《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第五章

作者 巴克禮普世版小組 2015.10.04

Tī Kng-bîng Tiong Sing-ua̍h
1 Lín kì-jiân tsò Siōng-Tsú só͘ thiàⁿ ê kiáⁿ-jî, tio̍h o̍h Siōng-Tsú. 2 Kiâⁿ-ta̍h mā tio̍h ū thiàⁿ-sim, tshin-tshiūⁿ Ki-tok bat thiàⁿ lán, uī-tio̍h lán hi-sing ka-kī ê sèⁿ-miā tsò phang-phang ê tsè-mi̍h hiàn hō͘ Siōng-Tsú. 3 Lín kì-jiân sī Siōng-Tsú ê tsú-bîn, kan-îm kah it-tshè ê ù-uè, á-sī tham-sim, tī lín tiong-kan liân kóng-khí to m̄-thang. 4 M̄-thang kóng kiàn-siàu kah siâ-îm, á-sī hā-liû ê uē, tian-tò tio̍h tio̍h kóng kám-siā Siōng-Tsú ê uē. 5 Lín khak-si̍t tsai, îm-luān, ù-uè, á-sī tham-luân(tse sī tsi̍t-tsióng ngó͘-siōng tsông-pài) ê lâng, lóng bē tit thang tsiâⁿ-tsò Ki-tok kah Siōng-Tsú Kok-tō͘ ê tsú-bîn. 6 M̄-thang hō͘ lâng īng hi-ké ê uē khi-phiàn, in-uī Siōng-Tsú ê siū-khì ē uī-tio̍h tsiah-ê tāi-tsì lîm-kàu tī hiah-ê puē-gi̍k ê lâng. 7 Só͘-í lín m̄-thang kah hit-khuán lâng lâi-óng. 8 In-uī lín kuè-khì tī o͘-àm tiong, m̄-koh taⁿ lín tsiâⁿ-tsò sio̍k Tsú ê lâng ū kng-bîng, kiâⁿ-ta̍h tio̍h tsiàu kng-bîng ê lâng ê khuán-sit. 9 Kng-bîng só͘ kiat ê kué-tsí tsiū-sī liông-siān, kong-gī kah tsin-lí. 10 Tio̍h bîng-tshat sím-mi̍h sī Tsú só͘ huaⁿ-hí ê tāi-tsì. 11 M̄-thang tsham-ú tī o͘-àm tiong teh tsò bô lō͘-īng ê tāi-tsì, tian-tò tio̍h kā in tsik-pī. 12 In am-am khàm-khàm teh tsò ê tāi-tsì, liân kóng to kiàn-siàu! 13 It-tshè siū tsik-pī tsiū ē hō͘ kng hián-bîng tshut-lâi, in-uī hō͘ kng pho̍k-lō͘ tsiū ē hián-bîng. 14 Só͘-í ū tsi̍t-kù-uē án-ne kóng: Teh khùn ê lâng tio̍h tshéⁿ,( tsù: ISA 26:19; 51:17; 52:1; 60:1) tuì sí-lâng tiong peh khí-lâi!( tsù: ISA 26:19) Ki-tok beh kā lí tsiò-kng.( tsù: ISA 60:1) 15 Só͘-í, lín tio̍h tsim-tsiok khuàⁿ lín ê kiâⁿ-ta̍h, m̄-thang tsò bô tì-sik ê lâng, tio̍h tshong-bîng ê lâng. 16 Tio̍h pá-ak ki-huē, in-uī hiān-kim sī siâ-ok ê sè-tāi. 17 Só͘-í, m̄-thang tsò gōng-lâng, tio̍h bîng-pi̍k sím-mi̍h sī Tsú ê tsí-ì. 18 Mā m̄-thang tsiú-tsuì, in-uī tsiú-tsuì ē kā lín pāi-huāi, tian-tò tio̍h hō͘ Sìng-Sîn kā lín tshiong-muá. 19 Tio̍h īng si-phian, īng sìng-si, īng lîng-kua, hō͘-siōng tuì-tshiùⁿ, tuì sim-té tshiùⁿ sìng-si kah si-phian lâi o-ló Tsú. 20 Tio̍h khò lán ê Tsú Iâ-so͘ Ki-tok ê miâ, uī-tio̍h ta̍k-hāng tāi-tsì sî-siông lâi kám-siā Thiⁿ-Pē Siōng-Tsú.

Hu-tshe ê Kuan-hē
21 Lín tio̍h īng kìng-uì Ki-tok ê sim lâi hō͘-siōng sūn-ho̍k. 22 Tsò hū-jîn-lâng ê, tio̍h tshin-tshiūⁿ sūn-ho̍k Tsú án-ne lâi sūn-ho̍k ka-kī ê tiōng-hu. 23 In-uī tiōng-hu sī hū-jîn-lâng ê thâu, tshin-tshiūⁿ Ki-tok tsò kàu-huē ê thâu. Ki-tok pún-sin mā-sī Kàu-huē ê kiù-tsú, kàu-huē tsiū-sī I ê thé. 24 Tshin-tshiūⁿ kàu-huē sūn-ho̍k Ki-tok, tsò hū-jîn-lâng ê mā tio̍h sū-sū án-ne sūn-ho̍k tiōng-hu. 25 Tsò tiōng-hu ê, lín tio̍h thiàⁿ hū-jîn-lâng, tshin-tshiūⁿ Ki-tok thiàⁿ kàu-huē, mā uī-tio̍h kàu-huē hi-sing ka-kī. 26 Án-ne tsò sī beh thong-kuè I ê uē, īng tsuí sé tshing-khì lâi sìng-huà kàu-huē kui hō͘ Siōng-Tsú, 27 hō͘ kàu-huē ū îng-kng, bô ù-tiám, bô jiàu-bûn, á-sī kî-tha khuat-tiám, tsiâⁿ-tsò sìng-kiat bô khuat-tiám lâi hiàn hō͘ Tsú ka-kī. 28 Siāng-khuán, tiōng-hu tio̍h thiàⁿ ka-kī ê hū-jîn-lâng tshin-tshiūⁿ thiàⁿ ka-kī ê sing-khu. Thiàⁿ ka-kī ê hū-jîn-lâng tsiū-sī thiàⁿ ka-kī. 29 Bô-lâng uàn-hūn ka-kī ê sing-khu, tian-tò kā i pó-sioh tsiàu-kò͘, kah Ki-tok tuì-thāi kàu-huē kāng-khuán. 30 In-uī lán sī Ki-tok sing-khu ê pah-thé. 31 Sìng-king kóng, "In-uī án-ne, lâng beh lī-khui pē-bú, kah i ê bó͘ kiat-liân, nn̄g-lâng tsiâⁿ-tsò tsi̍t-thé."( tsù: CSK 2:24) 32 Tsit-tuāⁿ king-bûn khé-sī tsi̍t-ê ki̍k-tuā ê ò-biāu. Tsiàu guá ê liáu-kái, tse sī teh tsí Ki-tok kah kàu-huē ê kuan-hē. 33 Tsóng-sī, tse mā sik-iōng tī lín ta̍k-lâng. Tiōng-hu tio̍h thiàⁿ i ê hū-jîn-lâng tshin-tshiūⁿ ka-kī; hū-jîn-lâng mā tio̍h kìng-uì i ê tiōng-hu.