《巴克禮普世版聖經（試讀本）》

 | | | 轉寄

巴克禮普世版（試讀本） 腓立比書第一章

作者 巴克禮普世版小組 2015.10.18

1 Guá Pó-lô kah Thê-mô͘-thài sī Ki-tok Iâ-so͘ ê lô͘-po̍k, guán siá phue hō͘ tuà tī Hui-li̍p-pí hiah-ê kah Ki-tok Iâ-so͘ kiat-liân ê só͘-ū sìn-tô͘, í-ki̍p kàu-huē ê kàm-tok kah tsip-sū. 2 Guān lán ê Thiⁿ-Pē Siōng-Tsú kah Tsú Iâ-so͘ Ki-tok siúⁿ-sù lín un-tián kah pîng-an!

Pó-lô Uī Hui-li̍p-pí ê Sìn-tô͘ Kî-tó
3 Guá ta̍k-pái siūⁿ-tio̍h lín ê sî, tsiū kám-siā guá ê Siōng-Tsú. 4 Ta̍k-pái uī-tio̍h lín tāi-ke kî-tó ê sî, lóng īng huaⁿ-hí ê sim kî-tó, 5 in-uī lín tuì thâu tsi̍t-ji̍t kàu taⁿ, lóng tsò-hué tsham-ú suan-iông hok-im ê kang-tsok. 6 Guá tshim-sìn Hit-uī khai-sí tī lín tiong-kan tsò bí-hó kang-tsok ê Siōng-Tsú, ē tī Iâ-so͘ Ki-tok tsài-lîm ê ji̍t kā i uân-sîng. 7 Guá siông-siông teh siàu-liām lín, tuì lín tsìng-lâng ū tsit-khuán ê kám-tsîng sī tsin tong-jiân ê tāi-tsì, in-uī bô-lūn guá tī kaⁿ-ga̍k-lāi á-sī uī-tio̍h hok-im teh piān-hō͘ kah tsò-tsìng ê sî, lín lóng ū kah guá hun-hióng Siōng-Tsú ê un-tián. 8 Guá īng Ki-tok Iâ-so͘ ê thiàⁿ-sim juā-ni̍h-á siàu-liām lín tāi-ke, Siōng-Tsú ē-tàng kā guá tsò-tsìng. 9 Guá só͘ kî-kiû ê tsiū-sī: hō͘ lín ê thiàⁿ-sim ē ná ke-thiⁿ, lín ê tì-huī kah tuì ta̍k-tsióng tāi-tsì ê phuàⁿ-tuàn-li̍k mā ē ná tsìn-pō͘; 10 hō͘ lín ē-hiáu hun-pia̍t hit-ê siōng hó ê tāi-tsì, án-ne tī Ki-tok tsài-lîm ê ji̍t, lín tsiah ē tsiâⁿ-tsò sûn-tsuân kah bô thang hiâm ê lâng. 11 Lín ê sing-ua̍h tsiū ē thong-kuè Iâ-so͘ Ki-tok lâi kiat hó tik-hīng ê kué-tsí, thang tsiong îng-kng kah o-ló kui hō͘ Siōng-Tsú.

Uī-tio̍h Ki-tok Lâi Ua̍h
12 Hiaⁿ-tī tsí-muē ah, guá ái lín tsai, guá só͘ tú-tio̍h ê tāi-tsì tian-tò hō͘ hok-im koh-khah tsìn-tián. 13 Kiat-kó, ông-kiong ê kíng-uē tsuân-thé kah tī tsia só͘-ū ê lâng lóng tsai, guá ê kuaiⁿ-kaⁿ sī uī-tio̍h Ki-tok ê iân-kò͘. 14 Tsin-tsē hiaⁿ-tī tsí-muē in-uī guá ê kuaiⁿ-kaⁿ, tuì Tsú koh-khah tshim-sìn, koh-khah hó-táⁿ bô kiaⁿ-hiâⁿ lâi thuân Siōng-Tsú ê sìn-sit. 15 Sū-si̍t-siōng, ū-lâng thuân Ki-tok ê hok-im, sī tshut-tī uàn-tò͘ kah ài uan-ke ê sim-lí, ū-lâng sī tshut-tī sîng-ì. 16 Sîng-ì ê lâng sī tshut-tī thiàⁿ-sim, in-uī in tsai, Siōng-Tsú kau-thok guá lâi uī-tio̍h hok-im piān-hō͘. 17 Hiah-ê uàn-tò͘ kah ài uan-ke ê lâng teh suan-iông Ki-tok sī tshut-tī iá-sim, tōng-ki bô tan-sûn. In siūⁿ beh thàn guá kuaiⁿ-kaⁿ ê sî ke-thiⁿ guá ê kan-khó͘. 18 Án-ne ū sím-mi̍h kuan-hē? Put-kuán in sī ké-ì á-sī tsin-sim, bô-lūn án-tsuáⁿ, huâiⁿ-ti̍t Ki-tok ê hok-im thuân-khui, guá tsiū huaⁿ-hí, mā beh kè-sio̍k huaⁿ-hí. 19 In-uī guá tsai, tsit-ê tāi-tsì ū lín ê kî-tó kah Iâ-so͘ Ki-tok ê Sìng-Sîn ê pang-tsō͘, guá it-tīng ē tit-tio̍h tháu-pàng, huê-ho̍k tsū-iû. 20 Guá pik-tshiat kî-thāi kah ǹg-bāng ê, tsiū-sī bô tsi̍t-hāng tāi-tsì ē hō͘ guá kiàn-siàu, tian-tò guá sî-khik ū kàu-gia̍h ê ióng-khì, iû-kî-sī tsit-má, put-kuán sī sí á-sī ua̍h, thang hō͘ Ki-tok ē-tàng thong-kuè guá tsit-ê lâng lâi tit-tio̍h îng-iāu. 21 In-uī tuì guá lâi kóng, ua̍h sī uī-tio̍h Ki-tok, sí mā ū khah-tuā ê lī-ik. 22 Nā-sī ua̍h teh ē-tàng tsò khah-tsē ū lī-ik ê kang-tsok, guá suah m̄-tsai tio̍h kíng tó tsi̍t-tiâu lō͘. 23 Guá tsit-má tsìn-thè lióng-lân, guá si̍t-tsāi tsin ài khì kah Ki-tok tsò-hué, án-ne ing-kai sī khah hó. 24 M̄-koh uī-tio̍h lín ê iân-kò͘, guá koh-khah ing-kai ua̍h lo̍h-khì. 25 Tuì tsit-tiám lâi kóng, guá khak-sìn, guá tsai guá beh kah lín tāi-ke tsò-hué ua̍h lo̍h-khì, sī beh hō͘ lín ê sìn-gióng koh-khah tsìn-pō͘, koh-khah huaⁿ-hí. 26 Án-ne, guá koh-tsài khì lín hia ê sî, hō͘ lín ū koh-khah tshiong-hun ê lí-iû, uī-tio̍h guá ê iân-kò͘ lâi īng Ki-tok Iâ-so͘ tsò lín ê khua-kháu. 27 Bô-lūn án-tsuáⁿ, siōng tiōng-iàu ê sī: lín ê kiâⁿ-ta̍h hû-ha̍p Ki-tok hok-im ê iau-kiû. Án-ne, bô-lūn guá ē-tàng khì kah lin kìⁿ-bīn á-bē, lóng ē-tàng thiaⁿ-tio̍h lín ê tāi-tsì, tsai-iáⁿ lín uī-tio̍h só͘ sìn ê hok-im, īng kāng tsi̍t-ê sim-tsì khiā-tsāi, tâng-sim hia̍p-li̍k, tsò-hué phah-piàⁿ. 28 Bô-lūn tsò sím-mi̍h tāi-tsì, bô hō͘ tuì-ti̍k phah-kiaⁿ, án-ne thang tsìng-bîng in ē sit-pāi lín ē tik-sìng. Tsit-ê tik-sìng lóng sī Siōng-Tsú ê tsok-uî. 29 In-uī Siōng-Tsú m̄-nā siúⁿ-sù lín ti̍k-pia̍t ê un-tián thang sìn-khò Ki-tok, mā hō͘ lín uī-tio̍h Ki-tok lâi siū-khó͘, 30 lâi kah guá tsò-hué tsing-tsiàn, lín khuàⁿ-kuè guá án-tsuáⁿ tsiàn-tàu, tsit-má lín koh thiaⁿ-tio̍h guá iáu-teh tsiàn-tàu.