《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第四章

作者 巴克禮普世版小組 2015.09.27

Kàu-huē ê Ha̍p-it
1 Tsò tsi̍t-ê uī-tio̍h Tsú tsò siû-huān ê lâng, guá khó͘-khǹg lín tsò tāi-tsì tio̍h hû-ha̍p Siōng-Tsú ê ho͘-tiàu. 2 Huān-sū tio̍h khiam-pi, un-jiû, jím-nāi, īng thiàⁿ-sim hō͘-siōng khuan-iông, 3 īng hô-pîng hō͘-siōng kiat-liân, tsīn-la̍t pó-tshî Sìng-Sîn só͘ sù hō͘ lín ê ha̍p-it. 4 Sin-thé tsí-ū tsi̍t-ê, Sìng-Sîn tsí-ū tsi̍t-ê, tú tshin-tshiūⁿ Siōng-Tsú ho͘-tiàu lán lâi tit-tio̍h ê ǹg-bāng mā sī tsi̍t-ê. 5 Tsú tsí-ū tsi̍t-ê, Sìng-Sîn tsí-ū tsi̍t-ê, sé-lé mā tsí-ū tsi̍t-ê. 6 Siōng-Tsú tsí-ū tsi̍t-ê, tsò jîn-luī tsìng-lâng ê Thiⁿ-Pē. I tī ú-tiū ê tiong-kan, kuàn-tshuàn tī bān-bu̍t, kuán-hat it-tshè. 7 M̄-koh lán ta̍k-lâng lóng tsiàu Ki-tok só͘ un-sù hō͘ lán ê hūn-liōng lâi niá-siū. 8 Tsiàu Sìng-king só͘ kóng: I sing khì-kàu siōng kuân thiⁿ-tíng, tsiū lia̍h hiah-ê siū-lia̍h ê, mā siúⁿ-sù un-tián hō͘ lâng,( tsù: SPh 68:18) 9 "I sing-kuân" kám m̄-sī teh kóng I bat kàng lo̍h-khì tē-hā? 10 Án-ne, "kàng-lo̍h"ê Hit-uī tsiū-sī "sing-kuân" kàu thiⁿ-tíng Hit-uī, thang lâi tshiong-muá ú-tiū bān-bu̍t. 11 Siōng-Tsú siúⁿ-sù hō͘ lâng ê, ū sù-tô͘, ū sian-ti, ū thuân hok-im ê, ū bo̍k-su kah kàu-su. 12 Án-ne tsò sī beh tsong-pī Siōng-Tsú ê tsú-bīn, thang lâi tsò tshe-īng ê kang, khí-tsō Ki-tok ê thé. 13 Tsuè-āu, lán lóng thang tuì Siōng-Tsú ê Kiáⁿ ū it-tì ê sìn-gióng kah jīn-bat lâi ha̍p-it, tsiâⁿ-tsò tsi̍t-ê uân-tsuân ê lâng, hō͘ Ki-tok tshiong-muá lâi tióng-tāi sîng-jîn, ta̍t-kàu Ki-tok ê uân-tsuân kíng-kài. 14 Án-ne, lán bô koh-tsài sī gín-á, bē koh hō͘ ta̍k-tsióng kà-sī ê hong iô-tāng phiau-liû, tiòng-tio̍h lâng ê khuí-kè kah muâ-phiàn, tì-kàu hō͘ lâng ín-iú khì. 15 Lán tian-tò tio̍h īng thiàⁿ-sim kóng sîng-si̍t-uē, ta̍k hong-bīn lóng o̍h Ki-tok ê bô͘-iūⁿ lâi tsiām-tsiām sîng-tióng, in-uī Ki-tok sī lán ê thâu. 16 Thong-kuè Ki-tok, kui sing-khu ê kok ki-thé kiat-ha̍p khí-lâi, hō͘-siōng tsiap-ìng, huat-hui kok ki-thé ê kong-lîng, sing-khu ná tióng tuā, īng thiàⁿ-sim lâi khí-tsō ka-kī.

Ki-tok Hō͘ Lán Tsiâⁿ-tsò Sin Lâng
17 Só͘-í guá hōng Tsú ê miâ khó͘-khǹg lín, m̄-thang koh-tsài kè-sio̍k kuè Guā-pang-lâng hit-khuán ê sing-ua̍h. In ê su-sióng hi-hàm, 18 in ê sim-su o͘-àm, keh-tn̄g Siōng-Tsú siúⁿ-sù ê ua̍h-miā, in-uī in lóng m̄-tsai-iáⁿ iū-koh kò͘-tsip. 19 In sòng-sit liông-sim, tsiū hòng-tshiòng ka-kī ê su-io̍k, koh tham-luân ta̍k-tsióng ù-uè ê hîng-uî. 20 M̄-koh lín pīng m̄-sī án-ne teh ha̍k-si̍p Ki-tok. 21 Lín ing-kai ū thiaⁿ-kuè Ki-tok ê tāi-tsì, koh-ū ha̍k-si̍p I ê kà-sī. Iâ-so͘ pún-sin tsiū-sī tsin-lí. 22 Án-ne, tio̍h thuat-lī í-tsîng ê sing-ua̍h, lín thǹg-khì kū ê lâng, kā kū ê "guá" uāⁿ-sin, in-uī kū ê "guá" su-io̍k ê ín-iú teh pāi-huāi. 23 Lín sim-su ì-liām mā tio̍h uāⁿ sin. 24 Tio̍h tsiâⁿ-tsò sin ê lâng, tsiū-sī tsiàu Siōng-Tsú īng tsin-lí só͘ sán-sing ê kong-gī kah sìng-kiat, lâi tshòng-tsō ê sin-lâng. 25 Só͘-í, lín tio̍h tû-khì pe̍h-tsha̍t, ta̍k-lâng kah i ê tshù-piⁿ kóng sîng-si̍t-uē,( tsù: SKL 8:16) in-uī lán lóng sī Ki-tok ê ki-thé. 26 Lín ê siū-khì m̄-thang tì-kàu huān-tsuē,( tsù: SPh 4:4) mā m̄-thang siū-khì kàu ji̍t-lo̍h iáu bē-suah. 27 Mā m̄-thang hō͘ Mô͘-kuí ū khang-phāng thang ji̍p. 28 Bat tsò-tsha̍t ê m̄-thang koh thau-the̍h. Tio̍h lô-khó͘ tsò-kang lâi tit-tio̍h tsìng-tong ê siu-ji̍p, tsiah ē-tàng pang-tsō͘ khiàm-khueh ê lâng. 29 M̄-thang kóng pháiⁿ-uē, tian-tò tio̍h kóng ē tsō-tsiū lâng ê hó-uē, hō͘ thiaⁿ-tio̍h ê lâng tit-tio̍h lī-ik. 30 Mā m̄-thang hō͘ Siōng-Tsú ê Sìng-Sîn iu-siong, in-uī Sìng-Sîn sī Siōng-Tsú ê ìn-kì, pó-tsìng lín ê tsín-kiù ê ji̍t tit-tio̍h tháu-pàng. 31 Tio̍h tû-khì lín tiong-kan só͘-ū ê khó͘-to̍k, uàn-hūn, siū-khì, pháiⁿ sìng-tē, huí-pòng kah it-tshè ê ok-to̍k. 32 Koh tio̍h īng jîn-tsû hō͘-siōng khuán-thāi, tsûn liân-bín ê sim. Tāi-ke hō͘-siōng sià-bián, tú tshin-tshiūⁿ Siōng-Tsú thong-kuè Ki-tok bat kā lín sià-bián kāng-khuán.