《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第六章

作者 巴克禮普世版小組 2015.10.11

Pē-bú Kah Kiáⁿ-jî ê Kuan-hē
1 Tsò kiáⁿ-jî ê, tio̍h sūn-ho̍k pē-bú. tse sī Ki-tok-tô͘ ing-kai tsīn ê pún-hūn. 2 "Tio̍h hàu-kìng pē-bú", tse sī thâu tsi̍t tiâu hù-tài ìng-ín ê kài-bīng. 3 Tsiū-sī kóng, "Án-ne lín tsiū ē sū-sū hing-thong, tī sè-kan hióng-siū tn̂g huè-siū."( tsù: CAK 20:12; SBK 5:16) 4 Tsò lāu-pē ê, lín m̄-thang kik kiáⁿ-jî ê siū-khì. Tio̍h īng Tsú ê kíng-kài kah kà-sī lâi kā in puê-ióng.

Tsú-lâng Kah Lô͘-po̍k ê Kuan-hē
5 Tsò lô͘-po̍k ê, kah sūn-ho̍k Ki-tok kāng-khuán, tio̍h īng kiaⁿ-hiâⁿ kah sîng-si̍t ê sim sūn-ho̍k lín tī sè-kan ê tsú-lâng. 6 M̄-thang tī lâng ê bīn tsîng tsò hō͘ lâng khuàⁿ, hō͘ lâng huaⁿ-hí. Tio̍h tshin-tshiūⁿ tsò Ki-tok ê lô͘-po̍k, tsun-tsiàu Siōng-Tsú ê tsí-ì sîng-sim sîng-ì lâi tsò. 7 Kam-sim lo̍k-ì tsīn lô͘-po̍k ê pún-hūn, tshin-tshiūⁿ teh ho̍k-sāi Tsú, m̄-sī teh ho̍k-sāi lâng. 8 Tio̍h tsai, bô-lūn tsò lô͘-po̍k á-sī tsū-iû ê lâng, Tsú lóng ē tsiàu ta̍k-lâng ê kiâⁿ-ta̍h lâi kā in pò-siúⁿ. 9 Tsò tsú-lâng ê, mā tio̍h án-ne khuán-thāi lô͘-po̍k, m̄-thang kā in tuā-siaⁿ khióng-hat. Tio̍h tsai, in kah lín lóng sio̍k kāng tsi̍t-uī thiⁿ-tíng ê Tsú. Tsú īng kāng-khuán ê thāi-tō͘ tuì-thāi muí tsi̍t-ê lâng.

Siōng-Tsú Só͘ Sù Tsuân-thò ê Bú-tsong
10 Tsuè-āu, guá khó͘-khǹg lín tio̍h kah Tsú kiat-liân, khò I kuân-lîng ê khuì-la̍t lâi tsiâⁿ-tsò kian-kiông ê lâng. 11 Tio̍h tshīng Siōng-Tsú só͘ sù tsuân-hù ê tsiàn-kah, hō͘ lín ē-tàng khiā-tsāi, lâi tí-khòng Mô͘-kuí ê khuí-kè. 12 In-uī lán m̄-sī kah hiat-khì ê lâng kau-tsiàn, lán ê tuì-ti̍k sī thian-kài ê siâ-lîng, tsiū-sī tsit-ê o͘-àm sè-tāi ê ú-tiū ê kuân-lîng-tsiá, tsip-tsìng-tsiá, tsiáng-kuân-tsiá. 13 Só͘-í tio̍h tshīng Siōng-Tsú só͘ sù tsuân-hù ê tsiàn-kah, thang tī siâ-ok ê ji̍t-tsí ē-tàng tí-khòng tuì-ti̍k ê kong-kik, tsiàn-tàu kàu-té, khiā-tsāi siú-tiâu tīn-tē. 14 Só͘-í lín tio̍h khiā hō͘ i tsāi, īng tsin-lí tsò tuà hâ io, īng tsìng-gī tsò tsiàn-kah tshīng, 15 īng suî-sî suan-iông hô-pîng ê hok-im tsò ê lâi tshīng. 16 Koh tio̍h put-sî īng sìn-sim tsò tîn-pâi, tsiah ē-tàng phah-bia̍t siâ-ok-tsiá ê hué-tsìⁿ. 17 Koh īng tsín-kiù tsò thâu-khue, īng Sìng-Sîn tsò kiàm, tsiū-sī Siōng-Tsú ê uē. 18 Tio̍h khò Sìng-Sîn tsuân-sim kî-tó, siông-siông khún-kiû. Tio̍h put-sî kíng-síng, sî-siông uī-tio̍h só͘-ū ê sìn-tô͘ kî-tó. 19 Mā tshiáⁿ uī-tio̍h guá kî-tó, kiû Siōng-Tsú sù guá sìn-sit, thang hó-táⁿ khui-tshuì suan-káng hok-im ê ò-biāu. 20 Uī-tio̍h tsit-ê hok-im, guá tsit-má tsò tsi̍t-ê kuà thih-liān ê tāi-sài, mā tio̍h uī guá khún-kiû Siōng-Tsú sù guá ē-tàng hó-táⁿ lâi suan-iông guá ing-kai kóng ê sìn-sit.

Tsuè-āu ê Tshíng-an
21 Lán só͘ thiàⁿ ê hiaⁿ-tī, mā sī tiong-si̍t ê tshe-īng Tshui-ki-kó͘, ē kā lín pò-kò guá ê tāi-tsì kah guá ê kīn-hóng. 22 Uī-tio̍h án-ne, guá tshe i khì lín hia, sī beh pò lín tsai guán ê tāi-tsì, thang hō͘ lín an-sim. 23 Guān Thiⁿ-Pē Siōng-Tsú kah Tsú Iâ-so͘ Ki-tok sù pîng-an, thiàⁿ-sim kah sìn-sim hō͘ tsìng hiaⁿ-tī tsí-muē! 24 Guān Siōng-Tsú ê un-tián kah só͘-ū īng put-piàn ê thiàⁿ-sim lâi thiàⁿ Tsú Iâ-so͘ Ki-tok ê lâng tông-tsāi!