《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦後書第三章

作者 巴克禮普世版小組 2016.01.31

Uī Guán Kî-tó
1 Hiaⁿ-tī tsí-muē ah, guán iáu ū-uē beh kā lín kóng, tshiáⁿ lín tio̍h uī guán kî-tó, hō͘ Tsú ê sìn-sit ē-tàng tshin-tshiūⁿ tī lín tiong-kan, tsin-kín thuân-khui koh tit-tio̍h îng-kng. 2 Mā kî-kiû Siōng-Tsú hō͘ guán ē-tàng thuat-lī hiah-ê siâ-ok ê lâng, in-uī m̄-sī só͘-ū ê lâng lóng ū sìn Tsú. 3 Siōng-Tsú sī sìn-si̍t khó-khò-.ê, I ē hō͘ lín kian-kiông, koh pó-siú lín thuat-lī hiah-ê pháiⁿ-lâng ê hām-hāi. 4 Tsú hō͘ guán tuì lín ū sìn-sim, siong-sìn guán kau-tài lín ê tāi-tsì, lín tsit-má ū teh tsò, āu-lâi mā ē kè-sio̍k tsò. 5 Guān Tsú ín-tshuā lín ê sim, lâi thé-giām Siōng-Tsú ê thiàⁿ kah Ki-tok ê thun-lún.

Tsīn Tsò-kang ê Gī-bū
6 Hiaⁿ-tī tsí-muē ah, guán hōng lán ê Tsú Iâ-so͘ Ki-tok ê miâ bīng-līng lín, tio̍h siám-phiah hiah-ê sing-ua̍h pîn-tuāⁿ, bô tsun-siú guán thuân-siū hō͘ lín ê kà-sī lâi kiâⁿ ê sìn-tô͘. 7 Lín ka-kī mā tsai tio̍h án-tsuáⁿ o̍h guán, in-uī guán tī lín tiong-kan ê sî sing-ua̍h lóng m̄-bat pîn-tuāⁿ, 8 mā m̄-bat pe̍h-pe̍h tsia̍h lâng ê pn̄g, tian-tò sī mê-ji̍t sin-khó͘ kang-tsok, tsiah bián tsō-sîng lín tiong-kan jīm-hô lâng ê hū-tam. 9 Guán án-ne tsò m̄-sī kóng, guán bô kuân thang iau-kiû kiong-ìng, tsí-sī ài beh īng guán ka-kī tsò lín ê bô͘-iūⁿ, hō͘ lín thang o̍h guán ê khuán-sit. 10 Guán iáu kah lín tsò-hué ê sî bat bīng-līng lín kóng, "Bô ài tsò-kang ê lâng, mā tio̍h m̄-thang tsia̍h." 11 Guán án-ne kóng sī in-uī, ū thiaⁿ-tio̍h lín tiong-kan ū-lâng pîn-tuāⁿ m̄ tsò-kang, kan-taⁿ ài tshap lâng ê îng-á-sū. 12 Guán hōng Tsú Iâ-so͘ Ki-tok ê miâ kíng-kò tsit-khuán lâng, khó͘-khǹg in tio̍h an-hūn tsò-kang, ka-kī thó-thàn lâi î-tshî ka-kī ê sing-ua̍h. 13 M̄-koh hiaⁿ-tī tsí-muē ah, lín tio̍h tsò hó-sū, m̄-thang siūⁿ-siān. 14 Nā ū-lâng bô sūn-ho̍k guán tsit-tiuⁿ phue só͘ kóng-.ê, lín tio̍h kā i kì-teh, mā m̄-thang kah i lâi-óng, thang hō͘ i kám-kak kiàn-siàu. 15 M̄-koh m̄-thang kā i khuàⁿ-tsò ti̍k-jîn, tio̍h kā i tòng-tsò hiaⁿ-tī tsí-muē lâi khuàn-bián.

Tsuè-āu ê Tshíng-an
16 Guān siúⁿ-sù pîng-an ê Tsú siông-siông īng ta̍k-tsióng hong-huat tshin-sin siúⁿ-sù lín pîng-an. Guān Tsú kah lín tāi-ke tông-tsāi! 17 Guá Pó-lô tshin-pit kā lín tshíng-an, guá tī ta̍k-tiuⁿ phue lóng ū tshiam-jī. Guá lóng án-ne siá: 18 Guān lán ê Tsú Iâ-so͘ Ki-tok ê un-tián, kah lín tāi-ke tông-tsāi!