《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第四章

作者 巴克禮普世版小組 2016.01.03

Hō͘ Siōng-Tsú Huaⁿ-hí ê Sing-ua̍h
1 Hiaⁿ-tī tsí-muē ah, guán iáu ū uē beh kā lín kóng. Lín tsîng bat tuì guán ha̍k-si̍p tio̍h án-tsuáⁿ sing-ua̍h lâi hō͘ Siōng-Tsú huaⁿ-hí. Kî-si̍t lín í-king ū tsiàu án-ne teh sing-ua̍h, m̄-koh guán hōng Tsú Iâ-so͘ ê miâ lâi khún-kiû koh khó͘-khǹg lín, taⁿ tio̍h koh-khah ló͘-li̍k. 2 In-uī lín mā tsai, guán ū hōng Tsú Iâ-so͘ ê miâ kā lín kà-sī sím-mi̍h. 3 Siōng-Tsú ê tsí-ì sī ài lín tsiâⁿ-tsò sìng-kiat, lī-khui îm-luān. 4 Ài lín ta̍k-lâng ē-hiáu īng sìng-kiat kah tsun-kuì lâi siú ka-kī ê sing-khu. 5 M̄-thang tshin-tshiūⁿ m̄-bat Siōng-Tsú ê Guā-pang-lâng teh hòng-tsiòng su-io̍k. 6 Kuan-hē tsit-hāng tāi-tsì, mā m̄-thang tsò-pháiⁿ lâi tshim-huān tâng-sìn ê hiaⁿ-tī tsí-muē. Guán bat kā lín kóng-kuè, mā ū kā lín kíng-kò, Tsú ē kā tsò tsit-tsióng tāi-tsì ê lâng tshù-hua̍t. 7 Siōng-Tsú m̄-sī tiàu lán lâi kuè ù-uè ê sing-ua̍h, sī tiàu lán lâi kuè sìng-kiat ê sing-ua̍h. 8 Só͘-í kī-tsua̍t tsit-ê kà-sī, m̄-sī kī-tsua̍t lâng, sī teh kī-tsua̍t siúⁿ-sù lín Sìng-Sîn ê Siōng-Tsú. 9 Kuan-hē hiaⁿ-tī tsí-muē hō͘-siōng thiàⁿ-sioh ê tāi-tsì, m̄-bián guán siá sím-mi̍h hō͘ lín, in-uī lín ka-kī í-king siū-tio̍h Siōng-Tsú ê kà-sī ū teh sio-thiàⁿ. 10 Kî-si̍t lín ū tsiàu tsit-ê kà-sī thiàⁿ tsuân Má-kî-tùn ê hiaⁿ-tī tsí-muē, m̄-koh, hiaⁿ-tī tsí-muē ah, guán khǹg lín tio̍h koh-khah ló͘-li̍k. 11 Mā tio̍h tsiàu guán tsîng kā lín huan-hù ê, lín tio̍h li̍p-tsì kuè pîng-tsīng ê sing-ua̍h, tsīn ka-kī ê pún-hūn tshin-tshiú tsò-kang lâi î-tshî ka-kī ê sing-ua̍h, 12 Án-ne lín tsiū ē-tàng hō͘ kàu-huē-guā ê lâng tsun-kìng, mā m̄-bián uá-khò pa̍t-lâng.

Tsú ê Lâi-lîm
13 Hiaⁿ-tī tsí-muē ah, kuan-hē sí-khì ê lâng, guán ài lín tsai, án-ne lín tsiah bē tshin-tshiūⁿ hiah-ê bô ǹg-bāng ê lâng teh pi-siong. 14 Lán kì-jiân siong-sìn Iâ-so͘ sí-khì koh-tsài ua̍h khí-lâi, lán mā siong-sìn Siōng-Tsú ē thong-kuè Iâ-so͘ tshuā hiah-ê sí-khì ê lâng kah Iâ-so͘ tsò-hué lâi. 15 Guán tsiàu Tsú ê uē kā lín kóng tsit-hāng tāi-tsì, tsiū-sī lán tsiah-ê tī Tsú koh tsài-lîm ê sî iáu ua̍h-teh ê lâng, bē pí hiah-ê í-king sí-khì ê lâng khah tāi-sing kìⁿ-tio̍h Tsú. 16 In-uī Tsú beh pún-sin tuì thiⁿ kàng-lîm, thiⁿ-sài-tiúⁿ tuā-siaⁿ huah, Siōng-Tsú ê sàu-kak tsi̍t-ē hiáng, hiah-ê sio̍k Ki-tok í-king sí ê lâng ē tāi-sing koh ua̍h. 17 Jiân-āu lán tsiah-ê iáu ua̍h-teh ê lâng ē kah in siū tsiap-khì hûn-lāi, tī khong-tiong kah Tsú kìⁿ-bīn, án-ne lán tsiū íng-uán kah Tsú tsò-hué. 18 Só͘-í lín tio̍h īng tsiah-ê uē hō͘-siōng kó͘-lē.