《巴克禮普世版聖經（試讀本）》

 | | | 轉寄

巴克禮普世版（試讀本） 提多書第三章

作者 巴克禮普世版小組 2016.05.01

Ki-tok-tô͘ ê Hîng-uî
1 Tio̍h thê-tshéⁿ tāi-ke ho̍k-tsiông tsip-tsìng-tsiá kah tsìng-hú kuaⁿ-uân, ài sūn-ho̍k tsiah ē-tàng suî-sî piān-piān lâi tsò ta̍k-hāng hó-sū. 2 Tio̍h khǹg in m̄-thang huí-pòng, m̄-thang uan-ke, tio̍h un-hô iú-siān, īng un-jiû lâi tuì-thāi só͘-ū ê lâng. 3 In-uī lán ka-kī í-tsîng mā sī bû-ti, puē-gi̍k, siū bê-hi̍k, tsò kok-tsióng su-io̍k kah hióng-lo̍k ê lô͘-lē, tī ok-to̍k kah uàn-tò͘ ê tiong-kan teh sing-ua̍h, hō͘-siōng uàn-hūn, pí-tshú thó-ià. 4 M̄-koh lán ê Kiù-Tsú Siōng-Tsú ê tsû-pi kah jîn-ài hián-bîng tshut-lâi ê sî, 5 I tsiū tsín-kiù lán, m̄-sī in-uī lán ka-kī ê hó hîng-uî, sī in-uī I ê liân-bín, thong-kuè tîng-thâu-seⁿ ê sé-lé kah Sìng-Sîn ê king-sin lâi tsín-kiù lán. 6 Sìng-Sîn tsiū-sī Siōng-Tsú thong-kuè lán ê Kiù-Tsú Iâ-so͘ Ki-tok hong-hong hù-hù siúⁿ-sù hō͘ lán. 7 Hō͘ lán thang thong-kuè I ê un-tián lâi kiò-tsò gī-lâng, lâi sîng-siū lán só͘ ǹg-bāng ê íng-uán ua̍h-miā. 8 Tsit-ê uē si̍t-tsāi kóng liáu tsin tio̍h. Guá ài lí ti̍k-pia̍t kiông-tiau tsiah-ê tāi-tsì, hō͘ sìn Siōng-Tsú ê lâng tsuan-sim tsò hó-sū. Tsiah-ê tāi-tsì lóng sī hó, koh tuì lâng ū lī-ik. 9 M̄-koh lí tio̍h siám-phiah gû-gōng ê tsing-lūn, tso̍k-phó͘ ê hun-tsing kah lu̍t-huat ê tsing-tsip, in-uī tsiah-ê tāi-tsì lóng sī bô lī-ik koh bô kè-ta̍t. 10 Tsè-tsō hun-tsing ê lâng, kā i kíng-kài tsi̍t-nn̄g pái liáu-āu tsiū m̄-thang koh kah i óng-lâi. 11 Lí tsai tsit-tsióng lâng í-king pāi-huāi, i án-ne kè-sio̍k huān-tsuē sī teh gí-tīng ka-kī ê tsuē.

Tsuè-āu ê Kà-sī
12 Guá tshe-phài A-thê-má á-sī Tshui-ki-kó͘ khì lí hia ê sî, lí tio̍h kuáⁿ-kín lâi Ni-ko-pho-li̍p tshuē guá, in-uī guá í-king kuat-tīng beh khì hia kuè tang-thiⁿ. 13 Lí tio̍h tsīn-liōng pang-tsō͘ Huat-lu̍t-kàu-su Se-la̍p kah A-pho-lô lí-hîng ê su-iàu, hō͘ in thang an-sim tshut-huat. 14 Mā tio̍h huan-hù lán ka-kī ê lâng tio̍h ha̍k-si̍p tsò hó-sū lâi kiong-kip hiah-ê si̍t-tsāi su-iàu ê lâng, tsiah bián-tit bô kiat kué-tsí. 15 Kah guá tī tsia ê lâng lóng beh kā lí tshíng-an. Tshiáⁿ thè guán kā hiah-ê tâng-sìn ê hó pîng-iú tshíng-an. 16 Guān Siōng-Tsú ê un-tián kah lín tāi-ke tông-tsāi!