《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第二章

作者 巴克禮普世版小組 2016.05.22

Uí-tāi ê Tsín-kiù
1 Só͘-í lán tio̍h koh-khah kian-siú só͘ thiaⁿ-tio̍h ê sìn-sit, tsiah bián-tit phian-lī tsin-tō. 2 In-uī thong-kuè thiⁿ-sài só͘ thuân ê sìn-sit sī tsin ê, puē-gi̍k bô sūn-ho̍k ê lâng lóng tio̍h siū ìng-tit ê pò-ìng. 3 Án-ne lán nā hut-lio̍k tsiah-ni̍h-tuā ê tsín-kiù, kám ē-tàng tô-siám ìng-tit ê hîng-hua̍t? Tsú pún-sin khí-thâu to̍h ū kóng-khí tsit-ê tsín-kiù, hiah-ê thiaⁿ-kìⁿ ê lâng mā ū kā lán tsìng-si̍t tsit-ê tāi-tsì. 4 Siōng-Tsú koh ū īng sîn-jiah, kî-sū, ta̍k-khuán tuā-kuân-lîng ê tsok-uî kah tsiàu I ka-kī ê tsí-ì hun-phuè Sìng-Sîn hō͘ lán ê siúⁿ-sù, lóng tsò-hué tsò-tsìng.

Tsín-kiù ê Khai-thok-tsiá
5 Siōng-Tsú pīng bô tsiong só͘ kóng teh-beh lâi ê sè-kài kau hō͘ thiⁿ-sài kuán-lí. 6 M̄-koh Sìng-king ū tsi̍t-ê só͘-tsāi kóng, "Lâng sī sím-mi̍h, Lí kíng-jiân kā i kuan-huâi? Lâng ê kiáⁿ sī sím-mi̍h, Lí kíng-jiân kā i khuàⁿ-kò͘?" 7 Lí hō͘ i sió-khuá khah-su thiⁿ-sài, Koh īng îng-kng kah tsun-kuì hō͘ i tsò hua-kuan, 8 hō͘ i kuán-hat bān-bu̍t.( tsù: SPh 8:4-6) Siōng-Tsú hō͘ lâng kuán-hat bān-bu̍t, án-ne bîng-bîng pau-hâm it-tshè ê mi̍h, m̄-koh kàu taⁿ lán iáu-buē khuàⁿ-tio̍h ū-lâng teh kuán-hat bān-bu̍t. 9 Lán khuàⁿ-kìⁿ hit-ê tsiâⁿ-tsò lâng tsiām-sî sió-khuá khah-su thiⁿ-sài ê Iâ-so͘ í-king king-kuè sí-bông ê kan-khó͘, tit-tio̍h îng-kng kah tsun-kuì ê hua-kuan. I án-ne uá-khò Siōng-Tsú ê un-tián thang uī-tio̍h tsìng-lâng lâi sí. 10 Hit-uī tshòng-tsō koh î-tshî bān-bu̍t ê Siōng-Tsú, uī-tio̍h beh tshuā tsin-tsē kiáⁿ-jî tsìn-ji̍p îng-kng, tsiah tio̍h hō͘ tsín-kiù ê khai-thok-tsiá Iâ-so͘ tuì khó͘-lān lâi sîng-tsuân. Siōng-Tsú án-ne tsò sī ū sik-tòng. 11 Sū-si̍t-siōng, hit-ê hō͘ lâng tsiâⁿ-sìng ê kah hiah-ê tit-tio̍h tsiâⁿ-sìng ê lóng tuì kāng-tsi̍t-ê guân-thâu tshut, in-uī án-ne, Iâ-so͘ tshing in tsò hiaⁿ-tī pīng bô kám-kak kiàn-siàu. 12 Iâ-so͘ tuì Siōng-Tsú kóng: Guá beh tuì Guá ê hiaⁿ-tī tsí-muē pò-iông Lí ê miâ, Tī huē-tsiòng ê bīn-tsîng o-ló Lí ê miâ.( tsù: SPh 22:22) 13 Iâ-so͘ koh kóng, "Guá beh sìn-khò Siōng-Tsú."( tsù: ISA 8:17 LXX) Iū-koh kóng, " Khuàⁿ ah! Guá kah Siōng-Tsú só͘ hō͘ Guá ê kiáⁿ-jî lóng tī tsia."( tsù: ISA 8:18) 14 Kì-jiân kiáⁿ-jî lóng sī ū hueh ū bah ê lâng, Iâ-so͘ pún-sin mā kāng-khuán tsiâⁿ-tsò ū hueh ū bah ê lâng. UĪ-tio̍h beh thong-kuè I ê sí lâi huí-bia̍t hit-ê tsiáng-kuán sí-bông ê Mô͘-kuí, 15 koh tháu-pàng hiah-ê it-sing kiaⁿ-hiâⁿ teh tsò sí-bông lô͘-lē ê lâng. 16 Tong-jiân Iâ-so͘ teh kuan-sim ê m̄-sī thiⁿ-sài, sī A-pik-la̍h-hán ê kiáⁿ-sun. 17 Só͘-í Iâ-so͘ tī ta̍k hong-bīn lóng tio̍h kah hiaⁿ-tī tsí-muē kāng-khuán, tsiah ē-tàng tī Siōng-Tsú ê bīn-tsîng tsò jîn-tsû koh tiong-si̍t ê tsè-si-tiúⁿ, thang hō͘ tsìng-lâng ê tsuē tit-tio̍h sià-bián. 18 In-uī Iâ-so͘ ū tshin-sin king-li̍k siū-khó͘ kah tshì-thàm, tsiū ē-tàng pang-tsō͘ hiah-ê siū tshì-thàm ê lâng.