《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第五章

作者 巴克禮普世版小組 2016.03.06

Tuì Sìn-tô͘ ê Tsik-jīm
1 M̄-thang tsik-pī lāu lâng, tio̍h tshin-tshiūⁿ khó͘-khǹg lāu-pē án-ne kā i khuàn-bián. Tuì siàu-liân-lâng khuàn-bián mā tio̍h tshin-tshiūⁿ khó͘-khǹg ka-kī ê hiaⁿ-tī. 2 Tuì-thāi lāu hū-jîn-lâng tio̍h tshin-tshiūⁿ teh tuì-thāi ka-kī ê lāu-bú. Tio̍h īng uân-tsuân sûn-kiat ê sim tuì-thāi siàu-liân hū-jîn-lâng ná tshin-tshiūⁿ teh tuì-thāi ka-kī ê tsí-muē. 3 Tio̍h tsun-kìng tsin-tsiàⁿ teh tsiú-kuáⁿ ê hū-jîn-lâng. 4 M̄-koh tsò kuáⁿ-hū ê kiáⁿ-jî-sun tio̍h sing o̍h tī ka-kī ê ka-tîng hàu-sūn sī-tuā, in-uī tse sī Siōng-Tsú só͘ huaⁿ-hí-.ê. 5 Tsin-tsiàⁿ bô-i bô-uá ê kuáⁿ-hū tsí-ū ǹg-bāng Siōng-Tsú, mê-ji̍t kè-sio̍k khún-kiû kî-tó. 6 M̄-koh tshia-hua ê kuáⁿ-hū sui-jiân teh ua̍h, kî-si̍t sim-lîng í-king sí-khì. 7 Lí tio̍h tsiong tsiah-ê tāi-tsì kā in kà-sī tsiah bián hō͘ in siū lâng phue-phîng. 8 Lâng nā bô tsiàu-kò͘ tshin-lâng, sīm-tsì bô tsiàu-kò͘ ka-kī ê ka-tîng, tsiū-sī uî-puē sìn-gióng, pí bô sìn ê lâng koh-khah hāi. 9 Kuáⁿ-hū it-tīng tio̍h tshiau-kuè la̍k-tsa̍p huè tsiah thang ting-kì, koh tio̍h kan-taⁿ kiat-hun tsi̍t-pái, 10 mā tio̍h ū hó hîng-uî ê tsìng-kì, tshin-tshiūⁿ ióng-tshī kiáⁿ-jî, tsiap-thāi tshut-guā-lâng, kā sìn-tô͘ sé-kha, tsín-tsè tú-tio̍h huān-lān ê lâng, tsuan-sim tsò hó-sū, tíng-tíng. 11 M̄-koh siàu-liân ê kuáⁿ-hū m̄-thang kā i ting-kì, in-uī in tsîng-io̍k tsi̍t-ē tshiong-tōng tsiū ē khì-sak Ki-tok siūⁿ-beh koh kè, 12 lâi uî-puē khí-thâu ê sè-guān, tì-sú ka-kī siū tīng-tsuē. 13 Jî-tshiáⁿ in koh o̍h pîn-tuāⁿ, kuè-ke kuè-hō͘ khì tshit-thô. M̄-nā pîn-tuāⁿ, mā tsin kāu-uē, ài tshap îng-á-sū, kóng tsi̍t-kuá bô ing-kai kóng ê uē. 14 Só͘-í guá ài siàu-liân ê kuáⁿ-hū koh kè, seⁿ kiáⁿ, liāu-lí ka-tîng, tsiah bē hō͘ tuì-ti̍k ū ki-huē lâi kóng lán ê pháiⁿ-uē. 15 In-uī í-king ū tsi̍t-kuá huan-thâu khì tuè Sat-tàn. 16 M̄-koh sìn Tsú ê hū-jîn-lâng tshù-lāi nā-ū kuáⁿ-hū, tio̍h kā i pang-tsō͘, m̄-thang tsiong tsit-ê tàⁿ sak hō͘ kàu-huē, hō͘ kàu-huē thang pang-tsō͘ hiah-ê tsin-tsiàⁿ bô-i bô-uá ê kuáⁿ-hū. 17 Gâu tī-lí kàu-huē ê tiúⁿ-ló tio̍h ka-puē kā i tsun-kìng. Hiah-ê ti̍k-pia̍t tsīn-la̍t káng tō-lí teh kà-sī ê tiúⁿ-ló koh-khah tio̍h án-ne. 18 In-uī Sìng-king kóng, "Teh thua tsio̍h-bō ê gû, m̄-thang kā i kuà gû-tshuì-lam."( tsù: SBK 25:4) Koh kóng, "Kang-lâng ing-kai tit-tio̍h kang-tsîⁿ."( tsù: Lk 10:7) 19 Tuì tiúⁿ-ló ê khòng-kò nā m̄-sī ū nn̄g-ê á-sī saⁿ-ê tsìng-jîn, tsiū m̄-thang siū-lí. 20 Huān-tsuē ê lâng tio̍h tuà tsìng-lâng ê bīn-tsîng kā i tsik-pī, thang hō͘ kî-tha ê lâng mā tit-tio̍h kíng-kài. 21 Guá tī Siōng-Tsú kah Ki-tok Iâ-so͘ í-ki̍p siū kíng-suán ê thiⁿ-sài bīn-tsîng bīng-līng lí, tio̍h tsun-siú tsiah-ê tsí-sī, m̄-thang ū phian-kiàn, tsò tāi-tsì m̄-thang su-phian. 22 M̄-thang suî-piān kā lâng kiâⁿ huāⁿ-tshiú-lé, mā m̄-thang tsham-ú pa̍t-lâng ê huān-tsuē, tio̍h kò͘-siú ka-kī ê sûn-kiat. 23 In-uī lí ê uī-tn̂g bô hó koh kāu-pēⁿ, m̄-thang kan-taⁿ lim tsuí, mā tio̍h lim tām-po̍h-á tsiú. 24 Ū-kuá lâng ê tsuē tsin bîng-hián, iáu-buē sím-phuàⁿ tsiū tsin tshing-tshó, ū-ê lâng ê tsuē kàu āu-lâi tsiah lō͘-hiān. 25 Tshin-tshiūⁿ án-ne, hó hîng-uî mā tsin bîng-hián, hiah-ê bô bîng-hián ê mā khàm bē-tiâu.