《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十六章

作者 巴克禮普世版小組 2015.04.19

Uī Sìn-tô͘ Bō͘-khuán
1 Kuan-hē bō͘-khuán pang-tsō͘ sìn-tô͘ ê tāi-tsì, lín mā tio̍h tsiàu guá tsîng huan-hù Ka-lia̍p-thài hiah-ê kàu-huē ê pān-huat khì tsò. 2 Muí tshit-ji̍t ê thâu tsi̍t-ji̍t, lín ta̍k-lâng tio̍h tsiàu ka-kī ê siu-ji̍p puah tsi̍t-kuá khí-lâi khǹg, bián-tit guá khì lín hia ê sî tsiah khai-sí bō͘-khuán. 3 Guá kàu-uī ê sî, ē tsiong siāu-kài ê phue kah lín ê kuan-khuá kau hō͘ lín só͘ tshui-tsiàn ê lâng, tshe-phài in tuà khì Iâ-lō͘-sat-líng. 4 Nā-sī guá mā tio̍h khì, in mā thang kah guá tsò-hué khì.

Pó-lô ê Kè-uē
5 Guá tsit-má king-kuè Má-kî-tùn liáu-āu, tsiū beh khì lín hia. 6 Guá tāi-khài ē kah lín tuà tsit-tsām, kiám-tshái ē kah ín tsò-hué kuè tang-thiⁿ, án-ne bô-lūn suà lo̍h-khì beh khì tó-uī, thang hō͘ lín sàng guá tshut-huat. 7 Tsit-pái guá bô ài kan-taⁿ kuè-lō͘ sūn-suà khì lín hia. Tsú nā ín-tsún, guá ǹg-bāng kah lín tuà khah kú. 8 M̄-koh guá mā beh tī Í-hut-só͘ tuà kàu Gō͘-sûn-tseh. 9 Sui-jiân tī hia ū tsin-tsē tuì-ti̍k, m̄-koh Siōng-Tsú uī guá khui tsi̍t-ê khuah-tuā ê mn̂g, thang tsò ū kong-hāu ê kang-tsok. 10 Thê-mô͘-thài nā kàu-uī, lín tio̍h kā i tsiap-thāi, hō͘ i ē-tàng an-sim tsò-kang, in-uī i kah guán kāng-khuán teh tsò Tsú ê kang. 11 Lín lóng m̄-thang kā i khuàⁿ-khin, tio̍h sàng i pîng-an tshut-huat lâi guá tsia, in-uī guá teh thìng-hāu i kah hiah-ê hiaⁿ-tī tsò-hué lâi. 12 Kuan-hē ná ê hiaⁿ-tī A-pho-lô, guá tsài-saⁿ khǹg i kah hiah-ê hiaⁿ-tī khì lín hia, m̄-koh i kàu-taⁿ lóng bô àn-sǹg beh khì. Nā ū tú-hó ê ki-huē, i tsiū ē khì.

Kiat-bué ê Tshíng-an
13 Lín tio̍h kíng-síng, tī sìn-gióng-siōng khiā hō͘ tsāi, tio̍h ióng-kám, kian-kiông. 14 It-tshè tāi-tsì tio̍h īng thiàⁿ-sim lâi tsò. 15 Hiaⁿ-tī tsí-muē ah, lín bat Su-thê-huán-à ê tsi̍t-ke lâng, in sī A-kai-a-síng thâu tsi̍t-ke kui-sìn Tsú, koh jia̍t-sim ho̍k-bū sìn-tô͘. 16 Guá khǹg lín tio̍h ho̍k-tsiông tsit-khuán lâng, í-ki̍p só͘-ū kah lín tsò-hué lô-khó͘ ê tâng-kang. 17 Guá tsin huaⁿ-hí Su-thê-huán-à, Hok-tô͘-lah, A-kai-kó͘ ē-tàng lâi lín tsia, thang pó͘ lín ê put-tsiok. 18 In hō͘ guá kah lín ê sim-lîng tit-tio̍h kó͘-bú. Lín tio̍h tsun-tiōng tsit-khuán lâng. 19 A-se-a-semg2 ê kok kàu-huē lóng kā lín tshíng-an. A-ku-lah, Pik-ki-lah kah tī in tshù-lāi teh tsū-huē ê kàu-huē, tī Tsú ê lāi-bīn pik-tshiat kā lín tshíng-an. 20 Só͘-ū ê hiaⁿ-tī tsí-muē lóng kā lín tshíng-an. Lín tio̍h īng sìng-kiat ê sio-tsim lâi hō͘-siōng tshíng-an. 21 Guá Pó-lô tshin-pit kā lín tshíng-an. 22 Nā ū-lâng bô thiàⁿ Tsú, tio̍h siū tsiù-tsó͘. Tsú ah, kiû lí kàng-lîm! 23 Guān Tsú Iâ-so͘ Ki-tok ê un-tián kah lín tông-tsāi. 24 Guá ê thiàⁿ-sim kah só͘-ū sio̍k Ki-tok Iâ-so͘ ê lâng tông-tsāi. Amen.