《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第十章

作者 巴克禮普世版小組 2015.06.28

Pó-lô Uī Ka-kī ê Thuân-kàu Piān-hō͘
1 Lâng kóng guá kah lín tsò-hué ê sî tsin kheh-khì, kah lín sio-lī ê sî tsiū tsin giâm-keh, m̄-koh guá tsit-ê Pó-lô īng Ki-tok ê un-jiû kah jîn-tsû kā lín khó͘-khǹg. 2 Guá khì lín hia ê sî, m̄-thang pik guá tuì lín bô kheh-khì. Tuì hiah-ê phue-phîng guán īng sio̍k-sè ê tōng-ki teh tsò tāi-tsì ê lâng, guá it-tīng ē tuì in bô kheh-khì. 3 Bô m̄-tio̍h, guán tuà tī tsit sè-kan teh sing-ua̍h, m̄-koh pīng bô tsiàu sio̍k-sè ê tōng-ki teh hùn-tàu. 4 Guán hùn-tàu īng ê khì-kū m̄-sī sio̍k-sè, sī īng Siōng-Tsú ū khuì-la̍t ê bú-khì, liân kian-kò͘ ê siâⁿ-pó to ē-tàng kong-phuà. Guán beh thui-huan hiah-ê biū-lūn, 5 kā tsó͘-tòng lâng jīn-bat Siōng-Tsú ê it-tshè kiau-ngō͘ lóng siau-bia̍t, koh kái-piàn muí tsi̍t-ê lâng ê sim-su ì-liām, hō͘ i uân-tsuân sūn-ho̍k Ki-tok. 6 Lín uân-tsuân sūn-ho̍k liáu-āu, guán tsiū beh lâi tshù-hua̍t hiah-ê m̄ sūn-ho̍k ê lâng. 7 Lín kan-taⁿ teh khuàⁿ gán-tsîng ê sū. Nā ū-lâng jīn-uî ka-kī sī sio̍k Ki-tok, i tio̍h koh siūⁿ khuàⁿ-māi, i sio̍k Ki-tok, guán mā sī sio̍k Ki-tok. 8 Tsú só͘ siúⁿ-sù guán ê kuân-pìng sī beh kā lín tsō-tsiū, m̄-sī beh kā lín huí-huāi. Guá tuì tsit-ê kuân-pìng nā ū khah kuè-thâu khua-kháu, guá mā bē kám-kak kiàn-siàu. 9 Guá bô ài hō͘ lín siūⁿ-kóng guá īng phue teh kā lín khióng-hat. 10 In-uī ū-lâng kóng, Pó-lô ê phue giâm-keh koh kiông-ngē, m̄-koh bīn-tuì-bīn tsò-hué ê sî khiok tsin un-jiû, kóng-uē mā bô tsin tshù-bī. 11 Kóng tsit-khuán uē ê lâng tio̍h tsai, guán bô tī lín hia ê sî phue sī án-tsuáⁿ siá, guán kàu lín hia ê sî mā ē án-ne tsò. 12 Guán m̄-káⁿ kah hiah-ê tián hong-sîn ê lâng pí-phīng, m̄-koh in īng ka-kī phue-phîng ka-kī, mā īng ka-kī pí-phīng ka-kī, si̍t-tsāi bô tì-huī. 13 M̄-koh guán bô beh kuè-hūn khua-kháu, kan-taⁿ tsiàu Siōng-Tsú hō͘ guán hān-tiāⁿ ê huān-uî, tsit-ê huān-uî pau-hâm guán tī lín tiong-kan ê kang-tsok. 14 Lín kì-jiân tī huān-uî-lāi, guán tíng-pái khì lín hia thuân Ki-tok ê hok-im pīng bô tshiau-kuè huān-uî. 15 Guán bô īng pa̍t-lâng lô-khó͘ uân-sîng ê tāi-tsì tòng-tsò ka-kī ê sîng-tsik lâi khua-kháu. Guán tian-tò ǹg-bāng lín ê sìn-sim ná tsing-tióng, guán tī lín tiong-kan kang-tsok ê huān-uî ē ná khui-khuah. 16 Án-ne guán tsiah thang tsiong hok-im thuân khì lín í-guā ê tē-khu. bô īng pa̍t-lâng huān-uî-lāi í-king uân-sîng ê tāi-tsì lâi khua-kháu. 17 Sìng-king ū kì-tsài: Beh khua-kháu ê lâng tio̍h īng Tsú ê tsok-uî lâi khua-kháu.( tsù: ILB 9:24) 18 In-uī tsin-tsiàⁿ ta̍t-tit o-ló ê sī Tsú só͘ o-ló ê lâng, m̄-sī tsū-khua ê lâng.