《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第一章

作者 巴克禮普世版小組 2016.05.15

Siōng-tè Thong-kuè I ê Kiáⁿ Tuì Lán Kóng-uē
1 Kó͘-tsá Siōng-Tsú thok tsìng sian-ti īng kok-tsióng hong-huat tuì lán ê tsó͘-sian kóng-uē. 2 M̄-koh tī tsit-ê bua̍t-sè, thong-kuè I ê Kiáⁿ tuì lán kóng-uē. Siōng-Tsú ū siat-li̍p I lâi sîng-tsiap bān-bu̍t, koh ū thong-kuè I lâi tshòng-tsō tsit-ê sè-kài. 3 Ki-tok huán-ìng Siōng-Tsú ê îng-iāu, sī Siōng-Tsú pún-tsit ê tsin-siōng. I īng I kuân-lîng ê uē teh î-tshî bān-bu̍t ê tia̍t-sū, sé-tû jîn-luī ê tsuē liáu-āu, taⁿ tsē tī tsì-kuân tsì-tsun Siōng-Tsú ê tsiàⁿ-pîng.

Sìng-Kiáⁿ Pí Thiⁿ-sài Khah Uí-tāi
4 Siōng-Tsú thê-sing Sìng-Kiáⁿ ê tē-uī, hō͘ I pí tsìng thiⁿ-sài khah tsun-kuì, tú tshin-tshiūⁿ Siōng-Tsú só͘ siúⁿ-sù I ê miâ pí thiⁿ-sài khah uí-tāi. 5 Siōng-Tsú kám bat tuì tó tsi̍t-ê thiⁿ-sài kóng, "Lí sī Guá ê kiáⁿ, Guá kin-á-ji̍t tsò lí ê lāu-pē?"( tsù: SPh 2:7) Mā m̄-bat tsí jīm-hô tsi̍t-ê thiⁿ-sài kóng, "Guá beh tsò i ê Thiⁿ-Pē, i beh tsò Guá ê kiáⁿ."( tsù: SBS 7:14; LTS 17:13) 6 Kàu Siōng-Tsú teh-beh tshuā I ê Sìng-Kiáⁿ ji̍p sè-kan ê sî, kóng, "Siōng-Tsú só͘-ū ê thiⁿ-sài lóng tio̍h kìng-pài I."( tsù: SBK 32:43; SPh 97:7 LXX) 7 Kuan-hē thiⁿ-sài, Siōng-Tsú kóng, "Siōng-Tsú īng I ê thiⁿ-sài tsò hong, īng hué-iām tsò I ê tshe-īng."( tsù: SPh 104:4) 8 M̄-koh kuan-hē Sìng-Kiáⁿ khiok kóng, "Siōng-Tsú ah, Lí ê pó-tsō íng-uán tsûn-tsāi, Lí kok-tō͘ ê kuân-pìng sī tsìng-ti̍t. 9 Lí ài kong-gī, uàn-hūn put-huat, só͘-í Siōng-Tsú, lí ê Siōng-Tsú, īng huaⁿ-hí ê iû buah lí, Iâⁿ-kuè buah lí ê tâng-phuāⁿ.( tsù: SPh 45:6-7) 10 Koh kóng, "Tsú ah, Lí tī khí-tsho͘ ū tshòng-tsō tē, thiⁿ mā sī lí ê tshiú só͘ tsō-.ê. 11 Thiⁿ kah tē ē siau-bia̍t, Lí khiok ē kú-tn̂g tsûn-tsāi. Thiⁿ kah tē lóng ē tshin-tshiūⁿ saⁿ-khò͘ tsiām-tsiām kū khì. 12 Lí ē tsiong thiⁿ kah tē tshin-tshiūⁿ teh kńg guā-saⁿ kā in kńg khí-lâi, in tsiū ē piàn-uāⁿ. Tsóng-sī Lí íng-uán bē piàn-uāⁿ, Lí ê huè-siū bû-kiông bû-tsīn.( tsù: SPh 102:25-27) 13 Siōng-Tsú kám bat tuì tó tsi̍t-ê thiⁿ-sài kóng, "Tsē tī Guá ê tsiàⁿ-pîng, ti̍t-kàu Guá hō͘ lí ê tuì-ti̍k khut-ho̍k tī lí ê kha-ē."?( tsù:SPh 110:1) 14 Thiⁿ-sài kám m̄-sī lóng teh tsò Siōng-Tsú tshe-īng ê Sìng-Sîn, siū tshe-phài lâi ho̍k-sāi teh-beh niá-siū tsín-kiù ê lâng?