《巴克禮普世版聖經（試讀本）》

 | | | 轉寄

巴克禮普世版（試讀本） 腓立比書第四章

作者 巴克禮普世版小組 2015.11.08

Pó-lô ê Khuàn-bián
1 Só͘-í guá só͘ thiàⁿ só͘ siàu-liām ê hiaⁿ-tī tsí-muē, lín sī guá ê huaⁿ-hí, guá ê îng-kng, tio̍h uá-khò Tsú khiā-tsāi. 2 Guá khó͘-khǹg Iú-o-tia kah Sûn-to͘-ki nn̄g-uī tsí-muē, lín tī Tsú ê lāi-bīn tio̍h tâng-sim. 3 Tiong-si̍t ê tâng-phuāⁿ ah, guá mā kiû lí pang-tsō͘ tsit nn̄g-ê tsí-muē, in-uī in tī hok-im ê kang-tsok siōng, bat kah Kik-lī-bián í-ki̍p kî-tha ê tâng-kang, kah guá tsò-hué tshut-la̍t, in ê miâ í-king kì-tsài tī Siōng-Tsú ê ua̍h-miā-tsheh. 4 Tio̍h siông-siông kah Tsú kiat-liân lâi huaⁿ-hí. Guá koh kóng tsi̍t-pái, tio̍h huaⁿ-hí! 5 Tio̍h hō͘ tsìng-lâng khuàⁿ-tshut lín ê sûn-liông. Tsú teh-beh tsài-lîm ā. 6 Lóng m̄-thang tshau-huân sím-mi̍h, bān-sū tio̍h īng kám-siā ê sim kî-tó lâi khún-kiû, tsiong lín só͘ kiû ê hō͘ Siōng-Tsú tsai. 7 Án-ne, lâng só͘ liāu-sióng bē-kàu ê Siōng-Tsú ê pîng-an, ē thong-kuè Ki-tok Iâ-so͘ lâi pó-siú lín ê sim-su ì-liām. 8 Hiaⁿ-tī tsí-muē ah, tsóng-kóng tsi̍t-kù, hiah-ê tsin-si̍t ê, khó-kìng ê, kong-gī ê, tshing-kiat ê, thang thiàⁿ ê, hó miâ-siaⁿ ê, hó tik-hīng ê, thang o-ló ê, lín lóng tio̍h sî-sî khik-khik tì-ì tī sim-lāi. 9 Lín tuì guá só͘ ha̍k-si̍p, só͘ niá-siū, só͘ thiaⁿ-tio̍h, só͘ khuàⁿ-tio̍h-.ê, lóng tio̍h kè-sio̍k lâi si̍t-hiān. Siúⁿ-sù pîng-an ê Siōng-Tsú tsiū kah lín tông-tsāi.

Kám-siā ê Uē
10 Guá tī Tsú ê lāi-bīn tuā-tuā huaⁿ-hí, in-uī lín siàu-liām guá ê sim-tsì taⁿ ū koh puh-íⁿ. Kî-si̍t lín ū teh siàu-liām guá, m̄-koh lín bô ki-huē thang piáu-sī. 11 Án-ne m̄-sī kóng guá bô kàu-īng, in-uī guá í-king ha̍k-si̍p ē-hiáu, bô-lūn sím-mi̍h kíng-gū lóng ti-tsiok. 12 Guá tsai-iáⁿ án-tsuáⁿ kuè pi-tsiān ê sing-ua̍h, mā tsai-iáⁿ án-tsuáⁿ kuè hù-jū ê sing-ua̍h. Bô-lūn sī pá á-sī iau, sī hù-jū á-sī khiàm-khueh, guá ê pì-kuat tsiū-sī ta̍k-hāng ti-tsiok. 13 Guá uá-khò siúⁿ-sù guá khuì-la̍t ê Ki-tok, guá ū khuì-la̍t thang ìng-hù kok-tsióng kíng-gū. 14 M̄-koh lín ū lâi hun-tam guá ê khùn-kíng, án-ne si̍t-tsāi tsin hó. 15 Hui-li̍p-pí-lâng ah, lín ka-kī mā lóng tsai, tī guá thuân hok-im ê khí-thâu, guá lī-khui Má-kî-tùn ê sî, kan-taⁿ lín ê kàu-huē ū tsi-uân guá ê sing-ua̍h huì-iōng. 16 Liân guá tī Thiap-sat-lô-nî-ka ê sî, lín mā kuí-nā pái tshe lâng lâi kiong-kip guá ê su-iàu. 17 M̄-sī guá teh kiû lâng sàng mi̍h-kiāⁿ, sī teh kiû lín kiat khah-tsē kué-tsí lâi kì lo̍h-khì lín tī thiⁿ-tíng ê siàu-phō͘. 18 Lín hō͘ guá ê mi̍h í-king kàu-gia̍h koh ū tshun. Guá ū tuì Í-pa-hut-thê siu-tio̍h lín kià-lâi ê mi̍h, tshin-tshiūⁿ huat-tshut phang-phang ê bī, tsiâⁿ-tsò Siōng-Tsú só͘ huaⁿ-hí ê tsè-mi̍h. 19 Guá ê Siōng-Tsú ē tsiàu I îng-iāu ê hong-hù, thong-kuè Ki-tok Iâ-so͘ lâi pó͘-tsiok lín it-tshè ê su-iàu. 20 Guān îng-iāu kui tī lán ê Siōng-Tsú lán ê Thiⁿ-Pē, kàu tāi-tāi bô-tsīn. Amen.

Tsuè-āu ê Tshíng-an
21 Tshiáⁿ thè guá kā sio̍k Ki-tok Iâ-so͘ só͘-ū ê sìn-tô͘ tshíng-an. Kah guá tī-tsia ê hiaⁿ-tī tsí-muē mā beh kā lín tshíng-an. 22 Tī tsia só͘-ū ê sìn-tô͘, ti̍k-pia̍t sī Lô-má hông-kiong lāi ê sìn-tô͘, lóng beh kā lín tshíng-an. 23 Guān Tsú Iâ-so͘ Ki-tok ê un-tián kah lín tông-tsāi!