《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第五章

作者 巴克禮普世版小組 2015.05.24

5 Guán tsai, lán tī tē-tsiūⁿ teh tuà pò͘-pêⁿ ê tshù nā huí-huāi, Siōng-Tsú tsiū ē hō͘ lán thiⁿ-tíng ê tshù. He m̄-sī lâng ê tshiú khí-tsō ê tshù, sī Siōng-Tsú khí-tsō íng-uán tī thiⁿ-tíng ê tshù. 2 Lán tsit-má tuà tī tsit-ê pò͘-pêⁿ teh thó͘-khuì, khat-bō͘ thang khì tuà thiⁿ-tíng ê tshù, tshin-tshiūⁿ saⁿ tshīng lo̍h-khì. 3 Nā kā saⁿ tshīng lo̍h-khì, tsiū bē thǹg-pak-theh. 4 Lán iáu tuà tī tsit-ê pò͘-pêⁿ teh thua-buâ thó͘-khuì, m̄-sī ài kā tē-tsiūⁿ ê thé thǹg khí-lâi, sī ài tha̍h sio̍k-thiⁿ ê thé, thang hō͘ ua̍h-miā lâi khik-ho̍k hit-ê ē-sí ê thé. 5 Siōng-Tsú hō͘ lán ū tsit-ê kái-piàn, I mā sù Sìng-Sîn lâi tsò lán ê pó-tsìng. 6 Só͘-í guán put-sî tshiong-muá ióng-khì, guán tsai, lán iáu sī jio̍k-thé teh ua̍h ê sî, tsiū-sī kah Tsú uī lán tsún-pī ê tshù lī-khui hn̄g-hn̄g. 7 In-uī lán teh ua̍h sī khò sìn-sim, m̄-sī khò ba̍k-tsiu só͘ khuàⁿ-.ê. 8 Guán tshiong-muá ióng-khì, khah ài lī-khui tē-tsiūⁿ ê sing-khu, khì kah Tsú tsò-hué tuà. 9 Só͘-í, bô-lūn tiàm-tī tē-tsiūⁿ ê sing-khu, á-sī lī-khui sing-khu, guán só͘ tì-ì ê sī hō͘ Tsú huaⁿ-hí. 10 In-uī lán tāi-ke lóng tio̍h khiā tī Ki-tok ê bīn-tsîng siū sím-phuàⁿ, ta̍k-lâng lóng tio̍h tsiàu ka-kī tī tē-tsiūⁿ sing-khu só͘ tsò ê tāi-tsì, bô-lūn sī hó á-sī pháiⁿ, tsiap-siū pò-ìng.

Thong-kuè Ki-tok Lâi Kah Siōng-Tsú Hô-hó
11 In-uī guán tsai tio̍h kìng-uì Siōng-Tsú, guán tsiū án-ne lâi khó͘-khǹg lâng, m̄-koh Siōng-Tsú jīn-bat lán kah hui-siông tshing-tshó, guá mā ǹg-bāng lín ē tuì lín ê liông-sim lâi jīn-bat guán. 12 Guán m̄-sī koh beh tshui-tsiàn ka-kī, sī beh hō͘ lín uī-tio̍h guán ū thang khua-kháu ê só͘-tsāi, thang ìn-tap hiah-ê tsù-tiōng guā-māu bô tsù-tiōng lāi-sim lâi khua-kháu ê lâng. 13 Guán nā tsin-tsiàⁿ khí-kông, sī uī-tio̍h Siōng-Tsú ê iân-kò͘. Guán tsing-sîn nā tsìng-siông, sī uī-tio̍h lín ê iân-kò͘. 14 In-uī Ki-tok ê thiàⁿ tshui-pik guán, hō͘ guán bîng-pi̍k: tsi̍t-ê lâng thè tsìng-lâng sí, tsìng-lâng tsiū lóng sí. 15 Ki-tok uī-tio̍h tsìng-lâng sí, sī beh hō͘ hiah-ê ua̍h-teh ê lâng, bô koh uī-tio̍h ka-kī lâi ua̍h, sī uī-tio̍h thè in sí koh-ua̍h ê Ki-tok lâi ua̍h. 16 Só͘-í tuì taⁿ í-āu, guán bô koh tsiàu lâng ê phiau-tsún lâi bat lâng; guán sui-jiân bat tsiàu lâng ê phiau-tsún lâi bat Ki-tok, m̄-koh tsit-má guán bô koh án-ne tsò. 17 Bô-lūn sím-mi̍h lâng, nā kah Ki-tok kiat-liân, tsiū-sī sin tshòng-tsō ê lâng; kū ê tāi-tsì í-king kuè-khì, taⁿ lóng piàn-tsò sin-.ê. 18 Tsiah-ê it-tshè lóng sī Siōng-Tsú ê tsok-uî, I thong-kuè Ki-tok hō͘ lán kah I koh-tsài hô-hó, mā tsiong tsit-ê khǹg lâng kah Siōng-Tsú koh-tsài hô-hó ê tsit-hūn kau hō͘ guán. 19 Guán só͘ thuân ê hok-im tsiū-sī: Siōng-Tsú thong-kuè Ki-tok hō͘ sè-kan-lâng kah I koh-tsài hô-hó, bô koh tui-kiù in ê tsuē-kuà, mā tsiong I kah lâng koh hô ê sìn-sit kau-thok guán. 20 Án-ne guán tsò Ki-tok ê sù-tsiá, Siōng-Tsú thong-kuè guán khǹg lín; guán thè Ki-tok kā lín khún-kiû, tio̍h kah Siōng-Tsú koh-tsài hô-hó. 21 Siōng-Tsú hō͘ hit-ê bô tsuē ê Ki-tok lâi taⁿ lán ê tsuē, sī beh hō͘ lán kah I kiat-liân, lâi kah Siōng-Tsú kiàn-li̍p ha̍p-gî ê kuan-hē.