《巴克禮普世版聖經（試讀本）》

 | | | 轉寄

巴克禮普世版（試讀本） 腓利門書第一章

作者 巴克禮普世版小組 2016.05.08

1 Guá sī Pó-lô, uī-tio̍h Ki-tok Iâ-so͘ lâi tsiâⁿ-tsò siû-huān. Guá kah lán ê hiaⁿ-tī Thê-mô͘-thài siá phue hō͘ guán só͘ thiàⁿ ê tâng-kang Hui-lī-bûn, 2 A-hui-a tsí-muē kah guán ê tsiàn-iú A-ki-pò͘, í-ki̍p tī lín tau teh tsū-huē ê kàu-huē. 3 Guān lán ê Thiⁿ-Pē Siōng-Tsú kah Tsú Iâ-so͘ Ki-tok sù lín un-tián kah pîng-an!

Hui-lī-bûn ê Thiàⁿ-sim kah Sìn-sim
4 Guá muí-pái kî-tó ê sî lóng ū siàu-liām lí, siông-siông kám-siā guá ê Siōng-Tsú, 5 in-uī thiaⁿ-tio̍h lí tuì Siōng-Tsú ê tsú-bîn ū thiàⁿ-sim, tuì Tsú Iâ-so͘ ū sìn-sim. 6 Guá khún-kiû Siōng-Tsú, thong-kuè guán kah lín hun-hióng kiōng-tông ê sìn-gióng, hō͘ lán ē-tàng koh-khah tshim-tshim thé-huē kah Ki-tok kiat-liân só͘ tit-tio̍h it-tshè ê tsiok-hok. 7 Hiaⁿ-tī ah, lí ê thiàⁿ-sim hō͘ guá ū tsin-tuā ê huaⁿ-hí kah kó͘-lē, só͘-ū ê sìn-tô͘ mā tuì lí tit-tio̍h kik-lē.

Uī O-nî-se-bó͘ Kî-kiû
8 Guá sui-jiân ē-tàng khò Ki-tok lâi hó-táⁿ bīng-līng lí tsò ing-kai tsò ê tāi-tsì. 9 M̄-koh in-uī sio-thiàⁿ ê iân-kò͘, guá lîng-khó kā lí tshíng-kiû. Guá í-king nî-lāu, tsit-má iáu-koh uī-tio̍h Ki-tok Iâ-so͘ teh siū kuaiⁿ-kaⁿ. 10 Guá thè O-nî-se-bó͘ ǹg lí tshíng-kiû, i sī guá tī kuà thih-liān ê sî só͘ seⁿ-.ê. 11 I í-tsîng tuì lí lóng bô lō͘-īng, taⁿ tuì lí kah guá lóng ū lō͘-īng. 12 Guá tshe-phài i koh tńg-khì lí hia, i sī guá ê sim-pak. 13 Guá pún-lâi siūⁿ-beh kā i lâu tuà guá tsia, thang tī guá uī-tio̍h hok-im teh kuà thih-liān ê sî thang thè lí lâi ho̍k-sāi guá. 14 M̄-koh guá ǹg-bāng it-tshè lóng tshut tī lí ê kam-sim lo̍k-ì, lóng bô bián-kióng, só͘-í nā bô lí ê tông-ì, guá tsi̍t-hāng mā bô beh tsò. 15 Kiám-tshái in-uī án-ne, O-nî-se-bó͘ tsiām-sî lī-khui lí, sī beh hō͘ i koh tńg-khì kah lí íng-uán tsò-hué tuà. 16 I bô koh-tsài tsò lô͘-lē, i ê sin-hūn tshiau-kuè lô͘-lē, sī lán só͘ thiàⁿ ê hiaⁿ-tī. Tuì guá lâi kóng i khak-si̍t sī án-ne, tuì lí lâi kóng koh-khah sī án-ne. Tsit-má i m̄-nā sī lí ke-lāi ê lâng, mā sī Tsú-lāi ê hiaⁿ-tī. 17 Só͘-í lí nā siūⁿ-kóng guá sī lí ê tâng-phuāⁿ, tio̍h tshin-tshiūⁿ tsiap-la̍p guá án-ne kā i tsiap-la̍p. 18 I nā ū tuì-put-khí lí ê só͘-tsāi, á-sī khiàm lí sím-mi̍h, thang lóng sǹg guá ê siàu. 19 Guá Pó-lô tshin-tshiú siá, guá hū-tsik hîng. Nā-sī kuan-hē guá kiù lí ê lîng-hûn, guá m̄-bián kā lí kóng-khí lí só͘ khiàm guá ê tsè. 20 Só͘-í hiaⁿ-tī ah, in-uī Tsú ê iân-kò͘, guá pài-thok lí tàu-kha-tshiú tsi̍t-ē. Lán pêⁿ-pêⁿ sī Ki-tok-tô͘, kiû lí kái-tû guá ê tsing-sîn hū-tam. 21 Guá tshim sìn lí ē thiaⁿ guá ê uē, tsiū siá phue hō͘ lí. Kî-si̍t guá tsai lí ē tsò pí guá só͘ kóng ê khah tsē. 22 Mā tio̍h tsún-pī só͘-tsāi hō͘ guá tuà, in-uī guá ǹg-bāng Siōng-Tsú ē thiaⁿ lín ê kî-tó, hō͘ guá ē-tàng khì lín hia.

Tsuè-āu ê Tshíng-an
23 Uī-tio̍h Ki-tok Iâ-so͘ kah guá tsò-hué teh kuaiⁿ-kaⁿ ê Í-pa-hut kā lín tshíng-an. 24 Guá ê tâng-kang Má-khó, A-lí-ta̍t-kó͘, Tí-má kah Lō͘-ka mā beh kā lí tshíng-an. 25 Guān Tsú Iâ-so͘ Ki-tok ê un-tián kah lín tông-tsāi! Amen.