《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第一章

作者 巴克禮普世版小組 2015.07.26

1 Guá sī sù-tô͘ Pó-lô, guá tsò sù-tô͘ m̄-sī thong-kuè lâng, mā m̄-sī tuì lâng, sī tuì Iâ-so͘ Ki-tok kah hō͘ I tuì sí-lâng tiong koh-ua̍h ê Thiⁿ-Pē Siōng-Tsú ê ho͘-tiàu. 2 Guá kah tī tsia ê hiaⁿ-tī tsí-muē siá phue hō͘ Ka-lia̍p-thài ê tsìng kàu-huē. 3 Guān lán ê Thiⁿ-Pē Siōng-Tsú kah Tsú Iâ-so͘ Ki-tok sù lín un-tián kah pîng-an. 4 Uī-tio̍h beh tsín-kiù lán thuat-lī hiān-kim siâ-ok ê sè-tāi, Ki-tok ū tsiàu lán ê Thiⁿ-Pē Siōng-Tsú ê tsí-ì lâi hiàn I pún-sin. 5 Guān îng-kng kui hō͘ Siōng-Tsú ti̍t-kàu íng-íng uán-uán. Amen.

Î-it ê Hok-im
6 Guá tsin tio̍h-kiaⁿ. Lín kìng-jiân hiah-kín to̍h khì-sak Hit-uī thong-kuè Ki-tok ê un-tiàu lâi ho͘-tiàu lín ê Siōng-Tsú, khì sìn pa̍t-khuán ê hok-im. 7 Kî-si̍t bô pa̍t-khuán ê hok-im. Guá án-ne kóng sī in-uī ū-lâng kā lín kiáu-jiáu, siūⁿ-beh khiok-kái Ki-tok ê hok-im. 8 M̄-koh bô-lūn sī guán á-sī tuì thiⁿ-tíng lâi ê thiⁿ-sài só͘ thuân ê hok-im nā kah guán í-tsîng só͘ thuân hō͘ lín ê hok-im bô kāng-khuán. Hit-ê lâng tio̍h siū tsiù-tsó͘. 9 Guá tsîng bat kóng-kuè, taⁿ guá koh kóng tsi̍t-pái, nā ū-lâng thuân hō͘ lín ê hok-im kah lín í-king tsiap-siū ê bô kāng-khuán. Hit-ê lâng tio̍h siū tsiù-tsó͘. 10 Guá án-ne kóng, kám sī siūⁿ beh tit lâng ê o-ló? M̄-sī, sī beh tit Siōng-Tsú ê o-ló. Guá kám teh kiû hō͘ lâng huaⁿ-hí? Guá nā iáu-koh ài hō͘ lâng huaⁿ-hí, guá tsiū m̄-sī Ki-tok ê lô͘-po̍k.

Pó-lô Tsiâⁿ-tsò Sù-tô͘
11 Hiaⁿ-tī tsí-muē ah, guá ài lín tsai, guá só͘ thuân ê hok-im m̄-sī tsiàu lâng ê ì-sù. 12 Tsit-ê hok-im m̄-sī tuì lâng niá-siū, mā bô siū lâng kà-sī, sī tuì Iâ-so͘ Ki-tok lâi ê khé-sī. 13 Lín bat thiaⁿ-tio̍h guá tsîng tsò Iû-thài-kàu-tô͘ ê hîng-uî, tsiū-sī pik-hāi Siōng-Tsú ê kàu-huē tsin thiám, siūⁿ-beh thiat-té kā i phò-huāi. 14 Guá pí kāng-tsi̍t-puè ê Iû-thài-lâng koh-khah tsun-siú kàu-kui, koh-khah jia̍t-sim tsun-siú tsó͘-sian ê thuân-thóng. 15 M̄-koh tuì Siōng-Tsú ê un-tián, guá iáu-buē tshut-sì I tsiū kíng-suán guá, 16 tuì guá khé-sī I ê Kiáⁿ, hō͘ guá thang tuì Guā-pang-lâng suan-iông I ê Kiáⁿ ê hok-im. Hit sî, guá lóng bô khì tshíng-kàu jīm-hô lâng, 17 mā bô tsiūⁿ Iâ-lō͘-sat-líng khì kìⁿ hiah-ê pí guá khah tāi-sing tsò sù-tô͘ ê lâng. Tsí-ū suî-sî khì A-lah-pik, jiân-āu koh tńg-lâi Tāi-má-sik. 18 Saⁿ nî āu, guá tsiah khì Iâ-lō͘-sat-líng pài-hóng Pí-tik, kah i tuà tsa̍p-gō͘ ji̍t. 19 Tsú ê hiaⁿ-tī Ngá-kok í-guā, guá lóng bô kìⁿ-kuè kî-tha ê sù-tô͘. 20 Guá só͘ siá ê lóng sī sū-si̍t, tī Siōng-Tsú ê bīn-tsîng guá bô kóng pe̍h-tsha̍t. 21 Āu-lâi guá khì Sū-lī-a kah Ki-lī-ka ê ta̍k só͘-tsāi. 22 Hit sî, sio̍k Iû-thài tē-khu tsìng kàu-huē ê sìn-tô͘ lóng m̄-bat guá. 23 In kan-taⁿ thiaⁿ lâng kóng, "Tsîng pik-hāi lán ê lâng, taⁿ teh thuân i kuè-khì siūⁿ-beh huí-bia̍t ê sìn-gióng!" 24 In tsiū in-uī guá ê iân-kò͘ kui îng-kng hō͘ Siōng-Tsú.