《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第一章

作者 巴克禮普世版小組 2015.09.06

1 Guá Pó-lô sī hōng Siōng-Tsú ê tsí-ì tsò Ki-tok Iâ-so͘ ê sù-tô͘, siá phue hō͘ tuà tī Í-hut-só͘ sio̍k Ki-tok Iâ-so͘ tiong-si̍t ê sìn-tô͘. 2 Guān lán ê Thiⁿ-Pē Siōng-Tsú kah Tsú Iâ-so͘ Ki-tok siúⁿ-sù lín un-tián kah pîng-an.

Sio̍k-Lîng ê Hok-khì
3 Tio̍h o-ló lán ê Tsú Iâ-so͘ Ki-tok ê Thiⁿ-Pē! In-uī I thong-kuè Ki-tok tsiong thiⁿ-tíng ta̍k-tsióng sio̍k-lîng ê hok-khì siúⁿ-sù hō͘ lán. 4 Tī tshòng-sè í-tsîng, Siōng-Tsú to̍h thong-kuè Ki-tok kíng-suán lán, hō͘ lán tī I ê bīn-tsîng tsiâⁿ-tsò sìng-kiat bô khuat-tiám ê lâng. 5 In-uī Siōng-Tsú thiàⁿ lán, tsá to̍h kuat-tīng beh thong-kuè Iâ-so͘ Ki-tok hō͘ lán tsiâⁿ-tsò I ê kiáⁿ-jî. Tse sī tsiàu I ê tsí-ì, mā sī I só͘ huaⁿ-hí-.ê. 6 Lán tio̍h o-ló Siōng-Tsú îng-iāu ê un-tián, in-uī I tsiong só͘ thiàⁿ ê Kiáⁿ pe̍h-pe̍h siúⁿ-sù hō͘ lán. 7 Thong-kuè Ki-tok ê sí lán tit-tio̍h kiù-sio̍k, tsuē-kuà tit-tio̍h sià-bián. Siōng-Tsú ê un-tián si̍t-tsāi hui-siông hong-hù. 8 I tsiong tsit-ê tshiong-tsiok ê un-tián sù hō͘ lán, īng ta̍k-tsióng ê tshong-bîng tì-huī, 9 tsiàu I só͘ ì-ài ê tsí-ì hō͘ lán tsai, I tsá to̍h kuat-tīng beh thong-kuè Ki-tok lâi uân-sîng I ò-biāu ê kè-uē. 10 Sî-kî nā kàu, Siōng-Tsú beh uân-sîng tsit-ê kè-uē, tsiū-sī beh tsiong thiⁿ-tíng kah tē-tsiūⁿ ê pī-tsō-bu̍t lóng tsiâⁿ-tsò tsi̍t-thé, hō͘ Ki-tok tsò it-tshè ê thâu. 11 Ú-tiū bān-bu̍t lóng tsiàu Siōng-Tsú ê kè-uē kah tsí-ì lâi uân-sîng, Siōng-Tsú tsiàu I tsá to̍h tiāⁿ-tio̍h ê tsí-ì, thong-kuè Ki-tok kíng-suán lán tsò I ê tsú-bîn. 12 Án-ne sī beh hō͘ guán tsiah-ê sing kui-hiòng Ki-tok ê lâng lóng tshing-tsàn Siōng-Tsú ê îng-iāu. 13 Tuì lín lâi kóng mā sī án-ne, lín ū thiaⁿ-tio̍h tsin-lí ê sìn-sit, to̍h sī hō͘ lín tit-kiù ê hok-im. Lín ū sìn, Siōng-Tsú tsiū tsiong I só͘ ìng-ín ê Sìng-Sîn siúⁿ-sù hō͘ lín, tsò lín kui-hiòng I ê kì-hō. 14 Sìng-Sîn pó-tsìng lán sîng-tsiap Siōng-Tsú só͘ ìng-ín ê sán-gia̍p, ti̍t-kàu hō͘ kui-sio̍k Siōng-Tsú ê lâng tit-tio̍h uân-tsuân ê tsū-iû. Lán tio̍h tshing-tsàn I ê îng-iāu.

Pó-lô ê Kî-tó
15 In-uī án-ne, guá tsi̍t-ē thiaⁿ-tio̍h lín tuì Tsú Iâ-so͘ ū sìn-sim, koh tuì só͘-ū ê sìng-tô͘ ū thiàⁿ-sim, 16 tsiū put-sî uī-tio̍h lín kám-siā Siōng-Tsú. Guá mā tī kî-tó tiong siàu-liām lín. 17 kî-kiû lán ê Tsú Iâ-so͘ Ki-tok ê Siōng-Tsú, îng-iāu ê Thiⁿ-Pē, siúⁿ-sù Sìng-Sîn hō͘ lín ū tì-huī kah khé-sī, thang koh-khah tshim-ji̍p jīn-bat Siōng-Tsú. 18 Guá khún-kiû Siōng-Tsú khui lín ê sim-lîng, hō͘ lín thang tsai I suán-tiàu lín ê ǹg-bāng sī án-tsuáⁿ, I tuì sìn-tô͘ só͘ ìng-ín ê tsiok-hok sī juā-ni̍h-á hong-hù. 19 Koh hō͘ lán tsai I ê kuân-lîng ūn-hîng tī lán tsiah-ê sìn-tô͘ tiong-kan sī tuā kàu sím-mi̍h thîng-tō͘. 20 Tsit-ê tuā kuân-lîng tsiū-sī hō͘ Ki-tok tuì sí-lâng tiong koh-ua̍h, koh hō͘ Ki-tok tī thiⁿ-tíng tsē tī I ê tsiàⁿ-pîng. 21 Koh tī hia kuán-hat só͘-ū ê tsip-tsìng-tsiá, tsiáng-kuân-tsiá kah kuân-li̍k-tsiá. I tshiau-ua̍t kim-sè kah lâi-sè it-tshè kuân-pìng ē-tàng tshing-ho͘ ê thâu-hâm. 22 Siōng-Tsú koh hō͘ ú-tiū bān-bu̍t khut-ho̍k tī Ki-tok ê kha-ē, koh hō͘ I tsò kàu-huē ê thâu, lâi thóng-tī it-tshè. 23 Kàu-huē sī Ki-tok ê sing-khu, sī hō͘ Siōng-Tsú só͘ tshiong-muá ú-tiū bān-bu̍t ê Hit-uī Ki-tok só͘ tshiong-muá.