《巴克禮普世版聖經（試讀本）》

 | | | 轉寄

巴克禮普世版（試讀本） 提摩太前書第六章

作者 巴克禮普世版小組 2016.03.13

1 Tī lâng ê kuán-hat ē-bīn teh tsò lô͘-po̍k ê lâng, tio̍h khuàⁿ ka-kī ê tsú-lâng sī kham-tit siū uân-tsuân tsun-kìng ê, Siōng-Tsú ê miâ kah tō-lí tsiah bián siū siat-to̍k. 2 Tsú-lâng nā-sī sìn tō-lí ê, tsiū m̄-thang in-uī i sī hiaⁿ-tī lâi kā i khuàⁿ-khin, tian-tò tio̍h koh-khah kā i ho̍k-sāi, in-uī teh siū lī-ik-.ê sī sìn-tô͘, mā-sī só͘ kìng-ài ê hiaⁿ-tī.

Tsin ê Kàu-su Kah Ké ê Kàu-su
Lí tio̍h īng tsiah-ê kà-sī lâi kā in khó͘-khǹg. 3 Nā ū-lâng thuân pa̍t-khuán bô sūn-ho̍k lán ê Tsú Iâ-so͘ Ki-tok tuan-tsìng ê tō-lí, koh bô tsiàu kìng-khiân ê kàu-gī, 4 tsiū-sī phòng-hong tsū-khua, m̄-tsai puàⁿ-hāng koh hò͘ⁿ piān-lūn kah sio-tsèⁿ ê mô͘-pēⁿ. 5 Tsiū án-ne ín-khí uàn-tò͘, sio-tseⁿ, huí-pòng, pháiⁿ liām-thâu, sim-tsì pāi-huāi koh sòng-sit tsin-lí. In siūⁿ-kóng sìn-kàu ē-tàng tit-tio̍h lī-ik. 6 Sìn-kàu si̍t-tsāi ē hō͘ ti-tsiok ê lâng tit-tio̍h tuā lī-ik. 7 In-uī lán tshut-sì bô tuà sím-mi̍h lâi, kè-sin mā bē-tàng tuà sím-mi̍h khì. 8 Ū thang tsia̍h ū-thang tshīng, tsiū tio̍h ài ti-tsiok. 9 Hiah-ê siūⁿ-beh huat-tsâi ê lâng ē hām-lo̍h bê-hi̍k kah lô-bāng í-ki̍p tsin-tsē gû-gōng iú-hāi ê su-io̍k, hō͘ lâng tîm-lûn tì-sú pāi-huāi kah bia̍t-bông. 10 In-uī tham-tsâi sī bān-ok ê kin-guân. Ū-lâng luân-bō͘ tsîⁿ-tsâi tsiū siū bê-hi̍k lâi lī-khui tō-lí hō͘ ka-kī siū tsin-tsē kan-khó͘.

Tuì Thê-mô͘-thài ê Tsí-sī
11 M̄-koh lí tsit-ê sio̍k Siōng-Tsú ê lâng tio̍h siám-phiah tsiah-ê tāi-tsì, lâi tui-kiû tsìng-gī, kìng-khiân, sìn-sim, thiàⁿ-sim, jím-nāi kah un-jiû. 12 Tio̍h tsīn-la̍t khì piàⁿ sìn-gióng ê tsing-tsiàn, tio̍h khak-pó íng-uán ê ua̍h-miā. Lí uī-tio̍h tsit-ê ua̍h-miā siū kíng-tiàu, lí mā bat tī tsin-tsē kiàn-tsìng-jîn ê bīn-tsîng kong-khai sîng-jīn bí-hó ê sìn-gióng. 13 Tī siúⁿ-sù ua̍h-miā hō͘ bān-bu̍t ê Siōng-Tsú kah tuì Pún-tiu Pí-lia̍p-to tsò bí-hó kiàn-tsìng ê Ki-tok Iâ-so͘ bīn-tsîng, 14 guá huan-hù lí, tio̍h tsun-siú tsit-ê bīng-līng, bô khuat-tiám, bô thang hiâm, ti̍t-kàu lán ê Tsú Iâ-so͘ Ki-tok tsài-lîm. 15 Hit-uī tuā hok-khì koh sī to̍k-it ū kuân-lîng, bān ông ê Ông, bān tsú ê Tsú, ē tī I tiāⁿ-tio̍h ê ji̍t-tsí hō͘ Ki-tok tsài-lîm. 16 Siōng-Tsú sī to̍k-it bē sí, tiàm-tī lâng bē-tàng tsiap-kīn ê kng-bîng tiong. Bô-lâng bat khuàⁿ-kuè I, mā bô-lâng ē-tàng khuàⁿ-tio̍h I. Guān tsun-kuì kah íng-uán ê tsú-kuân kui tī I. Amen! 17 Tuì hiah-ê kim-sè hó-gia̍h ê lâng, lí tio̍h huan-hù in m̄-thang kiau-ngō͘, m̄-thang kā in ê ǹg-bāng hē tī bô tiāⁿ-tio̍h ê tsîⁿ-tsâi, tio̍h uá-khò tsiong bān-bu̍t hong-hong hù-hù hō͘ lán hióng-siū ê Siōng-Tsú. 18 Koh tio̍h huan-hù in tsò siān-sū, ke tsò kuá hó-sū lâi hō͘ sim-lîng koh-khah hù-jū, khóng-khài tsín-tsè ū su-iàu ê lâng, kam-guān kah lâng hun-hióng. 19 Án-ne tsò ē-tàng uī ka-kī khí-tsō hó ê tē-ki, mā ē-tàng khak-pó tsin-tsiàⁿ ê ua̍h-miā. 20 Thê-mô͘-thài ah, lí tio̍h tshî-siú Siōng-Tsú kau-thok lí ê tsit-tsik. Tio̍h siám-phiah hiah-ê ū-miâ bô-si̍t ê ké tì-sik tsing-lūn. 21 Ū-lâng tsū-tshing ū tsit-tsióng ê tì-sik suah tī sìn-gióng-siōng phian-lī tsin-lí. Guān Siōng-Tsú ê un-tián kah lín tông-tsāi!