《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第十一章

作者 巴克禮普世版小組 2015.07.05

Pó-lô Kah Ké Sù-tô͘
1 Tshiáⁿ lín khuan-iông guá sió-khuá ê gû-gōng. Guá siong-sìn lín ē kā guá khuan-iông. 2 Guá thiàⁿ lín tshin-tshiūⁿ Siōng-Tsú thiàⁿ lín thiàⁿ kah ē khí tsi̍t-tò͘, in-uī lín tshin-tshiūⁿ sûn-kiat ê tsāi-sik-lí, guá kā lín phuè hō͘ tsi̍t-ê tiōng-hu, tsiū-sī Ki-tok. 3 Tshin-tshiūⁿ Hā-ua hō͘ tsuâ ê hua-giân khá-gí phiàn-khì, guá khióng-kiaⁿ lín ê sim-su ē siū bê-hi̍k, suah khì-sak tuì Ki-tok ê sûn-kiat kah tsin-sîng. 4 Ū-lâng khì lín hia thuân kah guán só͘ thuân bô-kāng ê Iâ-so͘, lín tsiap-siū kah tsîng tuì guán só͘ tsiap-siū bô-kāng ê Sìng-Sîn kah hok-im, lín mā lóng iông-ín. 5 Kah lín hiah-ê "ti̍k-pia̍t sù-tô͘" pí khí-lâi, guá siūⁿ guá tsi̍t-sut-á to bô khah su. 6 Kiám-tshái guá kóng-uē khah ham-bān, m̄-koh tì-sik bē pí lâng khah su. Tsit-tiám, guán í-king ū īng ta̍k-tsióng hong-huat lī-iōng ta̍k-tsióng ki-huē tuì lín piáu-bîng. 7 Guá bián-huì tuì lín thuân Siōng-Tsú ê hok-im. Uī-tio̍h beh hō͘ lín ko-sing, guá tio̍h khut-kē ka-kī, Guá án-ne tsò kám ū m̄-tio̍h? 8 Guá tī lín hia teh kang-tsok ê sî, pa̍t-ê kàu-huē teh kā guá kiong-kip it-tshè huì-iōng. Kóng khí-lâi guá sī teh the̍h pa̍t-ê kàu-huē ê siā-lé lâi ho̍k-sāi lín. 9 Guá tī lín hia ê sî, bô kàu īng mā m̄-bat kiû lín pang-tsō͘ lâi kā lín mâ-huân. It-tshè ê huì-iōng lóng sī Má-kî-tùn lâi ê hiaⁿ-tī kā guá kiong-kip. Kuè-khì sī án-ne, tsiong-lâi mā sī án-ne. Guá tsua̍t-tuì bē kā lín thua-luī. 10 Guá káⁿ tsí guá só͘ sìn ê Ki-tok tsin-lí tsiù-tsuā, tī A-kai-a-síng ê tē-khu, guá lóng ē-tàng án-ne khua-kháu. 11 Sī án-tsuáⁿ kóng lè? Kám kóng guá bô thiàⁿ lín? Guá ū thiàⁿ lín, Siōng-Tsú tsai! 12 Guá beh kè-sio̍k án-ne tsò, thang hō͘ hiah-ê tsū-tshing "sù-tô͘" ê lâng bô ki-huē khua-kháu in só͘ tsò ê kang-tsok kah guán kāng-khuán. 13 Hit-tsióng lâng sī ké sù-tô͘, tsò tāi-tsì kan-tsà, ké-tsò Ki-tok ê sù-tô͘. 14 Tse bô kî-kuài, liân Sat-tàn mā ké-tsò kng-bîng ê thiⁿ-sài. 15 Án-ne, Sat-tàn ê lô͘-po̍k ké-tsò gī ê lô͘-po̍k, mā m̄-sī sím-mi̍h tuā tāi-tsì. Tsuè-āu in ē tsiàu in ê hîng-uî siū-tio̍h ìng-tit ê pò-ìng.

Pó-lô Tsò Sù-tô͘ ê Lô-khó͘
16 Guá koh kóng tsi̍t-pái, m̄-thang kā guá khuàⁿ-tsò gōng-lâng, m̄-koh lín nā-sī án-ne siūⁿ, tsiū tsiap-la̍p guá tòng-tsò gōng-lâng, hō͘ guá ū tām-po̍h-á thang khua-kháu. 17 Guá tsit-má teh kóng ê m̄-sī Tsú ê ì-sù, sī tsò tsi̍t-ê gōng-lâng teh khua-kháu. 18 Kì-jiân ū hiah-tsē lâng teh tián sio̍k-sè ê tāi-tsì, guá mā beh khua-kháu tsi̍t-ē. 19 Lín kì-jiân hiah-ni̍h khiáu, ing-kai ē huaⁿ-hí khuan-iông guá tsit-ê gōng-lâng tsiah tio̍h. 20 Nā ū-lâng kā lín tòng-tsò lô͘-po̍k, kā lín phiⁿ, kā lín hām-hāi, tuì lín kiau-ngō͘, siàn lín ê tshuì-phué, lín lóng ē khuan-iông jím-siū. 21 Kóng khí-lâi tsin kiàn-siàu, guá kuè-khì m̄-káⁿ tsò tsit-khuán tāi-tsì, m̄-koh nā ū-lâng káⁿ khua-kháu sím-mi̍h, tsún-tsò tsi̍t-ê gōng-lâng lâi kóng-uē, guá mā káⁿ. 22 In kám sī Hi-pik-lâi lâng? Guá mā sī. In kám sī Í-sik-lia̍t-lâng? Guá mā sī. In kám sī A-pik-la̍h-hán ê kiáⁿ-sun? Guá mā sī. 23 In kám sī Ki-tok ê lô͘-po̍k? Tsún-tsò sī siáu-lâng lâi kóng-uē, guá koh-khah sī. Guá siū koh-khah-tsē ê lô-khó͘, hông kuaiⁿ lo̍h-kaⁿ pí in khah-tsē pái, siū sǹg-bē-liáu ê piⁿ-phah, tsin-tsē-pái hiám-hiám-á sí-khì. 24 Guá hō͘ Iû-thài-lâng lia̍h khì īng piⁿ phah gō͘-pái, ta̍k-pái sì-tsa̍p-ē kiám tsi̍t-ē, lóng phah-kah hiám-hiám-á sí-khì! 25 Saⁿ pái hō͘ Lô-má-lâng īng kuái-á phah, tsi̍t pái hō͘ lâng īng tsio̍h-thâu tìm, saⁿ pái tú-tio̍h tsûn-phuà, tsi̍t pái tī hái-ni̍h phiau-liû tsi̍t-ji̍t tsi̍t-mê. 26 Siông-siông tī lí-hîng tiong tú-tio̍h tuā-tsuí ê guî-hiám, tshiúⁿ-kiap ê guî-hiám, Iû-thài tông-pau kah Guā-pang-lâng ê guî-hiám, siâⁿ-lāi ê hām-hāi, khòng-iá ê guî-hiám, hái-siōng ê guî-hiám, ké sìn-tô͘ tsō-sîng ê guî-hiám. 27 Guá lô-khó͘ thua-buâ, siông-siông bô khùn, iau-gō tshuì-ta, bô thang tsia̍h, bô thang tuà, bô thang tshīng. 28 Kî-tha ê tāi-tsì bián kóng, kan-taⁿ ta̍k-ji̍t thè só͘-ū kàu-huē teh tshau-huân to̍h kàu-gia̍h. 29 Nā ū-lâng luán-jio̍k, guá kám bē kám-kak luán-jio̍k? Nā ū-lâng huān-tsuē, guá ê sim-hué kám bē to̍h khí-lâi? 30 Guá nā tio̍h khua-kháu, tsiū beh khua-kháu hiah-ê kuan-hē guá luán-jio̍k ê tāi-tsì. 31 Tsú Iâ-so͘ ê Thiⁿ-Pē Siōng-Tsú, sī Hit-uī íng-uán thang o-ló-.ê. I tsai guá bô kóng pe̍h-tsha̍t. 32 Guá tī Tāi-má-sik ê sî, A-lí-ta̍t-ông tshiú-hā ê tsóng-tok pò͘-tì uē-ping kò͘-siú siâⁿ-mn̂g beh kā guá lia̍h. 33 M̄-koh ū-lâng īng bí-lô-á tuì siâⁿ-tshiûⁿ ê thang-á kā guá luī lo̍h-lâi, hō͘ guá thuat-lī i ê tshiú.