《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第一章

作者 巴克禮普世版小組 2015.04.26

1 Guá sī Pó-lô, hōng Siōng-Tsú ê tsí-ì tsò Ki-tok Iâ-so͘ ê sù-tô͘. Guá kah hiaⁿ-tī Thê-mô͘-thài siá phue hō͘ tī Ko-lîm-to Siōng-Tsú ê kàu-huē kah tsuân A-kai-a só͘-ū ê sìn-tô͘. 2 Guān lán ê Thiⁿ-Pē Siōng-Tsú kah Tsú Iâ-so͘ Ki-tok siúⁿ-sù lín un-tián kah pîng-an!

Pó-lô Kám-siā Siōng-Tsú
3 Lán tio̍h o-ló Tsú Iâ-so͘ Ki-tok ê Pē Siōng-Tsú, I sī jîn-tsû ê Thiⁿ-Pē, siúⁿ-sù ta̍k-khuán an-uì ê Siōng-Tsú. 4 Tī lán it-tshè ê huān-lān tiong, I an-uì lán, hō͘ lán ē-tàng īng Siōng-Tsú tuì lán ê an-uì lâi an-uì hiah-ê tú-tio̍h huān-lān ê lâng. 5 Tú tshin-tshiūⁿ lán kah Ki-tok tsò-hué siū tsióng-tsióng ê khó͘-lān, lán mā thong-kuè Ki-tok siū-tio̍h hiah-ni̍h tsē ê an-uì. 6 Guán nā tú-tio̍h huān-lān, mā sī beh hō͘ lín tit-tio̍h an-uì kah tsín-kiù; guán nā tit-tio̍h an-uì, mā sī beh hō͘ lín tit-tio̍h an-uì, ū khuì-la̍t thang jím-siū kah guán kāng-khuán ê khó͘-lān. 7 Guán tuì lín ê ǹg-bāng bē iô-tāng, in-uī guán tsai lín kah guán tsò-hué siū-khó͘, lín mā ē kah guán kāng-khuán siū an-uì. 8 Hiaⁿ-tī tsí-muē ah, guán ài lín tsai, guán tī A-se-a-síng tú-tio̍h ê huān-lān, guán só͘ taⁿ ê tàⁿ hui-siông tāng, tāng kah taⁿ bē khí, suah kiông-beh ua̍h bē lo̍h-khì. 9 Guán kám-kak í-king hō͘ lâng phuàⁿ sí-hîng. Tsit-hāng tāi-tsì sī beh hō͘ guán bô uá-khò ka-kī, tsí-ū uá-khò hō͘ sí-lâng koh-ua̍h ê Siōng-Tsú. 10 Siōng-Tsú ū kiù guán thuat-lī sí-bông, tsiong-lâi mā ē koh kiù guán. Guán khak-sìn I tsiong-lâi mā ē koh-tsài kiù guán. 11 Lín mā tio̍h thè guán kî-tó lâi pang-tsō͘ guán, án-ne tsin-tsē lâng uī guán kî-tó hō͘ guán bông-un, mā ū tsin-tsē lâng uī-tio̍h guán tit-tio̍h tsiok-hok lâi kám-siā Siōng-Tsú.

Pó-lô Kái-piàn Kè-uē
12 Guán só͘ khua-kháu ê tsiū-sī: guán ê liông-sim tsìng-bîng, guán tī sè-kan teh sing-ua̍h lóng ū tsiàu Siōng-Tsú ê sìng-kiat kah sîng-si̍t, m̄-sī uá-khò lâng ê tì-huī, sī uá-khò Siōng-Tsú ê un-tián. Guán tuì-thāi lín koh-khah sī án-ne. 13 Guán siá hō͘ lín ê lóng sī lín tha̍k liáu ē liáu-kái-.ê. Guá ǹg-bāng lín kàu bué lóng ē thiat-té liáu-kái. 14 Án-ne tī lán ê Tsú Iâ-so͘ tsài-lîm ê ji̍t, lín ē tsò guán ê khua-kháu, guán mā ē tsò lín ê khua-kháu. 15 In-uī ū tsit-ê khak-sìn, guá tsiah kuat-tīng sing lâi hóng-būn lín, hō͘ lín thang tîng-sin koh-tsài tit-tio̍h tsiok-hok. 16 Guá kè-uē khì Má-kî-tùn ê sî king-kuè lín hia, tńg-lâi ê sî mā uì lín hia king-kuè, thang hō͘ lín sàng guá tshut-huat khì Iû-thài-síng. 17 Guá tsit-ê kè-uē kám tshin-tshái tsò-.ê? Kám sī tsiàu ka-kī tsū-su ê tōng-ki? Liâm-piⁿ kóng, "Sī", koh liâm-piⁿ kóng, "M̄-sī."? 18 Siōng-Tsú sī sìn-si̍t ê, guán tuì lín tap-ìng ê uē mā m̄-sī liâm-piⁿ "Sī" koh liâm-piⁿ "M̄-sī". 19 In-uī Se-lah, Thê-mô͘-thài kah guá thuân hō͘ lín Hit-uī Siōng-Tsú ê Kiáⁿ Iâ-so͘ Ki-tok pīng m̄-sī liâm-piⁿ "Sī" koh liâm-piⁿ "M̄-sī"-.ê. Tsāi-tī Iâ-so͘ Ki-tok tsí ū "Sī" niā-niā. 20 Siōng-Tsú it-tshè ê ìng-ín tsāi-tī Iâ-so͘ Ki-tok lóng tsiâⁿ-tsò "Sī", só͘-í lán thong-kuè I kóng, "Amen" lâi îng-kng Siōng-Tsú. 21 Hō͘ guán kah lín lâi kah Ki-tok kiat-liân ê sī Siōng-Tsú, koh sī Siōng-Tsú pún-sin kíng-suán lán tsiâⁿ-tsò I ê tsú-bîn. 22 I mā kā lán khap-ìn tsò kì-hō, koh siúⁿ-sù Sìng-Sîn tī lán ê sim-lāi tsò tam-pó. 23 Guá īng ka-kī ê sèⁿ-miā kî-kiû Siōng-Tsú tsò kiàn-tsìng. Guá sī uī-tio̍h lín siat-sióng tsiah bô khì Ko-lîm-to. 24 Guán m̄-sī teh kiông-tsè lín tio̍h sìn sím-mi̍h, tian-tò sī teh tsò lín ê tâng-kang thang hō͘ lín huaⁿ-hí, in-uī lín ê sìn-gióng ū khiā-tsāi.