《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第二章

作者 巴克禮普世版小組 2015.09.13

Tshut-sí Ji̍p-ua̍h
1 Kuè-khì in-uī lín puē-gi̍k Siōng-Tsú, lîng-sìng í-king sí-khì. 2 Hit sî, lín kin-tuè tsit sè-kan ê pháiⁿ hong-sio̍k teh sing-ua̍h, koh sūn-ho̍k thian-kài ê tsiáng-kuân-tsiá, tsiū-sī tsit-má teh kuán-hat hiah-ê puē-gi̍k Siōng-Tsú ê lâng hit-ê siâ-sîn. 3 Kî-si̍t guán í-tsîng mā lóng kah tsiah-ê lâng kāng-khuán, sūn-ho̍k su-io̍k teh sing-ua̍h, tsiàu ka-kī jio̍k-thé ê su-io̍k kah ì-liām teh kiâⁿ-ta̍h. Guán kah kî-tha ê lâng lóng kāng-khuán, tsù-tiāⁿ tio̍h siū Siōng-Tsú ê hîng-hua̍t. 4 M̄-koh Siōng-Tsú ū kàu-gia̍h ê liân-bín, īng ki̍k-tuā ê tsû-ài teh thiàⁿ lán. 5 Tng lán iáu teh puē-gi̍k Siōng-Tsú, lîng-sìng í-king sí ê sî, to̍h hō͘ lán kah Ki-tok tâng-tsê koh-ua̍h. Lán tuì Siōng-Tsú ê un-tián lâi tit-kiù. 6 Thong-kuè lán kah Ki-tok Iâ-so͘ kiat-liân, Siōng-Tsú hō͘ lán kah I tâng-tsê koh-ua̍h, tsò-hué tī thiⁿ-tíng tsiáng-kuân. 7 Án-ne sī beh tuì sè-sè tāi-tāi piáu-bîng I kàu-gia̍h ê un-tián, tsiū-sī thong-kuè Ki-tok Iâ-so͘ tuì lán hián-sī ê tsû-tsû. 8 In-uī lín sī khò Siōng-Tsú ê un-tián tuì sìn lâi tit-kiù, m̄-sī khò lín ka-kī, sī khò Siōng-Tsú ê un-sù. 9 Kì-jiân m̄-sī khò ka-kī ê kiâⁿ-ta̍h, tsiū bô sím-mi̍h thang khua-kháu. 10 In-uī lán sī Siōng-Tsú tshòng-tsō ê, I thong-kuè Ki-tok Iâ-so͘ lâi kái-tsō lán, ài lán kiâⁿ hó-sū. Tse sī Siōng-Tsú tsá to̍h tsún-pī ài lán án-ne khì tsò.

Tī Ki-tok Lāi Tsiâⁿ-tsò Tsi̍t-thé
11 Só͘-í lín tsiah-ê tshut-sì to̍h sī Guā-pang-lâng ê, hō͘ hiah-ê kiò-tsò siū kat-lé ê Iû-thài-lâng kā lín tshing tsò bô siū kat-lé. In ê kat-lé tsiū-sī lâng īng tshiú tī sing-khu kiâⁿ kat-lé. 12 Hit sî, lín bô kah Ki-tok kiat-liân, bô sio̍k Siōng-Tsú ê suán-bîn, bô hūn tī Siōng-Tsú ìng-ín ê bîng-iok, tī tsit sè-kan bô ǹg-bāng, mā m̄-bat Siōng-Tsú. 13 M̄-koh lín tsiah-ê í-tsîng lī-khui Siōng-Tsú hn̄g-hn̄g ê lâng, tsit-má khò Ki-tok Iâ-so͘, thong-kuè I ê sí í-king kah Siōng-Tsú tshin-kīn. 14 In-uī Ki-tok tsò lán hô-pîng ê guân-thâu, I īng ka-kī ê sing-khu thiah-huí hō͘-siōng tuì-ti̍k ê tshiûⁿ, hō͘ Iû-thài-lâng kah Guā-pang-lâng ha̍p tsò-hué, 15 I huì-tû tsō-tsiâⁿ pí-tshú uan-siû ê Iû-thài-lâng kài-bīng ê lu̍t-huat kah kui-lē, sī beh hō͘ siang-pîng thong-kuè I lâi tshòng-tsō tsi̍t-ê sin ê lâng, thang hô-pîng tsò-hué sing-ua̍h. 16 Koh thong-kuè si̍p-jī-kè tû-khì pí-tshú ê tuì-ti̍k, hō͘ siang-pîng tsiâⁿ-tsò tsi̍t thé, thang kah Siōng-Tsú hô-hó. 17 Án-ne Ki-tok lâi thuân hô-pîng ê hok-im hō͘ só͘-ū ê lâng, pau-kuat lín tsiah-ê í-tsîng lī-khui Siōng-Tsú hn̄g-hn̄g ê Guā-pang-lâng, kah tshin-kīn Siōng-Tsú ê Iû-thài-lâng. 18 Thong-kuè Ki-tok, lán nn̄g-pîng ê lâng lóng ē-tàng tuì kāng tsi̍t-ê Sìng-Sîn lâi tshin-kīn Thiⁿ-Pē. 19 Só͘-í lín Guā-pang-lâng bô koh tsò guā-bīn ê lâng, m̄-sī tshut-guā-lâng. Lín í-king sī Siōng-Tsú tsú-bîn ê tông-pau, tsò Siōng-Tsú ke-lāi ê lâng. 20 Lín kah Iû-thài-lâng kāng-khuán, khí-tsō tī sù-tô͘ kah sian-ti ê tē-ki tíng-bīn, Ki-tok Iâ-so͘ ka-kī mā tsò tshù-kak-thâu siōng tiōng-iàu ê tsio̍h-ki. 21 Kui-ê kiàn-tio̍k-bu̍t khò Ki-tok lâi kiat-ha̍p, hō͘-siōng tsiap-liân, tsiām-tsiām khòng-tián tsiâⁿ-tsò sìng-tiān lâi hiàn hō͘ Siōng-Tsú. 22 Uá-khò Sìng-Sîn ê pang-tsō͘, lín mā tsò-hué siū khí-tsō lâi tsiâⁿ-tsò Siōng-Tsú só͘ tuà ê só͘-tsāi.