《巴克禮普世版聖經（試讀本）》

 | | | 轉寄

巴克禮普世版（試讀本） 腓立比書第三章

作者 巴克禮普世版小組 2015.11.01

Tsin-tsiàⁿ ê Kong-gī
1 Guá ê hiaⁿ-tī tsí-muē ah, kiat-bué lâi kóng, lín tio̍h khò Tsú lâi huaⁿ-hí. Guá koh siá tsiah-ê uē hō͘ lín, tuì guá lâi kóng bē huì-khì, tuì lín khiok ū pang-tsō͘. 2 Tio̍h tsù-ì hit-tīn káu-tóng, thê-hông hiah-ê pháiⁿ-lâng, liû-sim hiah-ê kian-tshî kat-lé ê lâng. 3 Kî-si̍t lán tsiah sī tsin-tsiàⁿ siū kat-lé ê lâng. Lán thong-kuè Sìng-Sîn lâi kìng-pài Siōng-Tsú, khua-kháu kah Ki-tok Iâ-so͘ kiat-liân, bô uá-khò guā-piáu ê lé-gî. 4 Nā kóng beh uá-khò lé-gî, guá mā ē. Nā ū-lâng siūⁿ-kóng ē-tàng uá-khò lé-gî, guá koh-khah ē-tàng. 5 Guá tshut-sì tē-peh ji̍t to̍h siū kat-lé, sī Í-sik-lia̍t-lâng, sio̍k Piān-ngá-bín tsi-tso̍k, sī sûn-tshuì ê Hi-pik-lâi-lâng. Tsiàu lu̍t-huat lâi kóng, guá sī Huat-lī-sài-phài ê lâng. 6 Guá in-uī kuè-thâu jia̍t-sim suah tsiâⁿ-tsò pik-hāi kàu-huē ê lâng. Nā kóng tsun-siú Mô͘-se lu̍t-huat tsiū ē-tàng hō͘ lâng kiò-tsò gī-lâng, guá lóng bô thang tsí-tsik ê só͘-tsāi. 7 M̄-koh í-tsîng tuì guá ū lī-ik ê, tsit-má in-uī Ki-tok ê iân-kò͘, guá kā i khuàⁿ-tsò sī sún-sit. 8 M̄-nā án-ne, guá tsin-tsiàⁿ kā bān-sū lóng khuàⁿ-tsò bô lī-ik, in-uī guá kā bat guá ê Tsú Ki-tok Iâ-so͘ khuàⁿ-tsò siōng pó-puè. Guá uī-tio̍h I pàng-sak it-tshè, kā hiah-ê lóng khuàⁿ-tsò pùn-sò, sī ài beh tit-tio̍h Ki-tok, 9 lâi kah Ki-tok uân-tsuân kiat-liân, m̄-sī ka-kī khò lu̍t-huat lâi tit-tio̍h gī. Guá tsit-má ū ê gī sī tuì sìn-khò Ki-tok ê gī, sī Siōng-Tsú uī-tio̍h guá ê sìn só͘ siúⁿ-sù-.ê. 10 Guá só͘ ì-ài ê sī jīn-bat Ki-tok koh thé-giām I koh-ua̍h ê kuân-lîng, kah I tsò-hué siū-khó͘, king-giām I ê sí, 11 ǹg-bāng ka-kī mā ē-tàng tuì sí koh-ua̍h.

Ǹg Bo̍k-phiau Ti̍t-tsáu
12 Án-ne m̄-sī kóng guá í-king sîng-kong, á-sī í-king uân-tsuân. Guá kè-sio̍k hiòng-tsîng tsáu, khuàⁿ ē-tàng tit-tio̍h siúⁿ á-bē. Kî-si̍t Ki-tok Iâ-so͘ í-king tit-tio̍h guá. 13 Hiaⁿ-tī tsí-muē ah, guá bô siūⁿ-kóng ka-kī í-king tit-tio̍h siúⁿ, tsí-ū tsuan-sim tsi̍t hāng, tsiū-sī bē kì-tit āu-bīn ê tāi-tsì, tì-ì thâu-tsîng ê tāi-tsì, 14 ǹg bo̍k-phiau ti̍t-ti̍t tsáu, kàu tit-tio̍h uî-tsí. Tsiū-sī Siōng-Tsú thong-kuè Ki-tok Iâ-so͘ tiàu guá khì niá-siū hit-ê tuì tíng-bīn lâi ê ua̍h-miā. 15 Só͘-í lán tiong-kan lîng-sìng sîng-si̍k ê lâng tio̍h ū kāng-khuán ê sim-tsì. Lín tiong-kan nā ū bô kāng-khuán ê sim-tsì, Siōng-Tsú mā ē īng tsit-ê tāi-tsì kā lín khé-sī. 16 Bô-lūn jû-hô, lán tio̍h tsiàu í-king kiâⁿ-kuè ê lō͘-suàⁿ kè-sio̍k kiâⁿ. 17 Hiaⁿ-tī tsí-muē ah, lín tio̍h o̍h guá. Guán í-king ū tsò hó bô͘-huān hō͘ lín. Lín tio̍h ha̍k-si̍p hiah-ê tsiàu tsit-ê bô͘-huān teh kiâⁿ ê lâng. 18 Guá í-king kā lín kóng tsin-tsē pái, taⁿ guá koh lâu ba̍k-sái kā lín khó͘-khǹg, ū tsin-tsē lâng ê hîng-uî tsiâⁿ-tsò Ki-tok si̍p-jī-kè ê tuì-ti̍k. 19 In ê kiat-kio̍k sī tîm-lûn, in kā in ê pak-tó͘ tòng-tsò sîn-bîng, in kā kiàn-siàu khuàⁿ-tsò sī îng-kng, in kan-taⁿ tì-ì tē-tsiūⁿ ê tāi-tsì. 20 M̄-koh lán sī thian-kok ê kok-bîn, mā teh ǹg-bāng Kiù-sè-tsú tuì hia lâi, tsiū-sī Tsú Iâ-so͘ Ki-tok. 21 I ē īng hō͘ bān-bu̍t khut-ho̍k ê kuân-lîng lâi kái-piàn lán pi-tsiān ê jio̍k-thé, hō͘ lán tsiâⁿ-tsò kah I kāng-khuán îng-iāu ê thé.