《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第六章

作者 巴克禮普世版小組 2015.05.31

1 Guán kah Tsú tâng-kang mā kā lín khó͘-khǹg, m̄-thang hō͘ lín tuì Siōng-Tsú niá-siū ê un-tián liáu-jiân khì. 2 Siōng-Tsú kóng: Guá huaⁿ-hí tsiap-la̍p ê sî ū thiaⁿ lí ê kî-kiû, Tī tsín-kiù ê ji̍t guá ū pang-tsō͘ lí.( tsù: ISA 49:8) Lín tio̍h thiaⁿ, tsit tsūn sī siū tsiap-la̍p ê sî, kin-á-ji̍t sī tsín-kiù ê ji̍t. 3 Guán bô ài lâng huí-pòng guán ê sū-hōng kang-tsok, guán lóng bô tsò tsó͘-gāi lâng ê tāi-tsì. 4 Tian-tò īng tsuè-tuā ê jím-nāi, it-tshè lóng thong-kuè huān-lān, kan-lân kah khùn-khó͘, lâi tsìng-bîng guán sī Siōng-Tsú ê lô͘-po̍k. 5 Guán hông phah, hông kuaiⁿ lo̍h-kaⁿ, hō͘ pō-bîn jiáu-luān, lô-khó͘, bô khùn, bô tsia̍h. 6 Guán īng sûn-kiat, tì-sik, khuan-iông, jîn-tsû, uá-khò Sìng-Sîn, īng tsin-sîng ê thiàⁿ-sim, 7 tsin-lí ê sìn-sit kah Siōng-Tsú ê kuân-lîng, lâi piáu-bîng guán sī Siōng-Tsú ê lô͘-po̍k. Guán īng tsìng-gī tsò bú-khì kong-kik tuì-ti̍k, pó-hō͘ ka-kī. 8 Guán siū tsun-tiōng mā siū bú-jio̍k, tit-tio̍h pháiⁿ miâ-siaⁿ mā tit-tio̍h hó miâ-siaⁿ. Guán hō͘ lâng khuàⁿ-tsò ná pián-sian-á, kî-si̍t guán lóng kóng sîng-si̍t-uē. 9 Kah-ná bô-lâng bat guán, kî-si̍t lâng-lâng lóng bat. Hō͘ lâng khuàⁿ-tsò kah-ná sí-khì, kî-si̍t guán iáu ua̍h-teh. Guán sui-jiân siū hîng-hua̍t, m̄-koh bô hō͘ lâng thâi-sí. 10 Sui-jiân ū huân-ló, kî-si̍t siông-siông ū hí-lo̍k. Sui-jiân sàn-tshiah, m̄-koh hō͘ tsin-tsē lâng hó-gia̍h. Kah-ná bô puàⁿ-hāng, kî-si̍t ta̍k-hāng lóng ū. 11 Ko-lîm-to ê pîng-iú ah, guán ê sim-hing í-king phah-khui, khui-tshuì teh tuì lín kóng-uē. 12 Guán m̄-bat tuì lín bô tō͘-liōng, sī lín ka-kī bô tō͘-liōng. 13 Guá kā lín tòng-tsò ka-kī ê kiáⁿ teh tuì lín kóng, tio̍h o̍h guán ê khuán-sit, kā lín ê sim-hing pàng khah khui-khuah.

Tio̍h Thê-hông Īⁿ-kàu ê Íng-hióng
14 M̄-thang kah bô sìn ê lâng tsò-phuāⁿ kau-tshap. Gī kah put-gī kám ē-tàng tsò-hué? Kng-bîng kah o͘-àm kám ē-tàng hō͘-siōng lâi-óng? 15 Ki-tok kah Mô͘-kuí ná ē-tàng hô-ha̍p? Sìn kah bô sìn ê lâng ū sím-mi̍h kuan-hē? 16 Siōng-Tsú ê tiān kah ngó͘-siōng ná ē-tàng pâi tsò-hué? Lán sī íng-ua̍h Siōng-Tsú ê tiān. Tsiàu Siōng-Tsú só͘ kóng: Guá beh kah Guá ê tsú-bîn tsò-hué khiā-khí, tī in tiong-kan kiâⁿ-ta̍h. Guá beh tsò in ê Siōng-Tsú, in mā beh tsò Guá ê tsú-bîn.( tsù: LBK 26:11-12) 17 Só͘-í Tsú kóng: Lín tio̍h tuì in tiong-kan tshut-khì, kah in hun-lī, M̄-thang bong bô tshing-khì ê mi̍h, Guá tsiū ē kā lín tsiap-la̍p.( tsù: ISA 52:11; ISK 20:34, 41) 18 Guá beh tsò lín ê Thiⁿ-Pē, Lín beh tsò Guá ê kiáⁿ-jî. Tse sī tsuân-lîng ê Tsú kóng-.ê.( tsù: SBN 7:14)