-sim sī sím-mi̍h."( tsù: CAK 20:17; SBK 5:21) 8 Tsuē lī-iōng kài-bīng tī guá ê sim-lāi ín-khí ta̍k-tsióng ê pháiⁿ io̍k-liām. Nā-bô lu̍t-huat, tsuē tsiū bô tsok-iōng. 9 Tsîng bô lu̍t-huat, guá mā teh ua̍h. Kài-bīng tsi̍t-ē lâi, tsuē tsiū ua̍h khí-lâi, guá suah sí-khì. 10 Kài-bīng pún-lâi sī beh hō͘ lâng ū ua̍h-miā, m̄-koh tsiàu guá ê thé-giām, tian-tò sī hāi lâng khì sí. 11 In-uī tsuē tshuē ki-huē lī-iōng kài-bīng khi-phiàn guá, mā lī-iōng kài-bīng hāi-sí guá. 12 Lu̍t-huat pún-sin sī sîn-sìng, kài-bīng mā sī sîn-sìng, kong-tsìng, koh liông-siān. 13 Nā-sī án-ne, hit-ê liông-siān ê hāi-sí guá sī-bô? Tsua̍t-tuì m̄-sī! Sī tsuē thong-kuè hit-ê liông-siān lâi hāi-sí guá, hō͘ tsuē ê pún-tsit hián-lō͘, tsiū án-ne, tsuē lī-iōng kài-bīng hō͘ i ki̍k-kî ok-to̍k ê pún-tsit koh-khah hián-lō͘ tshut-lâi.

Lâng ê Nn̄g-tsióng Pún-sìng
14 Lán tsai lu̍t-huat sī lîng-sìng ê, m̄-koh guá sī sio̍k jio̍k-thé ê, í-king bē hō͘ tsuē tsò lô͘-lē. 15 Guá bē liáu-kái guá ka-kī ê só͘-tsò, in-uī guá ài tsò ê, bô khì tsò, tian-tò khì-tsò guá bô ài tsò-.ê. 16 Guá nā khì tsò guá bô ài tsò ê, tsiū-sī tông-ì tsit-ê lu̍t-huat sī hó. 17 Guá án-ne tsò, kî-si̍t m̄-sī guá teh tsò, sī tiàm-tī guá sim-lāi ê tsuē teh tsò. 18 Guá tsai guá ê pún-sìng lāi-bīn bô liông-siān. Guá ū tsò-hó ê ì-guān, m̄-koh bô tsò hó ê khuì-la̍t. 19 Guá bô khì tsò guá só͘ ì-ài ê hó, tian-tò khì tsò guá bô ì-ài ê pháiⁿ. 20 Guá nā tsò guá bô ì-ài ê pháiⁿ, m̄-sī guá pún-sin teh tsò, sī tiàm-tī guá lāi-bīn ê tsue teh tsò. 21 Án-ne guá ū huat-hiān tsi̍t-ê huat-tsik, tsiū-sī tng guá ài tsò hó ê sî, pháiⁿ tsiū kā guá tîⁿ-teh. 22 Guá lāi-sim ê tsū-ngó͘ ì-ài Siōng-Tsú ê lu̍t-huat, 23 m̄-koh guá khuàⁿ, tī guá ê sing-khu ū līng-guā tsi̍t-ê huat-tsik teh kah guá lāi-sim ê huat-tsik kau-tsiàn, hāi guá khut-ho̍k tī guá sing-khu lāi-bīn ê tsuē ê huat-tsik. 24 Guá tsò-lâng ná-ē hiah tshi-tshám! siáⁿ-lâng ē-tàng kiù guá thuat-lī hit-ê tsù-tiāⁿ ē sí ê sing-khu? 25 Kám-siā Siōng-Tsú, thong-kuè Tsú Iâ-so͘ Ki-tok lâi kiù guá! Án-ne guá ê lāi-sim sī sūn-ho̍k Siōng-Tsú ê lu̍t-huat, m̄-koh guá ê jio̍k-thé sī sūn-ho̍k tsuē ê huat-tsik.