《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第二章

作者 巴克禮普世版小組 2015.08.02

Pó-lô Kah Kî-tha ê Sù-tô͘
1 Tsa̍p-sì nî āu, guá kah Pa-ná-pa koh tsiūⁿ Iâ-lō͘-sat-líng, mā tshuā Thê-to tsò-hué khì. 2 Guá sī tit-tio̍h Siōng-Tsú ê khé-sī tsiah tsiūⁿ khì. guá tuì hiah-ê ū bîng-bōng ê lâng su-hā suat-bîng guá tī guā-pang só͘ thuân ê hok-im, bián-tit guá tsit-má á-sī í-tsîng só͘ tsò ê tāi-tsì piàn-tsiâⁿ bô tshái-kang. 3 Kah guá tsò-hué khì ê Thê-to, sui-jiân sī Hi-lia̍p-lâng, mā bô hō͘ lâng bián-kióng i tsiap-siū kat-lé. 4 Ū tsi̍t-kuá ké sìn-tô͘ thau-thau-á nǹg ji̍p-lâi lán tiong-kan, lâi thau-khuàⁿ lán tuì Ki-tok Iâ-so͘ só͘ tit-tio̍h ê tsū-iû, siūⁿ beh hō͘ lán tsiâⁿ-tsò lô͘-lē. 5 Uī-tio̍h beh hō͘ lín ē-tàng pó-tsûn hok-im ê tsin-lí, guán tsi̍t-si-á to bô tuì in niū-pō͘. 6 M̄-koh hiah-ê ū bîng-bōng ê lâng, bô-lūn in ū sím-mi̍h tē-uī, tuì guá lóng bô khah-tsua̍h, in-uī Siōng-Tsú bô īng guā-māu lâi phuàⁿ-tuàn lâng. Hiah-ê ū bîng-bōng ê lâng tuì guá pīng-bô ū sím-mi̍h tsí-sī. 7 In tian-tò liáu-kái Tsú ū kau-thok guá khì thuân hok-im hō͘ bô siū kat-lé ê lâng. Tú tshin-tshiūⁿ I kau-thok Pí-tik khì thuân hok-im hō͘ ū siū kat-lé ê lâng. 8 In-uī Siōng-Tsú ū siū-kuân hō͘ Pí-tik tsiâⁿ-tsò siū kat-lé ê lâng ê sù-tô͘, mā ū siū-kuân hō͘ guá tsiâⁿ-tsò Guā-pang-lâng ê sù-tô͘. 9 Ngá-kok, Pí-tik kah Iok-hān tsiah-ê hō͘ lâng khuàⁿ-tsò kàu-huē thiāu-tsio̍h ê lâng, tsai-iáⁿ Siōng-Tsú ū ti̍k-pia̍t ê sù-bīng kau-tài guá, tsiāh kah guá hâm Pa-ná-pa ak-tshiú, piáu-sī tāi-ke lóng sī tâng-kang. In koh tông-ì hō͘ guán khì Guā-pang-lâng tiong-kan kang-tsok, in lâu tī Iû-thài-lâng tiong-kan kang-tsok. 10 In kan-taⁿ ài guán siàu-liām sàn-tshiah ê Iû-thài-lâng. Tse mā sī guá it-ti̍t ló͘-li̍k teh tsò-.ê.

Pó-lô Tī An-thê-o Tsik-pī Pí-tik
11 Pí-tik lâi-kàu An-thê-o ê sî, in-uī i ū bîng-hián ê tshò-gō͘, guá tsiah tng-bīn kā i tsik-pī. 12 In-uī ū tsi̍t-kuá tuì Ngá-kok hia lâi ê lâng iáu-buē kàu ê sî, Pí-tik ū kah Guā-pang-lâng tsò-hué tsia̍h-pn̄g. Hiah-ê lâng kàu-uī liáu-āu, i suah siám-phiah Guā-pang-lâng sìn-tô͘, m̄-káⁿ koh kah in tsò-hué tsia̍h-pn̄g, in-uī i kiaⁿ hiah-ê tsú-tiuⁿ Guā-pang-lâng tio̍h siū kat-lé ê lâng. 13 Kî-tha ê Iû-thài-lâng sìn-tô͘ mā kah Pí-tik kāng-khuán tsò hit-khuán hi-ké ê tāi-tsì, sīm-tsí liân Pa-ná-pa mā siū íng-hióng khì tsò hit-khuán bô guân-tsik ê tāi-tsì. 14 Guá tsi̍t-ē khuàⁿ-tio̍h in bô tsiàu hok-im ê tsin-lí teh kiâⁿ, tsiū tī kûn-tsiòng ê bīn-tsîng kā Pí-tik kóng, "Lí sī Iû-thài-lâng, tsò-lâng kì-jiân tshin-tshiūⁿ Guā-pang-lâng, bô tshin-tshiūⁿ Iû-thài-lâng, án-tsuáⁿ teh bián-kióng Guā-pang-lâng o̍h Iû-thài-lâng sing-ua̍h?

Iû-thài-lâng Kah Guā-pang-lâng Lóng Tuì Sìn Lâi Tit-kiù
15 Lán pún-sin tshut-sì tsò Iû-thài-lâng, m̄-sī lâng só͘-kóng ê "guā-pang tsuē-jîn". 16 M̄-koh lán tsai lâng ē-tàng kah Siōng-Tsú ū hô-hó ê kuan-hē, sī thong-kuè sìn Iâ-so͘ Ki-tok, m̄-sī khò tsun-siú Mô͘-se ê lu̍t-huat. Lán ka-kī mā sìn-khò Ki-tok Iâ-so͘ lâi kah Siōng-Tsú kiàn-li̍p hô-hó ê kuan-hē, m̄-sī khò tsun-siú lu̍t-huat, in-uī bô-lâng ē-tàng uá-khò tsun-siú lu̍t-huat lâi kah Siōng-Tsú ū hô-hó ê kuan-hē. 17 Lán nā siūⁿ-beh tuì uá-khò Ki-tok lâi kah Siōng-Tsú ū hô-hó ê kuan-hē, iáu-koh hō͘ lâng khuàⁿ-tsò kah Guā-pang-lâng sio-siâng sī tsuē-jîn, án-ne Ki-tok sī tsuē-ok ê tshe-īng sī-bô? Tsua̍t-tuì m̄-sī! 18 Guá nā koh khí-tsō guá tsîng só͘ thiah-huí ê, tsiū tsìng-bîng guá sī uî-puē lu̍t-huat ê lâng. 19 In-uī tsiàu lu̍t-huat lâi kóng, guá í-king sí tī lu̍t-huat ē-bīn, tse sī beh hō͘ guá ǹg Siōng-Tsú lâi ua̍h. Guá í-king kah Ki-tok tâng-tsê hō͘ lâng tìng si̍p-jī-kè. 20 Án-ne guá tsit-má teh ua̍h ê m̄-sī guân-lâi ê guá, sī Ki-tok tiàm-tī guá lāi-bīn teh ua̍h. Guá tsit-má teh ua̍h, sī khò sìn Siōng-Tsú ê Kiáⁿ teh ua̍h. Ki-tok thiàⁿ guá, uī-tio̍h guá pàng-sak sèⁿ-miā. 21 Guá bô kī-tsua̍t Siōng-Tsú ê un-tián, in-uī tuì lu̍t-huat nā ē-tàng kah Siōng-Tsú ū hô-hó ê kuan-hē, án-ne Ki-tok kám m̄-sī pe̍h-pe̍h thè lán sí?