《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第五章

作者 巴克禮普世版小組 2016.01.10

Tsún-pī Gîng-tsiap Tsú Tsài-lîm
1 Hiaⁿ-tī tsí-muē ah, kuan-hē Tsú tsài-lîm ê sî kah kî, guá bô su-iàu siá tī phue-lāi. 2 In-uī lín ka-kī tsai, Tsú tsài-lîm ê ji̍t ē tshin-tshiūⁿ tsha̍t-á tī àm-sî bô-ì-tiong lâi-kàu. 3 Lâng tng teh kóng, "It-tshè Pîng-an ê sî", tsai-hō ē tshin-tshiūⁿ seⁿ-kiáⁿ ê kan-khó͘ lîm-kàu teh-beh sing-sán ê hū-jîn-lâng, in bē-tàng tô-phiah tsit-ê lân-kuan. 4 M̄-koh hiaⁿ-tī tsí-muē ah, lín m̄-sī tī o͘-àm tiong teh kuè-ji̍t, hit-ê ji̍t bē tshin-tshiūⁿ tsha̍t-á hut-jiân-kan lâi-kàu lín tau. 5 In-uī lín lóng sī kng-bîng ê lâng, sī ji̍t-sî ê lâng; lán m̄-sī sio̍k tī àm-sî, mā m̄-sī sio̍k o͘-àm. 6 Só͘-í lán m̄-thang tshin-tshiūⁿ kî-tha ê lâng teh khùn, tio̍h kíng-síng kín-sīn. 7 In-uī khùn ê lâng lóng sī àm-sî teh khùn, tsiú-tsuì ê lâng lóng sī àm-sî teh tsuì. 8 M̄-koh lán sio̍k ji̍t-sî ê tio̍h kín-sīn, īng sìn-sim kah thiàⁿ-sim tsò tsiàn-kah tshīng, īng tit-kiù ê ǹg-bāng tsò thâu-khue tì. 9 Siōng-Tsú m̄-sī kíng-suán lán lâi siū I ê hîng-hua̍t, sī beh hō͘ lán thong-kuè Tsú Iâ-so͘ Ki-tok lâi tit-kiù. 10 Ki-tok thè lán sí sī beh hō͘ lán bô-lūn teh ua̍h á-sī sí-khì, lóng ē-tàng tī I tsài-lîm ê sî kah I tsò-hué ua̍h teh. 11 Só͘-í tio̍h tsiàu lín tsit-má teh tsò ê án-ne hō͘-siōng kó͘-lē, hō͘-siōng pang-tsō͘.

Tsuè-āu ê Khuàn-bián Kah Tshíng-an
12 Hiaⁿ-tī tsí-muē ah, tshiáⁿ lín tio̍h kìng-tiōng hiah-ê tī lín tiong-kan teh lô-khó͘ kang-tsok, mā sī Tsú só͘ kíng-suán lâi kā lín tsí-tō kah khuàn-bián ê lâng. 13 Uī-tio̍h in teh tsò ê kang-tsok, lín tio̍h īng siōng-tuā ê thiàⁿ-sim kah kìng-ì lâi tuì-thāi in. Lín tāi-ke mā tio̍h hô-bo̍k tsò-hué. 14 Hiaⁿ-tī tsí-muē ah, guán khó͘-khǹg lín tio̍h kíng-kài pîn-tuāⁿ ê lâng, kó͘-bú sit-tsì ê lâng, hû-tshî luán-jio̍k ê lâng, īng khuan-iông tuì-thāi muí tsi̍t-ê-lâng. 15 Lín tio̍h kín-sīn, m̄-thang īng pháiⁿ pò pháiⁿ, tio̍h put-sî hō͘-siōng hó khuán-thāi, koh hó khuán-thāi muí tsi̍t-ê-lâng. 16 Tio̍h siông-siông huaⁿ-hí. 17 Tio̍h put-sî kî-tó. 18 Bô-lūn sím-mi̍h kíng-gū lóng tio̍h kám-siā, in-uī tse sī Siōng-Tsú ê tsí-ì, ài lín tsiah-ê sio̍k Ki-tok Iâ-so͘ ê lâng án-ne tsò. 19 M̄-thang phah-hua Sìng-Sîn ê hué. 20 M̄-thang biáu-sī sian-ti ê uē. 21 Ta̍k-hāng tāi-tsì tio̍h siông-sè kiám-giām, hó-ê tio̍h kè-sio̍k tsò lo̍h-khì. 22 Tio̍h siám-phiah ta̍k-tsióng ê siâ-ok. 23 Guān siúⁿ-sù pîng-an ê Siōng-Tsú tshin-tsū kā lín sìng-huà, koh guān I pó-siú lín ê lîng, hûn, thé, tī lán ê Tsú Iâ-so͘ Ki-tok tsài-lîm ê sî lóng tit-tio̍h pó-tsuân, bô thang hiâm! 24 Ho͘-tiàu lín ê sī sìn-si̍t ê Siōng-Tsú, I it-tīng ē tsiàu án-ne kā lín sîng-tsuân. 25 Hiaⁿ-tī tsí-muē ah, tshiáⁿ uī guán kî-tó. 26 Tio̍h īng sîn-sìng ê sio-tsim lâi kā só͘-ū ê hiaⁿ-tī tsí-muē tshíng-an. 27 Guá hōng Tsú ê miâ lâi huan-hù lín, tio̍h tha̍k tsit-tiuⁿ phue hō͘ só͘-ū ê hiaⁿ-tī tsí-muē thiaⁿ. 28 Guān lán ê Tsú Iâ-so͘ Ki-tok ê un-tián kah lín tông-tsāi!