《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第一章

作者 巴克禮普世版小組 2016.02.07

1 Guá sī Pó-lô, guá hōng lán ê kiù-tsú Siōng-Tsú kah hō͘ lán ū ǹg-bāng ê Ki-tok Iâ-so͘ ê bīng-līng lâi tsò Ki-tok Iâ-so͘ ê sù-tô͘, 2 siá phue kià hō͘ Thê-mô͘-thài, tsiū-sī tī sìn-gióng-siōng tsò guá tsin ê kiáⁿ-jî. Guān Thiⁿ-Pē Siōng-Tsú kah lán ê Tsú Ki-tok Iâ-so͘ siúⁿ-sù lí un-tián, liân-bín kah pîng-an.

Khiàn-tsik Hi-ké ê Kàu-gī
3 Guá khì Má-kî-tùn ê sî ū khǹg lí tio̍h lâu tuà Í-hut-só͘, thang bīng-līng tsi̍t-kuá lâng m̄-thang thuân pa̍t-tsióng ê kàu-gī, 4 mā m̄-thang thiaⁿ hiah-ê bô-iáⁿ bô-tsiah-ê thuân-suat kah lò-lò-tn̂g ê tso̍k-phó͘, in-uī tsiah-ê tāi-tsì ē ín-khí tsing-lūn, tuì īng sìn-sim lâi liáu-kái Siōng-Tsú ê kè-uē ê lâng bô lī-ik. 5 Tsit-ê bīng-līng ê bo̍k-tik sī beh tit-tio̍h thiàⁿ-sim. Tsit-ê thiàⁿ-sim sī tuì tshing-khì ê sim, tshing-pi̍k ê liông-sim kah sûn-tsin ê sìn-sim só͘ sán-sing-.ê. 6 Ū-lâng phian-lī tsiah-ê tāi-tsì, tian-tò tī hi-ké ê tâm-lūn tiong sit-bê. 7 In liân ka-kī ê tsú-tiuⁿ to kóng bē tshing-tshó, koh siūⁿ-beh tsò lu̍t-huat kàu-su. 8 Lán tsai, lâng nā ha̍p-huat lâi ūn-iōng lu̍t-huat, lu̍t-huat sī hó. 9 Lán mā tsai, lu̍t-huat ê siat-li̍p m̄-sī uī-tio̍h tsìng-ti̍t ê lâng, sī uī-tio̍h hiah-ê put-huat kah bô sūn-ho̍k, bô kìng-khiân kah huān-tsuē, bô sìng-kiat kah tsho͘-sio̍k, phah-sí pē-bú, thâi-sí lâng, 10 îm-luān, hò͘ⁿ lâm-sik, bé-bē tsa-bó͘-gín-á, kóng pe̍h-tsha̍t, lām-sám tsiù-tsuā, á-sī uî-huán kiān-tsuân kàu-gī tíng-tíng ê lâng lâi tsè-tīng-.ê. 11 Tsit-ê kiān-tsuân ê kàu-gī sī tsiàu lán tio̍h o-ló ê Hit-uī Siōng-Tsú só͘ kau-thok guá hit-ê îng-kng ê hok-im.

Kám-siā Siōng-Tsú ê Liân-bín
12 Guá kám-siā hō͘ guá ū khuì-la̍t ê, tsiū-sī lán ê Tsú Ki-tok Iâ-so͘, in-uī I kā guá khuàⁿ-tsò tsīn-tiong, tsiū jīm-bīng guá lâi kā I ho̍k-bū. 13 Sui-jiân guá í-tsîng huí-pòng siat-to̍k, pik-hāi, koh Bú-jio̍k Siōng-Tsú, iáu-koh tit-tio̍h liân-bín, in-uī hit tong-sî guá iáu-buē sìn Tsú tsiah án-ne tsò. 14 Lán ê Tsú koh sù guá hong-sīng ê un-tián, hō͘ guá tit-tio̍h kah Ki-tok Iâ-so͘ kiat-liân tsiah ū ê sìn-gióng kah thiàⁿ-sim. 15 "Ki-tok Iâ-so͘ lîm-kàu sè-kan sī beh tsín-kiù tsuē-jîn" tsit-kù uē thang siong-sìn, ta̍t-tit lán uân-tsuân tsiap-la̍p. Guá sī tsuē-jîn tiong-kan siōng pháiⁿ-.ê. 16 M̄-koh guá tit-tio̍h liân-bín sī in-uī Iâ-so͘ Ki-tok beh īng guá tsit-ê siōng pháiⁿ ê lâng lâi hián-bîng Siōng-Tsú bû-hān ê jím-nāi, thang tsò āu-lâi sìn-khò Iâ-so͘ lâi tit-tio̍h íng-uán ua̍h-miā ê lâng ê bô͘-huān. 17 Guān tsun-kuì kah îng-kng kui tī bān-sè ê Kun-ông, tsiū-sī bē huí-huāi koh khuàⁿ bē tio̍h ê to̍k-it Siōng-Tsú, kàu tāi-tāi bô tsīn. Amen. 18 Guá ê kiáⁿ Thê-mô͘-thài ah, guá tsiàu í-tsîng kuan-hē lí ê ī-giân, tsiong tsit-ê kài-bīng kau-thok lí, hō͘ lí thang tsun-tsiàu tsiah-ê uē lâi hó-hó phah-iâⁿ hit-tiûⁿ tsing-tsiàn. 19 Lí tio̍h tsûn sìn-sim kah tshing-pi̍k ê liông-sim. Ū tsi̍t-kuá lâng pàng-sak liông-sim, tì-sú sit-lo̍h sìn-sim ná tshin-tshiūⁿ tsûn khò-tshián. 20 Kî-tiong ū Hú-bí-nái kah A-li̍k-san-tāi, guá í-king tsiong in kau hō͘ Sat-tàn, hō͘ in siū kíng-kài m̄-thang koh huí-pòng siat-to̍k Siōng-Tsú.