《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十四章

作者 巴克禮普世版小組 2013.03.24

Hāi-sí Iâ-so͘ ê Im-bô͘ (Mt 26:1-5;Lk 22:1-2;Ih 11:45-53)
1 Puâⁿ-kuè-tseh, mā sī Tû-kàⁿ-tseh ê nn̄g-ji̍t tsîng, tsè-si-tiúⁿ kah king-ha̍k kàu-su teh tshuē khuàⁿ, tio̍h īng siáⁿ-mi̍h kè-bô͘ lia̍h Iâ-so͘, lâi kā I hāi-sí. 2 In kóng, " Tng tseh-kî m̄-thang, khióng-kiaⁿ jîn-bîn ē khí jiáu-luān."

Iâ-so͘ Tī Pik-tāi-nî Siū Buah-iû (Mt 26:6-13;Ih 12:1-8)
3 Iâ-so͘ tī Pik-tāi-nî, khì thái-ko pēⁿ-lâng Se-bûn ê tshù teh tsē-toh tsia̍h-pn̄g ê sî, ū tsi̍t-ê hū-jîn-lâng tuà tsi̍t-kuàn gi̍k-pân ji̍p-lâi, lāi-bīn té tsin sûn koh kuì ê Ná-ta̍t phang-iû. I kòng-phuà gi̍k-pân, kā phang-iû piàⁿ tī Iâ-so͘ ê thâu-khak tíng. 4 Ū tsi̍t-kuá lâng tsin siū-khì, hō͘-siōng gī-lūn kóng, " Ná tio̍h án-ne lâi lōng-huì phang-iû? 5 In-uī tsit kuàn phang-iû ē-tàng bē saⁿ-pah guā ê gîn-á, lâi tsín-tsè sàn-tshiah lâng." In tsiū kā i tsik-pī. 6 M̄-koh Iâ-so͘ kóng, " Tshut-tsāi i khì. Lín ná-ē kā i thiau-lân? I ū uī-tio̍h Guá tsò tsi̍t-hāng hó-sū. 7 In-uī siông-siông ū sàn-tshiah lâng kah lín tsò-hué, put-kuán sî lóng ē-tàng tuì in hó khuán-thāi, m̄-koh Guá bô siông-siông kah lín tsò-hué. 8 Tsit-ê hū-jîn-lâng í-king tsīn-la̍t lâi tsò. I sing īng iû buah Guá ê sing-khu, lâi kā Guá tsún-pī bâi-tsòng. 9 Guá si̍t-tsāi kā lín kóng, Hok-im bô-lūn thuân-kàu siáⁿ-mi̍h só͘-tsāi, lâng lóng ē kóng-khí tsit-ê hū-jîn-lâng só͘ tsò ê tāi-tsì, lâi kā i kì-liām."

Iû-tāi Tshut-bē Iâ-so͘ (Mt 26:14-16;Lk 22:3-6) 10 Tsa̍p-jī bûn-tô͘ ê tsi̍t-ê, Ka-lio̍k-lâng Iû-tāi, khì kìⁿ hiah-ê tsè-si-tiúⁿ, beh kā Iâ-so͘ tshut-bē hō͘ in. 11 In thiaⁿ-tio̍h án-ne tsiū tsin huaⁿ-hí, koh tap-ìng beh hō͘ i tsîⁿ. Iû-tāi tsiū tshuē-khuàⁿ ū siáⁿ-mi̍h ki-huē, thang kā Iâ-so͘ tshut-bē.

Tsún-pī Puâⁿ-kuè-tseh ê Buán-tshan (Mt26:17-25;Lk22:7-14,21-23;Ih13:21-30) 12 Tû-kàⁿ-tseh ê thâu tsi̍t-ji̍t, tsiū-sī thâi Puâⁿ-kuè-tseh ê iûⁿ-ko ê ji̍t, bûn-tô͘ mn̄g Iâ-so͘ kóng, " Lí ài guán khì siáⁿ-mi̍h só͘-tsāi tsún-pī, hō͘ Lí tsia̍h puâⁿ-kuè-tseh ê buán-tshan?" 13 Iâ-so͘ tshe nn̄g-ê bûn-tô͘, kā in kóng, " Lín ji̍p-khì siâⁿ-lāi, tsiū ē tú-tio̍h tsi̍t-ê the̍h tsuí-pân ê lâng, lín tio̍h tuè i khì. 14 Tī i só͘ ji̍p-khì ê tshù, kā hit ke ê tsú-lâng kóng, " Lāu-su kóng, ' Guá beh kah bûn-tô͘ tsia̍h Puâⁿ-kuè-tseh buán-tshan ê kheh-thiaⁿ tī tó-uī?' 15 I ē pò lín khuàⁿ lâu-tíng tsi̍t king í-king tsún-pī hó-sè ê tuā thiaⁿ. Lín tuà hia tsún-pī lán ê buán-tshan." 16 Hit nn̄g-ê bûn-tô͘ tsiū tshut-khì lâi-kàu siâⁿ-lāi. Kó-jiân tú-tio̍h tsiàu Iâ-so͘ só͘ kóng ê it-tshè. In tsiū tuà hia tsún-pī Puâⁿ-kuè-tseh ê buán-tshan. 17 Kàu ji̍t àm, Iâ-so͘ tsiū kah tsa̍p-jī sù-tô͘ tsò-hué lâi. 18 In tsē-toh teh tsia̍h-pn̄g ê sî, Iâ-so͘ kóng, " Guá si̍t-tsāi kā lín kóng, lín tsiah-ê kah Guá tsò-hué tsia̍h ê tiong-kan, ū tsi̍t-ê lâng ē kā Guá tshut-bē ." 19 Tāi-ke tsin iu-būn, tsi̍t-ê tsi̍t-ê mn̄g Iâ-so͘ kóng, " Tsóng m̄ sī guá ho͘ⁿh?" 20 Iâ-so͘ kā in kóng, " Sī lín tsa̍p-jī lâng tiong-kan ê tsi̍t-ê. Tsiū-sī the̍h piáⁿ kah Guá tâng-tsê tī puâⁿ-ni̍h teh ùn hit lâng. 21 Jîn-tsú si̍t-tsāi ē tsiàu Sìng-king só͘ kì-tsài ê lâi siū-hāi, m̄-koh tshut-bē Jîn-tsú ê lâng ū tsai-hō! Hit lâng lîng-khó bô tshut-sì khah hó!"

Tsú ê Buán-tshan (Mt 26:26-30;Lk 22:14-20;1Ko 11:23-25)
22 In teh tsia̍h ê sî, Iâ-so͘ the̍h piáⁿ tsiok-siā, tsiū peh-phuà pun hō͘ bûn-tô͘, kóng, " The̍h-khì tsia̍h, tsit-ê sī Guá ê sing-khu." 23 Suà lo̍h-lâi koh phâng pue tsiok-siā liáu-āu, the̍h hō͘ bûn-tô͘. In lóng lim hit pue. 24 Iâ-so͘ kā in kóng, " Tsit-ê sī Guá ê hueh, tsiū-sī bîng-iok ê hueh, uī-tio̍h tsin-tsē lâng lâi lâu tshut-lâi ê. 25 Guá si̍t-tsāi kā lín kóng, tuì taⁿ í-āu kàu tī Siōng-Tsú Kok-tō͘ lim hit-ê sin ê phû-tô-tsiap í-tsîng, Guá tsua̍t-tuì bô koh lim tsit-ê phû-tô-tsiap." 26 In gîm-si liáu-āu tsiū tshut-lâi, khì Kan-ná-suaⁿ.

Iâ-so͘ Ī-giân Pí-tik M̄-jīn I (Mt26:31-35;Lk22:31-34;Ih13:36-38)
27 Iâ-so͘ kā in kóng, " Lín lóng ē sit-khì sìn-sim lâi pàng-sak Guá, in-uī Sìng-king ū kì-tsài:, ' Guá beh phah bo̍k-tsiá, iûⁿ tsiū sì-suàⁿ.'( tsù: SKLA 13:7) 28 M̄-koh guá koh-ua̍h liáu-āu, ē pí lín tāi-sing khì kàu Ka-lī-lī-síng." 29 Pí-tik kā Iâ-so͘ kóng, " Tsìng-lâng sui-jiân ē pàng-sak Lí, m̄-koh guá bē án-ne tsò." 30 Iâ-so͘ kā i kóng, " Guá si̍t-tsāi kā lí kóng, kin-á-ji̍t tsiū-sī tī ing-àm, ke thî nn̄g pái í-tsîng, lí ē saⁿ pái m̄ jīn guá." 31 M̄-koh Pí-tik koh-khah kian-tshî kóng, " Guá nā tio̍h kah Lí tsò-hué sí, mā tsua̍t-tuì bē m̄ jīn Lí." Tsìng-lâng mā lóng án-ne kóng.

Tī Khik-se-má-nî-hn̂g Kî-tó (Mt 26:36-46;Lk 23:39-46)
32 Iâ-so͘ kah bûn-tô͘ tsò-hué lâi-kàu tsi̍t-ê kiò Khik-se-má-nî ê só͘-tsāi. Iâ-so͘ kā bûn-tô͘ kóng, " Lín tsē tuà tsia thìng-hāu. Guá beh khì kî-tó." 33 Iâ-so͘ tsiū tshuā Pí-tik, Ngá-kok kah Iok-hān tsò-hué khì. Iâ-so͘ tio̍h-kiaⁿ koh kî-kuài, kám-kak hui-siông ai-siong. 34 Kā in kóng, " Guá ê sim iu-būn kah kiông-beh sí. Lín tuà tsia tio̍h kíng-síng!" 35 Iâ-so͘ koh lio̍h-á tsìn-tsîng phak tī thô͘-kha kî-kiû, khuàⁿ ē-tàng hō͘ I bián king-kuè tsit-ê thòng-khó͘ ê sî-kan á-bē. 36 Iâ-so͘ kî-kiû kóng, " A-pà Thiⁿ-Pē ah, Lí bān-sū lóng ē, guān Lí hō͘ tsit-ê pue lī-khui Guá, m̄-koh m̄-sī tsiàu Guá só͘ ì-ài, tio̍h tsiàu Lí ê tsí-ì lâi si̍t-hiān." 37 Jiân-āu Iâ-so͘ tńg-lâi, khuàⁿ-tio̍h in teh khùn, tsiū kā Pí-tik kóng, " Se-bûn, lí teh khùn? Kám bē-tàng tshéⁿ-tshéⁿ kíng-síng tsi̍t sî kú? 38 Lín tio̍h kíng-síng kî-tó, tsiah bián-tit siū bê-hi̍k. Sim-lîng ì-ài tsò hó, m̄-koh jio̍k-thé nńg-tsiáⁿ luán-jio̍k." 39 Iâ-so͘ koh-tsài khì kî-tó, mā sī kāng-khuán kóng hiah-ê uē. 40 Iâ-so͘ tńg-lâi koh khuàⁿ-tio̍h in in-uī ba̍k-tsiu tsin siap iáu teh khùn. In mā m̄-tsai tio̍h án-tsuáⁿ ìn Iâ-so͘ khah hó. 41 Iâ-so͘ tē-saⁿ pái tńg-lâi kā in kóng, " Taⁿ lín iáu-teh khùn, iáu-teh hioh-khùn , sī-bô? Án-ne hó à, sî-kan í-king kàu à, Jîn-tsú hō͘ lâng tshut-bē kau tī tsuē-jîn ê tshiú-thâu à. 42 Khí-lâi! Lán lâi-khì. Lín khuàⁿ, tshut-bē Guá ê lâng beh kàu à."

Iâ-so͘ Hông Lia̍h-khì (Mt 26:47-56;Lk 22:47-63;Ih18:3-12)
43 Iâ-so͘ iáu teh kóng ê sî, tsa̍p-jī bûn-tô͘ tiong-kan ê Iû-tāi lâi kàu-uī, mā ū kui-tīn lâng gia̍h to kah thuî-á, tuè tsè-si-tiúⁿ, king-ha̍k kàu-su kah tiúⁿ-ló tsò-hué uá-lâi. 44 Hit-ê tshut-bē Iâ-so͘ ê lâng tsìn-tsîng ū kah in thò àm-hō kóng, " Guá kā I tsim ê hit lâng tsiū-sī Iâ-so͘. Lín thang kā I lia̍h khí-lâi, sè-jī kā I ah khì." 45 Iû-tāi lâi kàu-uī, suî-sî kiâⁿ uá khì Iâ-so͘ hia, kiò tsi̍t siaⁿ " Lāu-su", tsiū ti̍t-ti̍t kā I tsim. 46 In tsiū hē-tshiú lia̍h Iâ-so͘. 47 Khiā tī piⁿ-á ê tsi̍t-ê lâng pui̍h to tshut-lâi, tuì tuā-tsè-si ê lô͘-po̍k phut-khì, kā i tsi̍t-pîng hīⁿ-á siah-tiāu. 48 Iâ-so͘ kā in kóng, " Lín gia̍h to kah thuî-á tshut-lâi lia̍h guá, tshin-tshiūⁿ beh lia̍h tsha̍t-á, sī-bô? 49 Guá ta̍k-ji̍t tī sìng-tiān lāi kà-sī lâng, kah lín tsò-hué tī hia, lín bô kā Guá lia̍h, m̄-koh án-ne sī beh ìng-giām Sìng-king ê uē." 50 Hit sî, só͘-ū ê bûn-tô͘ lóng pàng-sak Iâ-so͘, tô-tsáu. 51 Ū tsi̍t-ê siàu-liân-lâng thǹg-pak-theh, kan-taⁿ mua iù-tē-pò͘, tuè Iâ-so͘ kiâⁿ. In beh kā i lia̍h. 52 Hit lâng tsiū kā iù-tē-pò͘ pàng teh, thǹg-pak-theh tô-tsáu.

Iâ-so͘ Tī Gī-huē Siū Sím-mn̄g (Mt 26:57-68;Lk 22:54-55,63-71;Ih 18:13-14,19-24)
53 Jiân-āu hiah-ê lâng kā Iâ-so͘ tuà kàu tuā-tsè-si ê só͘-tsāi. Só͘-ū ê tsè-si-tiúⁿ, tiúⁿ-ló kah king-ha̍k kàu-su lóng tsū-tsi̍p uá-lâi. 54 Pí-tik lī hn̄g-hn̄g tuè Iâ-so͘, lâi-kàu tuā-tsè-si kong-kuán ê tiâⁿ, ji̍p-khì lāi-bīn, kah hiah-ê sī-uē-ping tsē tsò-hué teh hang-hué. 55 Tsiah-ê tsè-si-tiúⁿ kah tsuân gī-huē it-ti̍t beh tshuē tsìng-kì lâi kò Iâ-so͘, beh kā I tīng sí-tsuē, m̄-koh lóng tshuē bô jīm-hô tsìng-kì. 56 In-uī ū tsin-tsē lâng lām-sám kí-tsìng lâi bû-kò Iâ-so͘, m̄-koh in ê tsìng-sû bô tuì-tâng. 57 Mā ū kuí-nā lâng khí-lâi lām-sám kiàn-tsìng kóng, 58 " Guán bat thiaⁿ-tio̍h I kóng, ' Guá beh huí-huāi tsit-king lâng ê tshiú só͘ khí ê sìng-tiān, saⁿ-ji̍t lāi beh koh khí tsi̍t king m̄-sī lâng ê tshiú só͘ khí ê sìng-tiān.'" 59 In án-ne ê tsìng-sû mā bô tuì-tâng. 60 Tuā-tsè-si tsiū khiā khí-lâi, tī tsìng-lâng ê bīn-tsîng mn̄g Iâ-so͘ kóng, " Tsiah-ê lâng teh kā Lí kò siáⁿ-mi̍h? Lí ná-ē lóng bô ìn?" 61 Iâ-so͘ tiām-tiām lóng bô ìn. Tuā-tsè-si koh mn̄g I kóng, " Lí sī Ki-tok, sī ing-kai o-ló ê Hit-uī ê Kiáⁿ á m̄-sī?" 62 Iâ-so͘ kóng, " Guá sī, lín ē khuàⁿ-tio̍h Jîn-tsú tsē tī ū kuân-lîng Hit-uī ê tsiàⁿ-pîng, tsē thiⁿ-tíng ê hûn kàng-lîm." 63 Tuā-tsè-si thiah-phuà ka-kī ê guā-saⁿ, kóng, " Lán kám iáu su-iàu siáⁿ-mi̍h tsìng-jîn? 64 Lín í-king thiaⁿ-tio̍h I teh siat-to̍k Siōng-Tsú à. Lín phah-sǹg án-tsuáⁿ?" In lóng tuàn-tīng I kai sí. 65 Ū tsi̍t-kuá lâng kā Iâ-so͘ phuì tshuì-nuā , am I ê bīn, īng kûn-thâu-bó kā I tsing, kā I kóng, " Lí tsò sian-ti, ioh khuàⁿ siáⁿ-lâng kā Lí tsing?" Hiah-ê sī-uē-ping uî uá-lâi, īng tshiú kā I siàn.

Pí-tik M̄-Jīn Tsú Iâ-so͘ (Mt 26:69-75;Lk 22:56-62;Ih 18:15-18,25-27)
66 Pí-tik iáu tī ē-bīn guā-tiâⁿ ê sî, ū tuā-tsè-si tsi̍t-ê lú-pī uá-lâi, 67 khuàⁿ-tio̍h Pí-tik teh hang-hué, tsiū ti̍t-ti̍t kā i siòng, kóng, " Lí mā bat kah hit-ê Ná-sat-li̍k-lâng Iâ-so͘ tàu-tīn." 68 Pí-tik m̄ sîng-jīn kóng, " Guá m̄-tsai, mā bē liáu-kái lí teh kóng siáⁿ-mi̍h." Pí-tik tsiū tshut-khì kàu tsîng-tiâⁿ. Hit sî ke tsiū thî. 69 Hit-ê lú-pī koh khuàⁿ-tio̍h i, kā piⁿ-á teh khiā ê lâng kóng, " Tsit-ê lâng mā sī in hit tiong-kan ê tsi̍t-ê." Pí-tik koh m̄ sîng-jīn. 70 Kuè bô juā kú, piⁿ-á teh khiā ê koh tuì Pí-tik kóng, " Lí khak-si̍t kah in kâng tóng, in-uī lí mā sī Ka-lī-lī-lâng." 71 Pí-tik tsiū tsiù-tsuā kóng, " Lín só͘ kóng hit-ê lâng, guá m̄-bat." 72 Hit sî ke tsiū thî tē-jī pái. Pí-tik siūⁿ-khí Iâ-so͘ kā i kóng ê uē: "Ke thî nn̄g pái í-tsîng, lí ē saⁿ pái m̄ jīn Guá." tsiū tuā-siaⁿ thî-khàu.