《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第三章

作者 巴克禮普世版小組 2013.03.21

Pó-lô Tuì Guā-pang-lâng Thuân Hok-im
1 In-uī án-ne, guá Pó-lô, uī-tio̍h lín Guā-pang-lâng tsò Ki-tok Iâ-so͘ ê siû-huān, thè lín tuì Siōng-Tsú kî-kiû. 2 Lín it-tīng ū thiaⁿ-tio̍h, Siōng-Tsú uī-tio̍h lín ê iân-kò͘, siúⁿ-sù un-tián hō͘ guá tsit-ê tsit-bū. 3 Siōng-Tsú tuì guá khé-sī, hō͘ guá tsai I ê ò-biāu. Guá í-king ū kán-lio̍k siá tsit-ê tāi-tsì. 4 Lín tha̍k liáu tsiū ē bîng-pi̍k guá tuì Ki-tok ò-biāu ê liáu-kái. 5 Tī kuè-khì ê sè-tāi, bô-lâng tsai tsit-ê ò-biāu, tsit-má Siōng-Tsú í-king thong-kuè Sìng-Sîn tuì sîn-sìng ê sù-tô͘ kah sian-ti khé-sī. 6 Tsiū-sī Guā-pang-lâng thong-kuè Ki-tok Iâ-so͘ ê hok-im, ē-tàng kah Iû-thài-lâng kāng-khuán hióng-siū Siōng-Tsú ê tsiok-hok, ha̍p-tsò tsi̍t-thé, tsò-hué sîng-siū Siōng-Tsú ê ìng-ín. 7 Siōng-Tsú siúⁿ-sù guá ti̍k-pia̍t ê un-tián, thong-kuè I ê tuā kuân-lîng, hō͘ guá tsiâⁿ-tsò thuân hok-im ê lô͘-po̍k. 8 Guá sī tsìng sìn-tô͘ tiong-kan siōng bî-sè ê, kìng-jiân tit-tio̍h tsit-ê un-tián, thang tsiong Ki-tok sǹg bē-liáu ê hong-sīng hok-im thuân hō͘ Guā-pang-lâng. 9 Án-ne thang hō͘ tsìng-lâng bîng-pi̍k Siōng-Tsú án-tsuáⁿ si̍t-hiān I ê ò-biāu. Tshòng-tsō ú-tiū ê Siōng-Tsú tī kuè-khì ê sè-tāi ū tsiong tsit-ê ò-biāu ún-ba̍t khí-lâi. 10 Taⁿ beh tī hiān-kim ê sè-tāi thong-kuè kàu-huē, hō͘ thian-kài ê tsip-tsìng-tsiá kah tsiáng-kuân-tsiá, lóng tsai Siōng-Tsú ta̍k-hāng ê tì-huī. 11 Siōng-Tsú tsiàu I íng-uán ê tsí-ì, í-king thong-kuè lán ê Tsú Ki-tok Iâ-so͘ lâi si̍t-hiān. 12 Lán kah Ki-tok kiat-liân, sìn-khò I tsiū thang tshiong-muá sìn-sim lâi kah Siōng-Tsú tshin-kīn. 13 Só͘-í kiû lín m̄-thang uī-tio̍h guá uī-tio̍h lín só͘ siū-khó͘ lâi kan-khó͘-sim. Kî-si̍t tse sī lín ê îng-kng.

Ki-tok ê Thiàⁿ
14 In-uī án-ne guá kuī-lo̍h tī Thiⁿ-Pē ê bīn-tsîng, 15 I sī thiⁿ-tíng tē-tsiūⁿ muí tsi̍t-ê ka-tso̍k ê khí-guân. 16 Guá tuì Siōng-Tsú kî-kiû, tsiàu I hong-sīng ê îng-kng, thong-kuè Sìng-Sîn sù lín khuì-la̍t, hō͘ lín sim-lāi ê ua̍h-miā ióng-tsòng khí-lâi. 17 Guá mā kiû Ki-tok tuì lín ê sìn lâi tuà tī lín ê sim-lāi, hō͘ lín ê thiàⁿ-sim ē-tàng tìng-kin lâi lo̍k-si̍t, 18 hō͘ lín ē-tàng tit-tio̍h khuì-la̍t lâi kah Siōng-Tsú só͘-ū ê tsú-bîn lóng bîng-pi̍k Ki-tok ê thiàⁿ sī juā-ni̍h tn̂g, khuah, kuân, tshim. 19 Guān lín ē-tàng thé-giām Ki-tok hit-tsióng tshiau-ua̍t tì-sik ē-tàng lí-kái ê thiàⁿ, hō͘ Siōng-Tsú ê uân-siān kā lín uân-tsuân tshiong-muá. 20 Siōng-Tsú ē-tàng tī lán tiong-kan ūn-hîng I ê tuā kuân-lîng, tuā-tuā tshiau-kuè lán só͘ kiû kah só͘ siūⁿ ê, lâi sîng-tsiū it-tshè. 21 Guān îng-iāu tī kàu-huē tiong, thong-kuè Ki-tok Iâ-so͘ kui hō͘ Siōng-Tsú, ti̍t-kàu bān-sè-tāi, tāi-tāi bû-tsīn. Amen.